БИШКЕК, 23-янв. — Sputnik. Чүй облусундагы Талды-Булак Сол жээк кенинен быйыл 2,5 тонна алтын өндүрүлөт. Бул тууралуу Экономика министрлигинин макроэкономикалык саясат боюнча башкармалыгынын жетекчиси Насирдин Шамшиев ишкердик темасы боюнча өтүп жаткан семинарда билдирди.
Анын айтымында, Талды-Булак Сол жээк кени былтыр август айында ишке киргизилип, тазалоочу жайда авария болуп ишкананын ишине тоскоолдук жаралган.
"Учурда анын бардыгы калыбына келтирилди. Былтыр эксперименттик негизде иштеп, 2 килограмм алтын өндүрүлгөн", — деди ал.
Талды-Булак Сол жээк кенин "Алтынкен" ишканасы иштетет. Ал 2006-жылы апрель айында түзүлгөн. 2011-жылы Талды-Булак Сол жээк кенин "Алтынкен" компаниясы иштетет. Акциялардын 40 пайызы "Кыргыз алтынга" тиешелүү. 60 пайызы кытайдын Superb Pacific Limited компаниясына таандык. Ал Кытайдагы эң ири Zijin Mining ишканасынын туунду компаниясы болуп саналат.
Аталган кенде болжолдуу эсептөөлөргө ылайык, 64 тоннадан ашык алтын, 45 тоннадай күмүш бар.
