Бишкеке жакын жайда жайгашкан автоунаа базары. Архивдик сүрөт

Бажы төлөмдөрү кымбаттаганы авторыноктогу абал кандай? Баага жоромол жана сереп

5854
(жаңыланган 18:10 27.01.2020)
2020-жылдан тарта Кыргызстан ЕАЭБге мүчө эмес өлкөлөрдөн ташып келинген автоунааларга арзан бажы төлөмдөр доору аяктаган. Серепчилердин бир даары темир тулпарлардын баасы кымбаттайт деп божомолдошсо, бир тобу арзандайт дешкен.

Азыр чындыгында абал кандай экенин тактап көрдүк. Эске салсак, Кыргызстандын авторыногу өткөн күздө дүрбөлөңгө түштү. Элдин көбү бажы төлөмдөрүнүн жаңы чендери күчүнө киргенче колундагы автоунаасын жаңыртып алууну пландап, рынокто алып-сатуу активдешти. 2019-жылдын 31-декабрында Кыргызстан Евразиялык экономикалык биримдиктин курамына кирбеген мамлекеттерден автоунаа ташууга жеңилдик берген тарифтер менен кош айтышты.

Маалы келгенче кыргызстандыктар арзан бажы төлөмдөрдүн мөөнөтү жылдырыларына ынанып турган. Бирок узартылган жок. Анткени ноябрдын аягында 2020-жылы ЕАЭБ тышындагы өлкөлөрдөн автоунааларга төлөм чени өзгөртүлбөй турганы анык болду.

Sputnik Кыргызстандын кабарчысы автомобиль сатуу менен алектенген адистер менен баарлашып, жаңы эрежелер республиканын авторыногундагы абалды кандай өзгөрткөнүн сурады. 

2003-жылы чыккан Honda Fit унаасынын баасы кандайча өзгөрдү
2003-жылы чыккан Honda Fit унаасынын баасы кандайча өзгөрдү

Мурда айдалган автокөлүктөр кымбаттадыбы?

Кыргызстандыктар баанын жогорулашы эле эмес, бажы төлөмдөрүнүн асмандап кетишине да камынган. Бул өткөн жылкы бааларга таасири тийгенин баш калаадагы автосалондордун биринин атын атагысы келбеген жетекчиси айтып берди. Бул киши ЕАЭБге кирген да, кирбеген да мамлекеттерден да ташып келинген, мурда айдалган автокөлүктөрдү сатат.

"Соода менен алектенгендердин бир катарлары толтура автоунаа сатып алып, былтыр күзүндө жасалма түрдө бааны көтөрүп, бажы төлөмдөрү жогоруласа кымбаттайт деп ойлошкон. Бирок жаңы чендер бир өңчөй болбоду. Январда баа көтөрүлгөн да, түшкөн да жок", — деди ишкер.

Анын айтымында, КыргызстандаToyota, Lexus, Mercedes жана BMW автоунаалары эң өтүмдүү. Алардын  жаңылары да, эскилери да жакшы сатылат.

Autotrade.kg компаниясынын директору Асат Нурматов да январда баа былтыркы бойдон турганына токтолду.

"Баа акырындап төмөндөй баштады. Рыноктогу күзгү дүрбөлөңгө чейин көп бар. Жаңы бажы төлөмдөрү менен документтер толтурула турган учур февралга туура келет. Тагыраагы, буюртмалар ушул айда келип калат. Азыр кишилер карап, ойлонуп, бири-бирине көз салып жаткан чагы... Анан калса, бажы ченемдердин жаңы эсебин ар бир киши биле бербейт, ал эми тарифтер боюнча айрым маселелер дагы такталууга тийиш. Маселен, электр менен жүрүүчү автоунаалар үчүн төлөмдөр кандай болору белгисиз", — деп белгилейт Нурматов.

