Рамис Рыскулов. Архивдик сүрөт

Ыр аке Рамис Рыскуловдун 85 жылдыгына арналган кече өтөт

89
(жаңыланган 09:36 18.10.2019)
Рамис Рыскулов ыр жазбастан сүрөтчүлүк өнөр менен да алектенет. Анын эмгектери өзүнүн маани-маңызынын ар бир адам эле түшүнө бербегендиги, камтыган терең философиясы менен өзгөчөлөнүп турат.

БИШКЕК, 18-окт. — Sputnik. Бүгүн Улуттук китепкананын фойесинде Кыргыз эл акыны, Кыргыз Республикасынын маданиятына эмгек сиңирген ишмер, Алыкул Осмонов атындагы сыйлыгынын лауреаты, белгилүү акын Рамис Рыскуловдун 85 жылдыгына арналган "Ыр жыттанган Эл акыны" аттуу китеп-сүрөт көргөзмөсү жана жолугушуу кечеси өткөрүлөт. Бул туурасында аталган китепканадан кабарлашты.

Кече саат 15:00дө башталат.

Көргөзмө 2 бөлүктөн турат. Биринчиси "Жашап жүрөм, жазыла элек жаш ырдай...", ал эми экинчиси "менин ырыскым да, бактым да калемим..." деп аталат.

Көргөзмөдө Рыскуловдун китептери, гезит-журналдык материалдар, макалалар, интервьюлар, ой-пикирлер, цитаталар орун алган.

Көргөзмөгө мамлекеттик жана коомдук уюмдардын кызматкерлери, акын-жазуучулар, студенттер жана массалык-маалымат каражаттарынын өкүлдөрү катышат.

Рамис Рыскулов 1934-жылы 9-сентябрда Чүй облусунун Москва районундагы Кызыл-Тоо айылында туулган. Кызыл-Тоо мектебинин 7-классын бүтүргөндөн кийин кичинесинен зээндүү, сергек өскөн, окууга дилгир бала шаарга барып окуйм деп жол тартат. Педагогикалык окуу жайына тапшырып, аны 1951-жылы бүтөт. Москвадагы ВЛКСМ БКнын алдындагы Борбордук Жогорку комсомолдук мектептин жана Бүткүл союздук Максим Горький атындагы Адабият институтун 1959-жылы бүтүп, Кыргызстандагы "Кыргызстан пионери" газетасында адабий кызматкер болуп иштеп эмгек жолун баштаган. Андан кийин "Ленинчил жаштын" редакциясында, 1959-1960-жылдары "Ала-Тоо" журналында иштеген.

Рыскуловдун 14 жашында жазган "Айтабыз алкыш атага" деген ыры "Кыргызстан пионери" газетасына жарыяланган жана "Эки энем" аттуу ырына обон чыгарылган. Акындын туңгуч ырлар жыйнагы 1959-жылы "Жаз" деген ат менен басмадан басылып чыккан. Ага удаа эле "Поклон земле", "Даңкан", "Шаттуу ырлар", "Дилбар", "Күлкү чачам", "Жаштык шаары", "Эки жөжө", "Ырлар", "Ай бөбөк", "Ыр нөшөрү" аттуу жыйнактардын автору. 1950-жылдардын ортосунда кыргыз поэзиясында жаңылоо, кеңейтүү багытында адеп демилге көтөргөн Рыскулов болгон.

Кыргыз адабиятында биринчилерден болуп эркин ыр формасындагы изденүү менен кыргыз поэзиясын жаңы ыргак, уйкаштык формалар, жаңыча саптар менен байытып, кыргыз поэзиясында ак ырдын тамыр алышына өтө орчундуу эмгек сиңирди.

Акын Пушкиндин, Некрасовдун, Михалковдун, Есениндин, Маяковскийдин, А. Вознесенскийдин жана Алимжановдун ырларын кыргызча которгон.

Рыскулов жеке эле ыр жазбастан сүрөтчүлүк өнөрү менен да алектенет. 1987-жылы ал тарткан "Иисустун өнүгүүсү" жана "Жылмаюу" деген сүрөттөрү Москвада өткөн элдик кол өнөрчүлөрдүн көргөзмөсүнө катышып, Диплом, Париждеги СССР элдеринин элдик кол өнөрчүлөрүнүн II фестивалына катышып, лауреаттыкты жеңип алган.

1986-жылы поэзиядагы үзүрлүү эмгеги үчүн Кыргыз Республикасынын Ардак грамотасы менен сыйланган. Кыргыз маданиятына жана адабиятына кошкон салымы үчүн Кыргыз Республикасынын маданиятына эмгек сиңирген ишмер (1994), Кыргыз Республикасынын эл акыны (1995) деген ардактуу наамдар ыйгарылган. 2017-жылдын 12-декабрында ТҮРКСОЙ эл аралык уюму көп жылдык үзүрлүү эмгеги үчүн Жусуп Баласагын атындагы медалы менен сыйлайт. 2019-жылдын 29-апрелинде Бишкек шаарынын маданий өнүгүүсүнө кошкон зор салымы жана коомдук ишмердүүлүгү үчүн Бишкек шаарынын мэриясы Бишкек шаардык кеңеши "Бишкек шаарынын ардактуу атуулу" наамын ыйгарат. Учурда персоналдык пенсияда экендигине карабастан жигердүүлүк менен чыгармачылыкта эмгектенип жатат.

89
Белгилер:
Кыргызстан, жазуучу, акын, Улуттук китепкана, китепкана
Тема боюнча
Кайра кайтып жолугушчу жолдор бар! Алыкул Осмоновдун кеп казынасы
Турмуш дудукту да кол жаңсатып сүйлөтөт! Рамис Рыскуловдун нускасы