Микрофон. Архив

Келишим түзүп сый акы алыңыз. Кыргызпатент чыгармачыл чөйрөгө кайрылды

165
Чыгарма ээлери Кыргызпатент менен келишим түзүп, аткаруучулар менен колдонуучуларды тизмелеп бериши керек. Андан кийин мекеме пайдаланылган эмгектер үчүн авторлорго сый акы чогултат.

БИШКЕК, 11-фев. — Sputnik. Кыргызпатент авторлор менен келишим түзүү үчүн чыгармачыл чөйрөнүн өкүлдөрүнө кайрылуу жолдоду. Бул тууралуу Интеллектуалдык менчик жана инновациялар мамлекеттик кызматы кабарлады.

Мекеменин кайрылуусу композитор, обончу, акын жана драматургдарга багытталган.

"Эгерде сиздин чыгармаларыңыз же сиз аткарган чыгармалар телерадиокомпаниялардын эфиринде же концерттерде, пьесаларыңыз театрларда коюлуп жатса, анда сиз автордук укуктун ээси болуп саналасыз. Сиздин сый акыңызды чогултуп берүү укугун Кыргызпатентке келишим менен өткөрүп берген күндөн баштап, Кыргызпатент сиздин ыйгарым укуктуу өкүлүңүз болуп калат", — деп жазылат маалыматта.

Келишим түзүү үчүн автор өзүнүн жана аткаруучулардын тизмесин толтурууга тийиш. Мисалы, обондуу ырга тексттин автору, обончу жана композитор жазылышы керек.

Кыргызпатент автордук сый акыны чогултуу жана бөлүштүрүү процессин автоматташтырган атайын гиперграф программалык системасын ишке киргизген. Ага автордун чыгармалары жөнүндө маалыматтар киргизилип, жеке бөлүмчө ачылат. Ар бир автор сый акылардын бөлүштүрүлүшү тууралуу маалыматты көрө алат.

Гиперграф системасына катталуу үчүн кыскача түшүндүрмө менен таанышууга болот.

165
Белгилер:
Кыргызпатент, келишим, сый акы, чыгарма, автордук укук
Тема боюнча
Роза Айтматованын "Атам жөнүндө" аттуу китебинин бет ачары өттү. Сүрөт
Мамлекеттик Учур жаштар театрынын актеру Болотбек Тилек

Тилек: 2017-жылдан бери чет элдик тасмаларды кыргызчалап келебиз

81
Мамлекеттик "Учур" жаштар театрынын актеру Болотбек Тилек 2017-жылы кесиптештери менен студия ачып, тилди өнүктүрүү максатында чет элдик тасмаларды кыргыз тилине которуп башташканын айтты.
Тилек: 2017-жылдан бери чет элдик тасмаларды кыргызчалап келебиз

Биз мамлекет үчүн эмне кылдык деген позицияны карманып, өзүбүздүн кесибибизге жакын үн коштоо тармагын тандап, дүйнөлүк тасмаларды элге кыргызча тартуулап жатабыз. Бул тууралуу Болотбек Тилек Sputnik Кыргызстан радиосунун эфиринде маек куруп жатып билдирди.

Анын айтымында, учурда бир аптанын ичинде толук метраждуу тасманы которуп бүтүшөт.

"Биз алгач актердук чеберчилик боюнча окуу курсун ачтык. Улуулардан кеңеш алып өз тилибизге салым кошуу максатында чет тилдеги тасмаларды кыргызчага которуу ишин баштадык. Командада жети киши эмгектенет. Андан тышкары башка кесиптештерибизди долбоорго чакырып, баш-аягы 30га жакын адам дубляж жасайт. Тасмаларда жалаң театр жана кинодогу кесипкөй актерлор үн коштоп жатат. Ал эми балдардын үнүн коштоо үчүн 5-6 кичинекей актерлорубуз бар. Негизи үн ар бир каарманга эле жараша бербейт. Мен башкы ролдун образын ачып берем деп тандап алуу мүмкүн эмес. Тасмадагы актердун көлөмү, мүнөзү, статусу жана башка өзгөчөлүктөрүнө карап коштоочу үн тандалат. Ал үчүн актерлор арасында миникастинг өткөрөбүз же даяр портфолиого жараша ролдор бөлүштүрүлөт. Кыргыз тили өтө бай тил. Биз азыр тасмаларды орто деңгээлде которуп жатабыз. Тексттин түп нускасынан эч кандай айырмаланбайт. Болгону кыргызга тиешелүү сүйлөө манерасы колдонулат", – деди Тилек.