Биздин жарандарга эки жол бар экенин эскертели. Биринчисинде заводдон чыкканына жети жылдан ашпаган жаңы автоунааларды ташып келүүгө жол берет. Бирок бул варианттан пайдалануу үчүн бажы кызматына бир нече документти көрсөтүүгө тийиш. Жөнөкөйлөтүлгөн вариантты да тандоого болот, бирок андай учурда бажылык жол-жоболоштуруу кымбатка түшөт.

Башка серепчилер мындай жагдай Кыргызстанга акыры автопаркты жаңылоого жардам берерин боолголойт. Нурматовдун пикиринде, жаңы автомашиналарды жол-жоболоштуруу 2014-жылдан мурда чыккан (эскирээк) автомобилдердин бажы төлөмдөрүнө караганда анчалык кымбаттаган жок.

"Мисал келтирейин. 2015-жылы чыккан Toyota Camry 55 үлгүсүндөгү автокөлүктү буюртмага жаңы тарифтик торчо боюнча 12-13 миң долларга алып келип беришет. Былтыр ошол эле автоунааны кайра сатуу ниети менен ушундай эле баага алып келишчү. Ошондуктан базарда ага 16 миң доллар сурашат", — деп түшүндүрөт ал.

Нурматов эми ишкерлер жаңыраак темир тулпарларды ташып келе башташарын кошумчалады.

"Ооба, бажылык жол-жоболоштуруу кымбаттады, бирок бул рыноктун күнү бүттү дегендик эмес. Кыргызстанга эски автомобилдерди ташуу элге пайдасыз. 2008-2009-жылдары чыккан автоунааларга коюлган чендер көтөрүлдү. Бирок кыргызстандыктардын 2014-жылы жана андан бери чыккан темир тулпарларды ташуу мүмкүнчүлүгү али да бар", — деп жыйынтыктайт ишкер.

AutoExport компаниясынын директору Максим Беришев бөлөк пикирде.

"Эгер автоунааны арзаныраак ыкма менен жол-жоболоштургуңуз келсе, анда дал ошол акчага сатып алынганын далилдөөгө тийишсиз. Бажыкана документтерди кабыл алар-албасын да алдын ала билүү мүмкүн эмес.  Бир вариантка үмүттөнүп, натыйжада башка жагдайга "түшүп калышың" мүмкүн", — деп белгиледи ал.

Жергиликтүү авторыноктун табиятын да эстен чыгарбоо зарыл. Ишкер белгилегендей, 2014-жылдан берки автокөлүктөрдү эл көп сатып албайт, алар Кыргызстандагы темир тулпарлардын азыраагын гана түзөт.

"Жаңы автоунаа алгандар жок эмес, бирок эскилерине суроо-талап көп. 2019-жылы АКШдан заводдон чыкканына 10-11 жыл болгон темир тулпарларды алып келишчү. Toyota 4Runner, Toyota Sequoia, Lexus RX 310, Toyota Highlander сыяктууларга талап күч эле", — дейт Беришев. 

2004-жылы чыккан Subaru Forester унаасынын баасы кандайча өзгөрдү
2004-жылы чыккан Subaru Forester унаасынын баасы кандайча өзгөрдү

Жаңы автоунаалардын баасы эмне болот?

Жеңилдетилген мөөнөттүн бүтүшү чет элдик үлгүдөгү автоунаалардын расмий импортчуларынын ишине таасир этти. Жаңы эрежелер автосалондорго түздөн-түз таасир эткенин Кыргызстандагы BMW расмий импортеру болгон "Эстокада" автоборборунун сатуу бөлүмүнүн жетекчиси Нурсултан Даиров айтып берди.

Ошентсе да, анын айтымында, темир тулпарлардын чоң партиясын салонго жаңы жылга чейин эле алып келишкен. Ошондуктан, кыргызстандыктар жагдайды жазында даана байкайт.

