Телевизор чыгаруучу завод. Архив

Ат-Башыга 10го чукул завод-фабрика куруу пландалууда

307
Логистикалык борбор курула турчу жерди инвесторлор "Нарын" эркин экономикалык аймагынан 49 жылга ижарага алышкан. Азыркы тапта инвесторлор жердин ижара акысынын 43 миллион сомго чукулун төлөшкөн.

БИШКЕК, 16-янв. — Sputnik. Нарын облусунун Ат-Башы районуна курула турчу логистикалык борбордо соодага эмес, өндүрүшкө басым жасалат. Бул тууралуу курулуштун инвестору "Ат-Башы" кыргыз-кытай эркин соода аймагы" ЖЧКсынын жетекчиси, инвестор Эмилбек Абдыкадыров маалымат жыйын учурунда билдирди.

Анын айтымында, логистикалык борборду курууга 176 гектар жер ижарага берилген. Бөлүнгөн аянттын 80 гектарына 10го чукул завод-фабрика куруу пландалууда.

"ЕАЭБге киргенден кийин биз жаңы технологияларды чыгарган завод-фабрикаларды салышыбыз керек. Мисалы, азыркы учурда Белоруссияда жогорку технологиялык 50дөй завод бар. Жок дегенде бул зонага 10го чукул завод салууну көздөп жатабыз. Мисалы, телефондун мониторун чыгара турган компания менен азыркы тапта сүйлөшүүлөр жүрүп жатат. Бул компаниянын учурда беш өлкөдө филиалы бар экен. "Бизге да ачкыла" деп жан үрөп жатабыз. Ошондой эле жашылча-жемишти эки жыл өзүндөй кылып сактаган кампа салынат. Бул боюнча англиялык компания менен сүйлөшүү болуп жатат. Эл аралык деңгээлдеги көргөзмө борборун куруу да планда бар. Ага азыртан эле түрк, белорус, казак, араб өлкөлөрүнүн өкүлдөрү акча салууга даяр экенин билдиришти", — деди Абдыкадыров.

Анын айтымында, курулуш иштеринин биринчи этабы 2020-жылдын апрель айында башталат. Ал эми логистикалык борбордун өзү толугу менен сегиз жылда аяктайт деп пландалууда.

Курулуш иштери. Архивдик сүрөт
© Пресс-служба правительства / Сабыр Аильчиев
Эске салсак, 2019-жылы Кытай Эл Республикасынын төрагасы Си Цзиньпин Кыргызстанга мамлекеттик сапары менен келип, тараптар бир топ документтерге кол койгон. Анын ичинде "Нур Строй Монтаж" ЖЧКсы жана One Lead One (HK) Trading Limited компаниясынын ортосунда соода-логистикалык борбордун курулушу жөнүндө келишимге да кол коюлган. Долбоордун сметалык баасы — 280 миллион АКШ долларын түзөт. 2019-жылдын этегинде өкмөт башчы Мухаммедкалый Абылгазиев анын пайдубалына капсула салып келген.

Бул индустриялык-соода-логистикалык борбордун инвестору — "Ат-Башы" кыргыз-кытай эркин соода аймагы" ЖЧКсы. Анын негиздөөчүлөрү Лю Инь, Эмилбек Абдыкадыров жана Ван Цзыюнь.

КРдин инвестицияларды илгерилетүү жана коргоо боюнча агенттигинин жетекчиси Шумкарбек Адилбек уулунун айтымында, логистикалык борбор курула турчу жерди инвесторлор "Нарын" эркин экономикалык аймагынан 49 жылга ижарага алышкан. Азыркы тапта инвесторлор жердин ижара акысынын 43 миллион сомго чукулун төлөшкөн.

307
Белгилер:
өндүрүш, соода, инвестор, ишкана, логистикалык борбор, Ат-Башы
Тема боюнча
Нарында ири логистикалык борбор курула баштады. Сүрөттөр
Электр станциясы. Архив

Электр энергиясына коюлган жаңы тариф 1-июлдан тарта күчүнө кирет

303
(жаңыланган 16:18 26.05.2020)
Өкмөт 27-мартта 2020-2023-жылдарга карата баа саясаты боюнча токтом кабыл алган. Ал документ 12-июнда күчүнө кирмек.

БИШКЕК, 26-май — Sputnik. Ушул жылдын 1-июлунан тарта электр энергиясына болгон жаңы баа иштей баштайт. Бул тууралуу Sputnik Кыргызстанга Отун-энергетикалык комплексин көзөмөлдөө мамлекеттик агенттигинин директорунун орун басары Миргүл Айдарова билдирди.

Анын айтымында, 27-мартта өкмөт 2020-2023-жылдарга карата баа саясаты боюнча токтом кабыл алган. Ал документ 12-июнда күчүнө кирмек.

"Биз ал датаны июнь айынын башына жылдырууга укугубуз жок. Ал токтом 1-июлдан баштап иштейт. Эсеп-фактурасы бир айга чыгат. Эгер айды экиге бөлсөк, энергетика тармагында көйгөйлөр пайда болот. Ошондуктан жаңы тариф 1-июлдан тарта киргизилет", — деди Айдарова.

Бир киловатт-саатка тарифтер төмөндөгүдөй (салыктарды эске албаганда):

  • Балдар үйлөрү үчүн — 1,58 сом (азыркысы 2,24 сом);
  • Электр кубаты менен жүргөн транспорт заряд алчу жайлар — 1,58 сом (эгер мындай жайлар ачылып калса, алар троллейбустук ишканалардын тарифи менен төлөөрү каралган);
  • Майнинг-фермалар үчүн — 2,91 сом (бул категорияга өзүнчө тариф каралган эмес).

