Акын Элмирбек Иманалиев. Архивдик сүрөт

Назарбаевдин сый-урматын көргөн. Эл акыны Элмирбек Иманалиев тууралуу 8 факты

1397
(жаңыланган 13:16 18.01.2020)
Жумурай журтка таанымал ак таңдай акын Элмирбек Иманалиев 42 жашка толду. Ал 1978-жылы 17-январда Токтогул районунун Өзгөрүш айылында жарыкка келген.

Бул күндү утурлай Sputnik Кыргызстан маалымат агенттиги белгилүү акын тууралуу факты сунуштайт.

Айтылуу Эшмамбеттин урпагы

Элмирбек Иманалиев Токтогул акындын эң жакын үзөңгүлөш өнөгү Эшмамбет Байсейит уулунун жээн чөбөрөсү.

"Менин атамдын ысымы Калил. Аны төрөгөн Тай деген кемпир Эшмамбеттин жалгыз кызы болгон. Башка тукуму калган эмес. Мен ошол Тай чоң апамды кадыресе көрүп, билип калдым. 93 жашында каза болду. Анда мен 12 жашта элем. Эшмамбеттин сөөгү биздин Токтогул районунун Чоңко айылындагы Ак-Жар мазарына коюлган", — деп айтып берген Иманалиев Sputnik агенттигине берген маегинде.

Манасчылык өнөрү

Болочок акын эрте тамга таанып, жаштайынан адабий чыгармаларды көп окуган. Ошол кездеги бөбөктөрдүн эң алгачкы окуган китеби "Алиппе" же жомок болсо, анын эң биринчи окуган китеби "Манас" эпосу болгон. Ошондон кийин манас айтып баштаса, өзүнөн улуу агалары "сен китепти окуп, жаттап алып айтып атасың" деп ишенишкен эмес. Ага арданып манас айтпай койгон. Кийин акындык өнөрдү аркалап, манасчылыкка көп көңүл бурбай калган. Анткен менен кээде айтып турат.

Төкмөлүгү

4-классынан тарта калем кармап ыр жазса, эки жылдан кийин комуздун коштоосунда ырдап баштаган. Өнөрүн байкаган белгилүү акын Тууганбай Абдиев аны шаарга алып кеткен. 15 жашында "Ак таңдай — 1993" фестивалында баш байгени жеңип алган. Ошол убактан тарта эл оозуна алына баштап, көптөгөн республикалык жана эл аралык айтыштарда баш байгени жеңген.

Акын билим жолун Токтогул Сатылганов атындагы Улуттук филармониянын алдындагы эки жылдык студияда баштап, андан соң 2004-жылы Бүбүсара Бейшеналиева атындагы искусство институтунун фольклор бөлүмүн бүтүргөн. 

© Sputnik / Эмиль Садыров
Айтылуу төкмө акын Элмирбек Иманалиев өзүнүн "Булбулум" аттуу ырын ырдап берди

Муңдуу обондордун автору

Элмирбек Иманалиев белгилүү ырчылар аткарып жүргөн "Күттүм, күттүм", "Ак секет", "Булбулум", "Боздотпочу", "Аруузат", "Булбулум", "Балкыма" ырларынын обонун жараткан. Өзү жазган ырларында арман, муң бар экендигин жашырбайт. Маектердин биринде "мен тамаша, күлкүмдү айтыш учурунда чыгарып салып, калган чыгармачылыгыма жалаң кайгы, арман гана калат окшойт деп ойлоп калдым" деп айтканы бар.

Актёр да болгон...

Бир кезде шаардык театрда иштеп, Кыргыз драма театрынын сахнасында Токтогулдун образын жараткан. Бирок өзүн актёр деп эсептебейт.

Казакстандын мурдагы президенти урматтаган

Журналисттер 2015-жылы Элмирбек Иманалиевден Нурсултан Назарбаев менен жеке мамилеси бар-жогуна кызыгып сурашканда, ал казак элинин ажосу чыгармачылыгын урматтай турганын айткан.

"Мен ал киши менен бир нече жолу бет маңдай отуруп баарлашкам. Туулган күндөрүндө дагы болдум. Назарбаев биздин Ысык-Көлгө келгенде жолуккан учурларым болду. Ал катышкан расмий, бейрасмий жолугушууларда ырдап жүрөм. Айтор, ошондой жакындыгым бар. Чыгармачылыгыма урмат менен мамиле кылат. Себеби өзү өнөргө жакын. Кыргыз-казактын улуу акындары боюнча дээрлик маалыматы кенен", — деген Иманалиев.
Народный артист Кыргызстана, акын Элмирбек Иманалиев во время интервью радио Sputnik Кыргызстан.
© Sputnik / Табылды Кадырбеков
Акын Элмирбек Иманалиевге 2016-жылы Эл артисти наамы берилген.

Биринчи турмушу

Төкмө акын 1995-жылы ырчы, "Сармерден" долбоорунун шайыр жеңеси Гүлбүбү Ороскул кызына баш кошкон. Жубайларды чыгармачылык жол тааныштырган. 15 жыл чогуу жашагандан кийин ажырашып кетишкен. Ортолорунда Айзуура жана Сезим аттуу кыздары бар.

Гүлбүбү Ороскул кызы 2017-жылы дүйнөдөн мезгилсиз кайткан. Улуу кызы Айзуура белгилүү журналист Мирзат Мукановго турмушка чыгып, Элмирбек Иманалиевдин учурда жээн небереси бар.

Экинчи жубайы медик

Азыркы жары Нурзат медицина кызматкери. Өзү өнөрдөн алыс болсо да, күйөөсүнүн айтыштарын калтырбай көрүп, күйөрмандык кыларын айтканы бар. Жубайлар үч баланын ата-энеси.

Элмирбек Иманалиев учурда жаш акындарга устаттык кылып келет. Ага 2016-жылы Эл артисти наамы берилген.

1397
Белгилер:
ыр, төкмө акын, Элмирбек Иманалиев, Кыргызстан
Тема:
Кыргыздын көркөм өнөрү, белгилүү инсандары жөнүндө фактылар (342)
Тема боюнча
Беш жашында карышкырга тап берип... "Ак жылдыз" Беганас Сартов тууралуу маек
Төкмө акын Изат Айдаркулова: эркектер менен "катуураак" айтышып алам
Акын Рыскүл Изатова: сөзгө сындырып, атаандашкан эркектер болду