"2020-жылдын тарифтери боюнча жол-жоболоштурулган биринчи автоунаалар Кыргызстанга май айында гана келет. Алар орточо эсеп менен алганда 7 пайызга кымбатташы күтүлөт. Айдала электерин сатып алууга шарты бар кардарлар кандай болсо да, баалардын өсүшүнө карабастан алышат", — деп билдирет Даиров.

Андан тышкары, жергиликтүү автоборбор атаандаштыкка дале жөндөмдүү бойдон. Ал бөлөк өлкөлөргө караганда Кыргызстанда жаңы BMW сатып алуу пайдалуу экенин кошумчалады ал. Биздин жарандар айдала элек автоунааларга дагы да болсо кызыгат. Январь соода дээрлик болбогон, "жымжырт ай" болуп саналат.

"Талап дайым бар, бирок жайындагыдай күч эмес. Бирок азыркы январь айын мурдагыларга салыштырсак, кардарлардын активдүүлүгү өзгөргөн жок", — деп билдирет автоборбордун өкүлү.

Кымбаттоолор Россияда чогултулган машиналарга таасир этпей турганын Toyota борбордун сатуу бөлүмүнүн менеджери Александр Калинин белгиледи.

"РФте чогултулган автомобилдер мурдагыдай баада. Мисалга, эл сүйгөн жаңы Toyota Camry автоунаасынын эң аз комплектациясы орточо 25 миң доллар турат. Калган үлгүлөрү (мисалы, Land Cruiser, Hilux) кымбаттады. Эгер эң көп сатылган топтомдогу Land Cruiser 200 үлгүсүндөгүсү декабрда 90 миң доллардын тегерегинде турса, азыр алдын ала буюртма менен 92 миң долларга келет", — деп түшүндүрөт Калинин.

Айтымында, кыргызстандыктардын көпчүлүгү былтыр эле автомобиль сатып алышкан.

"Бир тобу жаңы жылга дейре автокөлүк сатып алууга үлгүрүү үчүн карызга да батышты. Бул да суроо-талапка таасир этпей койгон жок, 2019-жылдын аягына салыштырмалуу 2020-жылдын башында кардарлардын агымы азайды. Былтыр жыл аяктаганча ташып келинген темир тулпарлардын басымдуу бөлүгүн сатып бүттүк", — дейт адис. 

2006-жылы чыккан Toyota Camry унаасынын баасы кандайча өзгөргөн
2006-жылы чыккан Toyota Camry унаасынын баасы кандайча өзгөргөн

Авторыноктун 2020-жылдагы абалына жасалган божомол

Калинин көктөм келгенде автомобилдик рынок кадимки калыбына түшөт деп эсептейт.  Анын пикиринде, кыргызстандыктар жаңы автоунааларды да, айдалгандарын да сатып ала берет.

"Жаздын аягында салондо кардарлардын саны артат деп турабыз. Ал убакта Кыргызстанга жеңилдик маалында ташып келинген автокөлүктөрдүн бөлүгү сатылып бүтүп калат. Ошентсе да, өлкөгө орточо баадагы – 4,5 миңден 7 миң долларга чейинки автоунаалар  жетишпейт", — деп белгиледи ал.

Россиядан дурус баада автоунаа ташыгысы келгендер азыртан ойлоно бергени оң. Бул туурасында Silk Road Auto компаниясынын менеджери Дмитрий Жаданов билдирди.

"Россиялык автоунаа баасы кыргызстандыктарды кызыктырат, анткени, РФтен базар баасынан төмөн ташып келүүгө болот. Мейли, бул жогорку же орто класстагысы болсун,  рыноктогу тандоо баары бир жетишерлик. Россиядан автокөлүк алып келем дегендер үчүн азыр эң ыңгайлуу учур, кымбаттап кете электе, ушул мезгилдери жетишип калышы керек", — деп кеңеш берди адис.

Беришевдин пикиринде, кырдаалга таасир этчү себептер арбын, андыктан, жагдайдын мындан аркы абалы кандай өнүгөрүн болжолдоо жеңил эмес.

