Финпол имараты. Архивдик сүрөт

Финпол Матраимовдун Кыргызстандагы мүлкүн тизмектеди. Текшерүүнүн жыйынтыгы

799
(жаңыланган 09:30 25.07.2019)
Текшерүү учурунда Матраимовго апасынан калган мурастын үчтөн бир бөлүгү өткөнү аныкталган.

БИШКЕК, 24-июл. — Sputnik. Экономикалык кылмыштуулукка каршы күрөшүү мамлекеттик кызматы бажы кызматынын жетекчисинин мурдагы орун басары Райымбек Матраимовдун өлкө аймагындагы мүлкүн текшерип бүттү.

2018-жылдын декабрында президенттин жылды жыйынтыктоочу маалымат жыйынында журналисттердин Матраимовдун байлыгы тууралуу көтөргөн маселесинин негизинде Башкы прокуратура 2019-жылы февралда сотко чейинки териштирүүнү баштаган.

Анын жыйынтыгында, Экономикалык кылмыштарга каршы күрөшүү кызматы 24 миллион 275 миң сом салыкты кошумча төлөткөн.

Председатель Государственной службы по борьбе с экономическими преступлениями (ГСБЭП) Бакир Таиров
© Пресс-служба президента КР / Султан Досалиев
Тактап айтканда, "Д. Т." ЖЧКсына, "ТКА" ЖЧКсына жана "Т.Т." ишканасына салык боюнча текшерүү жүргөн. Финансы полициясы ишканалардын толук аталышын жазган эмес.

Текшерүүлөрдүн жыйынтыгында жалпысынан 18 миллион 33 миң 267 сом салык кошумча төлөтүлгөн.

Ал эми чет элдик "Е.Е.S." компаниясында иштеген Матраимовдун аялы У.Т. аттуу жарандын ишмердиги боюнча 2019-жылдын май айында салык боюнча текшерүү дайындалган. Анын жыйынтыгы менен 6 миллион 241 миң 728,71 сом кошумча салык алынган. Каражаттын баары бирдиктүү депозит эсебине которулган. Учурда калган чыгымдарды кайтаруу боюнча аракеттер жүрүп жатат.

Ошол эле учурда Райымбек Матраимовдун бирдиктүү салык декларациясында өзүнө жана аялына таандык деп төмөнкү мүлктөр көрсөтүлгөн.

1. Ысык-Көл облусунда жайгашкан коттедж;

2. Lexus GX 460 үлгүсүндөгү автоунаа;

3. Матраимовдун жубайына таандык Бишкекте эки батир, Ош шаарында бир батир бар.

Андан сырткары, Матраимовго тиешелүү Бишкек менен Ош шаарларында бирден батир бар. Аны 2004-жылы сатып алган.

Ошол эле учурда Райымбек Матраимовго энесинен калган мурастын үчтөн бир бөлүгү өткөн. Бирок аны Матраимов жакын туугандарына берген.

Энесинен калган мурасы:

1. Ош шаарында жайгашкан турак үй Р.М. аттуу кишиге берилген;

2. Ош облусунда бак-дарак тигилген жер тилкеси Т.М. аттуу кишиге берилген;

3. Чүй облусунда жайгашкан турак-үй  И.М. аттуу кишиге берилген.

Экономикалык кылмыштуулукка каршы күрөшүү мамлекеттик кызматы Матраимовдордун чет жакта мал-мүлкү боюнча тийиштүү жактарга сурам жөнөтүп, жообун күтүп жатканын кошумчалады.

799
Белгилер:
текшерүү, Райымбек Матраимов, салык, коррупция
Тема боюнча
Матраимовдордун фондуна акчалар кайдан которулган. Финполдун маалыматы
Жумабеков: Матраимовдордун үй-бүлөсүнө айтылган алкышка суктангам