S&P агенттиги берген бааны Батыштын "муунткуч ыкмасы" деп эсептейт серепчи

Жазылуу
РФтин насыялык рейтингинин "спекулятивдик" деңгээлге түшүүсү россиялык инвесторлордун Кыргызстандан кетишине себеп болушу ыктымал. Бирок талдоочулар мындай рейтингдерди батыш агенттиктеринин берген "аба ырайы тууралуу түзүлгөн начар билдирүүлөрү" деп эсептешет.

БИШКЕК, 28 янв — Sputnik. Россиянын насыялык өз алдынча рейтинги "спекулятивдик" деңгээлге түшкөнү, мүмкүн, россиялык инвесторлордун Кыргызстандагы ордуна таасирин тийгизиши мүмкүн. Бирок талдоочулардын пикиринде, бул бааны Батыштын РФке карата колдонгон дагы бир "муунткуч ыкмасы".

"Кыргыз фондалык биржасы" ЖАКтын соода жана листинг боюнча башчысы Аида Чодулова рейтингдин төмөндөшү биздин фондалык рынокко түз таасирин тийгизбейт, себеби, тилекке каршы, Россиянын баалуу кагаздары биздин рынокто жок. 

"Бирок бул рыноктун абалына кыйыр таасирин тийгизет деп ишеничтүү айта алам. Баалуу кагаздарды сатуу жалпысынан төмөндөшү ыктымал, жана буга россиялыктардын рыноктон кетиши себеп болушу мүмкүн. Бүгүнкү күндө көпчүлүк россиялык инвесторлор биздин кагаздарды сатып алуу жана сатуу операцияларын жүргүзөт", — деди Чодулова.

Ошол эле учурда "Далил" серепчилер клубунун талдоочусу Марс Сариев эл аралык S&P агенттигинин бул көрсөткүчтү төмөндөтүп беришин Батыштын "муунткуч ыкмасы" деп белгиледи.

"Рейтинг өзүнөн өзү — айкын эмес, көп сандагы божомолдоолорго негизделген түшүнүк. Бул аба ырайы жөнүндө жаман түзүлгөн алдын ала билдирүү сыяктуу. Анын артында Батыштын саясий көз карашы менен байланышкан күчтөр турушу мүмкүн. Албетте мындай алдын ала божомолдоолордун таасирин эсепке албай коюуга болбойт. Бул биринчи кезекте биздин өлкөгө тиешелүү", — деп баса белгиледи Сариев.

Россиялык рыноктун абалы КРде экономикалык кырдаалга да таасирин тийгизет деп эсептейт серепчи. 

"Кыргызстан Россия менен тыгыз байланышта. Жана бардык өзгөрүүлөр КРге да сөзсүз таасирин тийгизет. Бирок бул эки өлкөнүн ЕАЭБнын алкагындагы кызматташтыгына таасир кылбайт деп ойлойм. Ошентсе да, кыязы, жакынкы арада белди бекем бууганга туура келет", — деп белгиледи Сариев.

S&P эл аралык рейтинг түзүү боюнча агенттиги дүйшөмбү күнү кечинде соода-сатык жабылгандан кийин РФтин өз алдынча насыялык рейтингин инвестициялык "ВВВ-" деңгээлинен "спекулятивдик" деп аталчу "ВВ+" деңгээлге түшүргөн. Ошентип, Россия инвестициялык насыялык үч рейтингдин бирин жоготкон, бул россиялык экономикадагы өсүштү кошумча жайлатышы ыктымал.

Жаңылыктар түрмөгү
0