"Кыргызстандын рыногу анча кең эмес, чакан факторлордун таасири да сезилерлик болот. Менимче, орто сегменттеги темир тулпарлардын баасы азыркыдай эле деңгээлде калат. Lexus GX жана Toyota 4Runner кымбатташы ыктымал", — деп кошумчалады ал.

Асат Нурматов башка бир жоромолун ортого салды. Анын пикиринде, февралдын башында баа арзандай баштайт, баанын төмөндөшү базардагы автоунаалардын көптүгүнөн улам да болушу мүмкүн.

"Ишкерлер январда сатып алынган автоунааларды кайра сатууга ниеттенген, бирок алардын оюндагыдай болгон жок. Мисалы, жаңы автоунааларды жол-жоболоштуруу акысы көпчүлүк күткөндөй деңгээлге чыккан жок. Былтыр ташып келингендердин баасы түшөт деп боолголоп турам, анткени алар жаңы алып келген автокөлүктөр менен атаандаша албайт", — деп түшүндүрдү Нурматов.

Автосалондун өз ысымын атагысы келбеген жетекчиси да дал ушундай ойдо. 

2003-жылы чыккан Toyota Land Cruiser Prado унаасынын баасы кандайча өзгөрдү
2003-жылы чыккан Toyota Land Cruiser Prado унаасынын баасы кандайча өзгөрдү

"Былтыр күздө темир тулпарларды өтө көп санда ташып келген сатуучулар бааны көтөрүп салды. Жасалма түрдө кымбаттатылган автоунааны ким сатып алгысы келсин? Ошондон улам көбү өтпөй турат. Бир-эки ай өтүп-өтпөй арзандайт", — деп билдирди ал.

Адис авторыноктогу ушундай эле кырдаал бир нече жыл мурда болгонун эске салды. Анда да кымбат автокөлүктөрдүн баасы кескин төмөндөп, андан кийин Кыргызстанда автомобиль наркы жөнгө салынган.

Айтмакчы, биз өткөндө  Кыргызстанга сол рулдуу болуп кирген унаалар кантип оң рулдууга айланып калганы боюнча материал даярдаганбыз.

5854
Белгилер:
анализ, импорт, автоунаа, бажы төлөмдөрү, бажы, Евразиялык экономикалык биримдик, Кыргызстан
Тема боюнча
2020-жылдан тарта оң рулдуу автолор такси катары колдонулбай калат. ЖК сунушу
Кыргызстанга сырттан келген унаалар кантип текшерилет? Видео
Аэропорт Манас. Архивдик сүрөт

"Манас" эл аралык аэропорту 12 миллион сомго тендер жарыялады

94
(жаңыланган 09:12 13.07.2020)
Тендер аркылуу алынган каражаттарды пандемия учурунда аэропорт кызматкерлери, дарыгерлер колдонот, алар шайкештик сертификаты менен болушу керек.

БИШКЕК, 13-июл. — Sputnik. "Манас" эл аралык аэропорту 12 миллион сомго тендер жарыялады. Бул тууралуу маалымат Мамлекеттик сатып алуулар боюнча порталга чыкты.

Ага ылайык, ачык акционердик коом ири суммадагы акчага коргонуучу каражаттарды алат. Жеңүүчү болгон компания шайкештик сертификаты бар вирустан коргоочу 8000 даана комбинезонду бет кап, кол кап, көз айнек жана баштыгы менен камсыздашы керек.

Өкмөт: беш күндөн кийин 13 Тез жардам автоунаасы жана 17 ИВЛ-аппарат алып келинет

Тендер пандемия учурунда аэропорт кызматкерлерин, дарыгерлерди жугуштуу илдеттен сактоо максатында жарыяланган.

Өлкө аймагындагы соңку кабарлар менен биздин Telegram-каналдан таанышып туруңуз.

