Комуз. Архивдик сүрөт

Эки акындын "Кеч күздөгү кусалыгы". Бишкекте ыр кече өтөт

149
(жаңыланган 14:03 16.11.2019)
Мээркан Токсобаева Бишкектеги Кыргыз улуттук университетинен журналисттик кесипти окуса, Самидин Стамбеков Ош мамлекеттик педагогикалык институтун филолог адистиги боюнча аяктаган.

БИШКЕК, 16-ноя. — Sputnik. Борбор калаада КРдин маданиятына эмгек сиңирген ишмер Мээркан Токсобаева жана Улуттук жазуучулар союзунун мүчөсү Самидин Стамбековдун чыгармачылыгына арналган "Кеч күздөгү кусалык" деген аталыштагы поэзия кечеси өтөт. Бул тууралуу "Роза Отунбаеванын демилгеси" эл аралык коомдук фонддон кабарлашты.

Ыр майрам 22-ноябрда Токтогул Сатылганов атындагы Кыргыз улуттук филармониянын кичи залында саат 17.00дө башталат.

Акын Мээркан Токсобаева Ысык-Көл облусунун Тоң районундагы Бөкөнбаев айылында туулган. Улуттук университетинин кыргыз филологиясы факультетинин журналистика бөлүмүн сырттан окуп бүтүргөн.

Райондук "Эмгекчил" гезитинде кабарчы, редактор болуп иштеген. Журналисттик иши менен катар жеке чыгармачылыгын айкалыштырып, "Махабатым", "Мажүрүм тал", "Улуу сезим" аттуу поэтикалык жыйнактарын чыгарган. Райондогу чыгармачыл адамдардын башын бириктирген "Тескей күүлөрү" аттуу адабий ийримди 40 жылдан ашуун убакыттан бери жетектейт.

КРдин Ардак Грамотасынын ээси, КРдин маданиятына эмгек сиңирген ишмер жана Улуттук жазуучулар союзунун мүчөсү, Тоң районунун ардактуу атуулу.

Акын Самидин Стамбеков Чаткал районуна караштуу Каныш-Кыя айылында туулган. Ош мамлекеттик педагогикалык институтунун филология факультетин бүтүргөн.

Ал Чаткал орто мектебинде мугалим, тарбиялык иштер боюнча директордун орун басары болуп иштеген. Кийинчерээк Чаткал райондук "Чаткал оттору" гезитинде редактордун орун басары жана редактору, Бишкек шаарындагы "Фрунзе шамы", "Ленинчил жаш", "Ак бата" гезит-журналдарында кабарчы, бөлүм башчы, редактордун орун басары, Жалал-Абад облустук "Акыйкат" гезитинин башкы редактору кызматтарын аркалаган. 2008-жылдан бери Жалал-Абад облустук коомдук-педагогикалык "Дил" гезитинин башкы редактору болуп иштеп келет.

Анын чыгармалары облустук, республикалык "Кыргызстан маданияты", "Ленинчил жаш", "Ленин жолу", "Мугалимдер газетасы", "Кыргыз туусу", "Эркин-Тоо" сыяктуу гезиттерге, "Ала-Тоо", "Жаш Ленинчи", "Ак бата" журналдарында басылган.

Ал "Студенттик жаз - 80", "Ала-Тоо жазы – 88", "Алыкулдун ак боз ат – 90" фестивалдарынын катышуучусу жана лауреаты болгон.

Стамбеков Анна Ахматованын, Михаил Дудиндин, Лев Озеровдун, Николай Рубцовдун ырларын кыргыз тилине которуп, алардын айрымдары адабий журналдарда жарыяланган, айрымдары акындын "Алыстан жазылган каттар" деген ыр жыйнагына киргизилген.

149
Белгилер:
Кыргызстан, кече, поэзия, ыр жыйнак, акын
Тема боюнча
Жолдор гана түгөнбөйт бул өмүрдө... Зайырбек Ажыматовдун кеп казынасы
Багы жок элдин баатыры көп! Салижан Жигитовдун кеп казынасы
Ата Журт акыр бир күн жетим калат! Дооронбек Садырбаевдин кеп казынасы