Башка тарифтер мурдагы бойдон калат.

303
Белгилер:
электр энергиясы, тариф, Кыргызстан
Тема боюнча
Кыргызстанда электр энергиясына айрым тарифтер өзгөртүлөт
Экономика министринин мурдагы орун басары, экономист Элдар Абакиров

Абакиров: мүлктү адалдоого багытталган мыйзам ишке ашпайт

25
Экономика министринин мурдагы орун басары, экономист Элдар Абакиров мүлктү легалдаштыруу боюнча мыйзам туура эмес жол менен байыгандарга ылайыкташкан деген пикирин билдирди.
Абакиров: мүлктү адалдоого багытталган мыйзам ишке ашпайт

Өлкөдө көмүскө экономика тамырлашып кеткен. Мындан улам мыйзамсыз жол менен табылган байлыктарын легалдаштыруу боюнча жаңы кабыл алына турган мыйзам ишке ашпайт. Мындай пикирин Элдар Абакиров Sputnik Кыргызстан радиосуна маек куруп жатып билдирди.

Анын айтымында, жашыруун мүлктөрүн, капиталын ачыктоону каалагандар саналуу эле болот.

“Капиталды амнистиялоо же болбосо мүлктү легалдаштыруу боюнча мыйзам долбоору ишке ашпайт. Анткени анын баарын көзөмөл кылган система жок. Эгерде “жакынкы күндөрү жалпы декларациялоо жүргүзүлөт. Анын алкагында экономика тармагы санариптештирилип, жарандардын бардыгы текшерилет” деген коркунуч турса, кандайдыр бир натыйжа бермек. Анда айрымдар жашыруун байлыгын адалдаштырууга умтулмак. Ал эми азыр эч кандай кооптоно турган жагдай байкалбайт. Мындан тышкары, өлкөдө көмүскө экономиканын үлүшү 40-50 пайызды түзөт. Буга бир нече объективдүү жана субъективдүү себептер бар. Бир топ ишкана көмүскө иш алып барууда өзүн ыңгайлуу эле сезип жатат. Алардын кожоюндары коомчулукка капиталын ачыктоону каалабайт”, — деди Абакиров. 

Ошондой эле ал бул мыйзам иштеп кетүүсү үчүн Салык кодекси түшүнүктүү жана жеңил болушу керектигин кошумчалады.

25
Белгилер:
мыйзам, салык, декларация, Элдар Абакиров
Тема боюнча
Чиновниктер байлыгын ачыктаса, эски ишин кечирүү мыйзамы сунушталды. Чоо-жайы
Ооруканада медициналык кызматкер. Архив

Америка ДССУну каржылоодон баш тартса ким жабыркай турганы айтылды

0
(жаңыланган 17:54 26.05.2020)
Жон Хопкинс атындагы университеттин Системалуу изилдөө жана инжиниринг борборунун сайтындагы маалыматка ылайык, 26-майга карата дүйнө жүзү боюнча коронавирус жуктургандардын саны 5 515 109га жетти.

БИШКЕК, 26-май — Sputnik. АКШнын Дүйнөлүк саламаттыкты сактоо уюмун (ДССУ) каржылоодон баш тартышы Африка өлкөлөрүнө пандемия менен күрөштө терс таасирин тийгизет. Бул тууралуу ДССУнун Африкадагы өкүлү Михель Яого таянып РИА Новости жазды.

Буга чейин АКШ президенти Дональд Трамп аталган уюмдун директору Тедрос Адханомго 30 күн ичинде ДССУ  Кошмо Штаттар талап кылып жаткан реформаларды ишке ашырбаса, уюмга акча бөлүүнү токтото турганын билдирген. Ошондой эле мүчөлүктөн чыгып кетерин дагы айткан. Президенттин пикиринде, уюм коронавирус пандемиясына жетиштүү тез реакция кылган эмес.

"Азыр ушул сыяктуу төлөмдөрдөн баш тарта турган убакыт эмес. Тетиринче, тилектештик керек. Балким, өнүккөн өлкөлөр ДССУга көп муктаж эместир, бирок биздин континент үчүн уюм абдан керек. Бизде азыр узакка созулган кризисти баштан кечирип жаткан өлкөлөр бар", — деди Яо.

Анын айтымында, учурда Африка өлкөлөрүнүн саламаттык сактоо тармагына колдоо катары түшкөн каражаттын 80 пайызы ДССУдан келет. Ал эми АКШнын андагы үлүшү 20 пайызды түзөт.

"Бул бюджеттин кыскартылышы, албетте, бизге абдан эле сезилээрлик болот. АКШнын салымы биз үчүн өтө маанилүү", — деди Яо.

Ошондой эле бул көйгөй учурда коронавирус инфекциясы менен күрөшүп жаткан медиктерге дагы терс таасирин тийгизиши ыктымал. Алардан тышкары Африкада безгек, Эбола сыяктуу өлүмгө алып келген илдеттер көп.

Жон Хопкинс атындагы университеттин Системалуу изилдөө жана инжиниринг борборунун сайтындагы маалыматка ылайык, 26-майга карата дүйнө жүзү боюнча коронавирус жуктургандардын саны 5 515 109га жетти.

0
Белгилер:
пандемия, коронавирус, каржылоо, Африка, АКШ
Тема:
Кытайдагы жаңы типтеги коронавирус
Тема боюнча
ДССУ коронавируска каршы препаратты сыноону токтотту. Аны КР дагы алган
ДССУ коронавирустун экинчи толкуну болорун божомолдоду