94
Белгилер:
Кыргызстан, "Манас" эл аралык аэропорту, тендер
Тема боюнча
БШК 21 млн сомго тендер жарыялады. Акча эмнеге жумшалат?
Өкмөт: беш күндөн кийин 13 тез жардам унаасы жана 17 ИВЛ-аппарат алып келинет
Камбар-Ата-2 ГЭСинде оңдоо иштери жүрөт. Ири суммага тендер жарыяланды
ЕАЭБ мамлекеттеринин президенттери. Архивдик сүрөт

ЕЭК Кыргызстан, Казакстан жана ЕАЭБ ортосундагы көйгөйдү кантип чечет?

268
(жаңыланган 16:00 12.07.2020)
Адатта Кытайдан келген көмүскө импорт Россияга Кыргызстан жана Казакстан аркылуу кирип, бул учурда алар бажы төлөмдөрүн кыйгап өтөт деп эсептейт серепчи.

Мария Науменко

Евразиялык экономикалык комиссия бул аптада өткөн жыйынында ЕАЭБ чек аралары аркылуу товар алып өтүүдөгү талаш маселелерди чечүү үчүн ыкчам комитет түздү.

Аталган биримдикке мүчө-өлкөлөр ортосундагы пикир келишпестиктерди чечүүгө мезгил жеткенин белгилешти кеңешменин катышуучулары. Атасак, ЕАЭБ ичиндеги чек араларда жүктүн көпкө текшерилиши, Россияга Беларусь менен Казакстан аркылуу санкциялык товарлардын реэкспорту жана Кытайдан келген көмүскө импорт өңдүү маселелер бар. Кайсы инструменттер бул көйгөйлөрдү чечүүгө көмөкчү болорун, аталган маселелердин келип чыгышына эмне себеп экенин Sputnik талдап көрдү.

"Жол картасы" жана жаңы комитет

Бул маселелер биримдик ичиндеги чек араларда бир өлкө аркылуу бөлөк өлкөгө өткөрүлчү жүктөрдү көзөмөлдөө иш-чараларынын киргизилгенине байланыштуу экенин билдирет Евразиялык экономикалык комиссиянын бажы кызматташтыгы боюнча министри Олег Панкратов.

Назаралиев: ЕАЭБ өлкөлөрү ортосунда бирдиктүү биржа рыногу түзүлөт

"Бирдиктүү бажы жана экономикалык мейкиндикке мындай көзөмөл туура келбей турганын баарыбыз түшүнөбүз, бирок андай чараны колдонуунун жүйөлүү себептери бар (Кеп РФ тарабынан Россияга киргизүүгө тыюу салынган продукциялардын камтылып-камтылбаганын текшерүү жөнүндө болушу мүмкүн — ред.)", — деп кошумчалайт ЕЭК мүчөсү.

Азыр биримдикке кирген өлкөлөр ЕАЭБ ичинде жүктөрдү алып өтүүдөгү пикир келишпестиктерди чечүү боюнча "жол картасын" иштеп чыгууда. ЕЭКтеги ыкчам жөнгө салуу чараларына "санкциялык" товарларды идентификациялоо, навигациялык пломба колдонуу, үчүнчү өлкөлөрдөн ташылган импортту тескөө жана ЕАЭБ мамлекеттеринин ортосундагы маалымат алмашуу маселелери кирери айтылат комиссиянын пресс-релизинде.

"Түзүлгөн кырдаал ички сооданын азайышына жана чыңалуунун жаралышына алып келерин түшүнгөнбүз. Ошондуктан комиссияда жогорку деңгээлдеги топту (ыкчам комитет – ред.) түзүү чечимин кабыл алышты. Ал талаш жагдайларды жөнгө салуу үчүн "жол картасын" бачым түзүп чыгат", — дейт Панкратов. "Жол картасы" мамлекеттердин кызыкчылыктарынын балансын табууга мүмкүнчүлүк берерин белгилейт ал.

