Өзбекстандын желеги. Архив

"Валдай" клубунун серепчиси: ЕАЭБге Өзбекстандын кириши баарына пайдалуу

113
(жаңыланган 11:09 12.11.2019)
"Валдай" эл аралык дискуссия клубунун мүчөсү Алексей Куприянов Евразиялык экономикалык биримдикке Өзбекстан мүчө болуп кирип калса, бардык курлары курчанган, тиштүү дөңгөлөгү да бошой бербеген автомобилдей болорун айтты.

Евразиялык экономикалык биримдикке (ЕАЭБге) Өзбекстандын мүчө болуп кирүү демилгесин көп создуктурбоо зарыл. Мындай пикирин Россиядагы Илимдер академиясынын Е.М.Примаков атындагы Дүйнөлүк экономика жана эл аралык мамилелер улуттук илим-изилдөө институтунун илимий кызматкери Алексей Куприянов билдирди. Ал ушул тапта Самарканд шаарында өтүп жаткан "Валдай" клубунун Х азиялык конференциясына катышууда. Серепчинин айтымында, Борбор Азиядагы кырдаалдын "кынтыксыз деңгээлине чейин" турукташуусун күтүүнүн кереги жок.

"Эч бир өлкө андай кылбайт, эч бир мамлекет экономикасын кынтыксыз абалга жеткирип алып, тышкы саясий фронтто аракетке өтпөйт. Экономикадагы жагдай тышкы саясатка жараша, бул көбүнесе ушуга байланыштуу. Мында да ошондой эле көрүнүш — Борбордук Азиядагы абалды кемчиликсиз бир деңгээлге чыгарып алып, анан кайсы бир кошумча түзүлүштөргө кирүүнү ойлоого болбойт. Кошумча структура өзү ошол кырдаалды жогорку деңгээлге көтөрүшү мүмкүн", — деди Sputnik Өзбекстанга курган маегинде Куприянов.

ЕАЭБ — Россия үчүн ири интеграциялык долбоор. Эксперттин баамында, РФ жаңы бирикмеге өз ара аракеттешүү тажрыйбасы бар экономикалардын көбүрөөк кошулушуна кызыкдар.

"Бул мурдагыдай Советтер Союзу эмес. Кандайдыр бир саясий деңгээлде СССРди кайра жаратууга ниетибиз жок, болгону ал ыдырагандан кийин кыйраган ири экономикалык базаны калыптандыргыбыз келет. Россияда биз өндүрүштүн бүтүндөй тармактарын жаап, бөлөк өлкөлөрдүн аймагында калгандарынын ордуна кайрадан тургузууга аргасыз болдук", — деп белгиледи адис.

Куприянов Өзбекстан да ошондой эле кырдаалда калганына жана азыр экономикалык кызматташуу бир топ тоскоолдуктардан улам кыйындаганына көңүл бурдурат.

"Эгер биз машинаны жапа тырмак кайрадан чогултсак, ал ишке кирип, үзүрүн берет. Кошумча кур курчануунун кажети жок, өзүбүздөгү кемерлерди тагынып жыла беребиз. Кошумча тиштүү дөңгөлөк тагып түйшүктөнбөйбүз, колдо болгондору да мындан ары бошой бербейт. Биз бирдиктүү экономикалык механизмдин майнаптуу иштеп кетишине кызыкдарбыз", - деди Куприянов.

Адис Россия менен Өзбекстандын ортосунда экономикалык жана саясий диалог абдан кызуу жүрүп жатканын, "Валдай" клубу да илимий кызматташууну жөнгө салууну максат кыларын айтат. "Бул багытта биз артта калуудабыз, бирок өзбекстандык жана россиялык эксперттердин кызматташуу механизмин жолго коерубузга үмүт артабыз. Путин менен Мирзиёев жолугушуп, баарлашууда, ал эми эки өлкөнүн окумуштуулары азырынча диалогду башташа элек".

Самарканд шаарында "Борбордук Азия жана Евразия: глобалдык башаламандыктын чакырыктарында көп тараптуу кызматташтык" темасында "Валдай" клубунун X азиялык конференциясы өтүүдө. Ага Россия, Өзбекстан, Германия, Индия, Казакстан, Кыргызстан, Кытай, Тажикстан, Филиппин, Швеция жана Япониядан эксперттер катышып жатат.

113
Белгилер:
кызматташуу, экономика, Евразиялык экономикалык биримдик, Өзбекстан
Тема боюнча
Медведев ЕАЭБдин карапайым элге кандай пайдасы тийиши керектигин айтты
Абылгазиев: ЕАЭБ өлкөлөрү бири-биринин шартын түшүнүп иш кылышы керек