27 жаштагы Таттыбүбү... "Отко таазим" тасмасындагы таберик сүрөт

219
(жаңыланган 20:07 07.07.2021)
Sputnik Кыргызстан маалымат агенттиги архивде сакталып жаткан сейрек сүрөттөрдү жарыялап, анын тарыхын баяндоону улантат.
27 жаштагы Таттыбүбү... Отко таазим тасмасындагы таберик сүрөт
© Sputnik / Александр Федоров

Белгилүү актриса Таттыбүбү Турсунбаеванын уулу Канат Эшимбековду жуунтуп кучактап отурган сүрөтү 1971-жылы Баткен облусунда тартылган.

Ал жылы кинорежиссёр Төлөмүш Океев жазуучу Насирдин Байтемировдун "Тарых эстелиги" романынын негизинде "Отко таазим" аттуу тасма тарткан. Сүрөттөгү актриса башкы каарман Уркуя Салиеванын ролун жараткан. Бул ролго Фрунзедеги театрлардан, башка советтик республикалардагы чыгармачыл жамааттарынан бери актрисалар келген. Бирок режиссёр көпчүлүгүн жактырбай, соңунда Таттыбүбү Турсунбаеваны тандаган.

Ошол учурду актрисанын уулу Канат Эшимбеков мындайча эскерет:

"Тасма тартылып жатканда мен үч жашта болчумун. Ошондуктан көп учур эсимде жок. Азыр ойлосом мени киночулар камерага тартып алып жатканын толук түшүнбөй эле күнүмдүк жашоодо жүргөндөй эле катышчу экенмин. Фильмде апам мени жуунткан эпизод бар. Ошонун алдында мен такыр чечинбей коюп, режиссёр менен оператор келип камераны көргөзгөндө гана дырдай жылаңач болгом. Мага алардын жабдуулары өтө кызык болчу. Андан сырткары, керектүү кадрларды тартуу зарыл болгондо апамды жандап жүрчүмүн. Мени ал кезде тарбиячым бакчу, балдар менен ойночубуз. Апам көп убактысын тасма тартуу аянтчасында өткөргөндүктөн ошол жактан аны издеп жөнөчүмүн. Үй өрттөнгөн эпизоддо Сабира Күмүшалиева апа мени артына көтөрүп алганын, ээн талаада үчөөбүздүн жетелешип жөө кетип бараткан учурларды жакшы билем. Себеби кулагым ооруп жүргөндүктөн киночулардын бир нече дубль тартканы мени кыйнап жиберчү. Асел эжем Чаекте таякелеримдикинде болчу", — деди Эшимбеков.

Ал ошондой эле актриса сахнада роль аткарганда да театр толуп, спектакль жогорку деңгээлде өтүп, дайыма көрүүчүлөр суктанып кеткендиктерин кошумчалады.

Аталган фильмде Муратбек Рыскулов, Сабира Күмүшалиева, Алиман Жангорозова, Искендер Рыскулов, Болот Бейшеналиев, Сүймөнкул Чокморов, Советбек Жумадылов, Жамал Сейдакматова, Жапар Садыков, Асанбек Кыдырназаров, Алымкул Алымбаев, Тургун Бердалиев, Чоро Думанаев, Насрет Дубашев, Чолпон Даанышманова, Аскар Сейдалиев, Деңизбек Чалапинов, Алмаз Кыргызбаев, Текен Чалапинов, Николай Толстых роль жараткан.

"Отко таазим" 1972-жылы көрүүчүлөргө сунушталып, Төлөмүш Океев Токтогул атындагы мамлекеттик сыйлыкка татыган. Аталган кинокартинадагы кызыктуу ирмемдерди Sputnik Кыргызстан агенттигинин материалынан көрүүгө болот.

219
Белгилер:
актриса, Таттыбүбү Турсунбаева, тасма, таберик сүрөт
Тема боюнча
Мүнөзү оор, ишке так Болот Шамшиев. "Ак кемедеги" таберик сүрөт
Сүймөнкул Чокморов жубайы Салима Шабазова менен музейде. Таберик сүрөт
Орозбек Кутманалиев 11 уул-кызы менен. Үй-бүлөнүн таберик сүрөтү
Көйкашка коомдук бирикмесинин мүчөсү, манасчы Нурбек Талантбеков

Талантбеков: "жигин тартып көрүү" душмандын чамасын билүү дегенди түшүндүрөт