Кыргызстанда кайсы тармакта ишкердик кылуу кирешелүү. Рейтинг

Жазылуу
Акыркы анализдер боюнча учурда мейманкана жана ресторан бизнеси оор учурду баштан өткөрүүдө. Бул тармак беш жыл мурдагыдай киреше алып келбей калды

БИШКЕК, 1-янв. — Sputnik. Кыргызстандагы ишкердик чөйрөсүнүн кирешелүүлүгүн Улуттук статистика комитети эсептеп чыккан. Мекеме 2016-жылы жана акыркы беш жылда өндүрүш тармагынын кирешеси чыгымдарга карата канча пайыз экенин аныктады.

Sputnik Кыргызстан агенттиги статистикалык маалыматтардын негизинде өзүнүн рейтингин чыгарды. Ушу тапта кыймылсыз мүлктү сатуу тармагы дүркүрөп өсүп жатат. Рентабелдүүлүктүн деңгээли 42 пайызды түзөт, бул беш жыл мурдагыга караганда аябай эле жогору көрсөткүч.

Кыргызстанда чыгарылуучу Ravon автоунаалары - Sputnik Кыргызстан
Унаа чогулта турган үч завод Кыргызстандын кайсы жерине ачылары айтылды
Соода тармагы экинчи орунда. Салынган ар бир 100 сом 26 сом пайда алып келген. Ошентсе да соода тармагында иштегендердин абалы беш жыл мурда мындан да жакшы болчу. Анда рентабелдүүлүктүн деңгээли 64 пайызга чейин жеткен.

Үчүнчү орунга байланыш кызматын сунуштаган компаниялар чыкты, алардын рентабелдүүлүгү 23 пайызга барабар.

Ишкердик жаатында пайда алып келген тармактардын төртүнчү катарына транспорт компаниялары илинди. Бул тармакта салынган 100 сом 18 сом пайда алып келген.

Маалымат таратуу тармагында иштеген ЖМК, гезит, телеканал жана башкалардын рентабелдүүлүгү беш жыл мурдагыдай эле 17 пайыз.

Ал эми мейманкана жана ресторан тармагында иштегендер бир кыйла эле кирешеден кол жууп калууда. Алардын рентабелдүүлүгү 5 пайызга гана араң жетет.

Жаңылыктар түрмөгү
0