Актер учурда чоң сериалдарды которуп, телеканалдар менен иштеше башташканын кошумчалады.

81
Белгилер:
Болотбек Тилек, котормо, дубляж, тасма
Тема боюнча
Аширова: бир учурда беш каармандын образын ачкан учурлар болот
Балет бийчилери. Архивдик сүрөт

Бишкекте Гоголдун повестинин негизинде "Рождество алдындагы түн" балети көрсөтүлөт

55
Кыргыз балетинин даңкын кайтаруу максатында коюла турган балеттеги бардык ролдорду Чолпонбек Базарбаев атындагы Бишкек хореографиялык окуу жайынын студенттери аткарат.

БИШКЕК, 23-фев. — Sputnik. Бишкектеги Абдылас Малдыбаев атындагы Опера жана балет театрында Николай Гоголдун повестинин негизинде жазылган "Рождество алдындагы түн" балетинин бет ачары өтөт. Бул тууралуу Маданият, маалымат, спорт жана жаштар саясаты министрлиги билдирди.

Кыргыз балетинин мурунку даңкын кайтаруу максатында коюла турган балет-спектаклдин бет ачары 25-февралга белгиленген.

"Спектаклдеги бардык ролдорду Чолпонбек Базарбаев атындагы Бишкек хореографиялык окуу жайынын студенттери аткарат. Балетте орус композиторлору А.К. Глазунов, М.И. Глинка, М.П. Мусоргский, Н. А. Римский-Корсаков жана Р.К Щедриндин музыкалары колдонулат", — деп жазылат маалыматта.

Келечекте спектаклди Чолпонбек Базарбаев атындагы хореографиялык окуу жайынын репертуарына киргизүү пландалып жатканы айтылды.

55
Белгилер:
бет ачар, спектакль, балет
Тема боюнча
Кара деңиз флотунун ыр жана бий ансамбли Бишкекте концерт берди. Сүрөт
Жолдогу жүк ташуучу унаа. Архив

Таңкы 6га чейин жабылды. Өлкөдөгү эки ири жолго чектөө киргизилди

0
(жаңыланган 00:53 25.02.2021)
Жолду көчкү кооптуулугунан улам жабууга Жарандык коргонуу башчысы-премьер министр бүгүн буйрук берген.

БИШКЕК, 25-фев. — Sputnik. Бишкек — Ош жолунда кар көчкү түшүү коркунучу бар болгондуктан Жайыл, Токтогул райондорундагы жана Суусамыр — Талас — Тараз унаа жолунун Талды-Булак айылындагы посттор 25-февраль таңкы саат 06:00гө чейин убактылуу жабылды. Бул тууралуу ӨКМдин маалымат кызматынан кабарлашты.

Бул премьер-министрдин буйругунун негизинде болгон.

"Бишкек — Ош жолунда кар көчкү түшүү коркунучу болгондуктан Жайыл районунун Сосновка, Токтогул районунун Арал постторунда жана  Суусамыр — Талас — Тараз жолунун Талды-Булак айылындагы постунда автоунаалардын бардык түрүнө таңкы саат 06:00гө чейин убактылуу чектөө киргизилди", — деп кабарлаган ӨКМ.

Эске салсак, Бишкек — Ош жолунун 132-чакырымында көлөмү болжол менен 1800 м3 кар көчкү түшкөндүктөн учурда жол жабылган.

0
Белгилер:
көчкү, Бишкек - Ош жолу, Жайыл району, Токтогул району, Кыргызстан
Тема боюнча
Көчкү түшүп, Бишкек — Ош жолу убактылуу жабылды