"Бул чаралар чектөөлөрдү койгон өлкөлөр өз рыногуна андай товарларды киргизүүгө уруксат берүүгө кызыкдар болгудай тартипте түзүлмөкчү. Ал эми бул рынокко товар ташыган өлкөлөр өз аймагында бардык товарлардын "ак" экенин, бажы талаптарына жараша өткөрүлөрүн айгинелеген заманбап технологияларды болушунча тез киргизүүнү каалашты", — деп түшүндүрдү ЕЭК коллегиясынын мүчөсү.

Бакетаев: ЕАЭБге мүчө өлкө жетекчилери өз амбициясын эмес элди ойлошу керек

Министрдин айтымында, бул технологиялар ЕАЭБ бюджетине салык төлөмдөрүн толук төгүүнү жана өлкөлөрдүн бюджеттерине болгон салык милдеттенмелерин аткарууну камсыз кылат.

Аталган ыкчам комитетти Евразиялык экономикалык комиссиянын төрагасы Михаил Мясникович жетектей турганы болжонууда. Ошону менен бирге эле жумушчу топко комиссиянын дагы беш министри: Гегам Варданян, Тимур Жаксылыков, Олег Панкратов, Виктор Назаренко жана Андрей Слепнев кирет.

Андан тышкары, комитетке ар бир өлкөдөн мамлекеттик бийликтин ички соода, бажы тармагы жана фискалдык төгүмдөргө жооптуу үч-төрт өкүлү кирмекчи. Квартал сайын жаңы орган өз иши тууралуу ЕЭК кеңешинде, зарыл учурда Жогорку экономикалык кеңеште отчет берет. Мындай чаралардан майнап чыгарына ынанышат серепчилер.

"Бир жагынан өлкөлөр эркин сооданын бирдиктүү аймагы болушуна кызыкдар. Баары бирдиктүү жалпы рынок түзөт. Бирок ошону менен бирге эле, албетте, мамлекеттер өз өндүрүшчүсүн коргоого далалат кылат. Талаш-тартыштын баары ушундан улам келип чыгууда", — деп эсептейт Россия Илимдер академиясынын ИМЭМО Постсоветтик иликтөөлөр борборунун улук илимий кызматкери Станислав Притчин.

Ал Кыргызстан менен Казакстандын ортосундагы айыл чарба продукциялары боюнча көйгөйлөрдү мисал келтирди.

"Кыргызстандык товарлардын эң жакынкы Казакстан рыногуна чыгарууга белгилүү бир чектөөлөр бар. Казак бийлиги өз өндүрүшчүсүн коргоого аракет кылып, айрым кыргызстандык товарларды сатууга тыюу салат", — дейт серепчи.

Айтымында, ыкчам комитетти түзүү — "ортодогу келишпестиктерди жое турган кадам". ЕАЭБ чек араларындагы көйгөйлөрдүн бүт топтому биримдиктин өтө тез өнүгүшүнөн улам келип чыккан деп эсептейт Станислав Притчин.

"Эгер Евразиялык экономикалык биримдик түптөлгөндөн берки азыркы интеграциялык баскычына чейинки жолду салыштырсак, Европа биримдиги бул деңгээлге жетүүгө ондогон жыл сарптаган. Алдыга озгон график менен бараткандыктан, өсүштүн да кыйынчылыктары болбой койбойт", — деп боолголойт эксперт.

Ички соода-сатыктагы көйгөйдү жоюу. ЕЭК бир катар чараларды сунуштады

Бул көйгөйлөрдү жоюу маселеси ЕАЭБдин 2025-жылга чейинки өнүгүү стратегиясынын кабыл алуу зарылдыгынан улам да пайда болду. Документ 19-майда эле Жогорку Евразиялык экономикалык кеңештин жыйынында эле кабыл алынмак, бирок ЕАЭБге мүчө-өлкөлөрдүн президенттери ал толукталууга тийиштигин белгилешкен.

"Талаш жагдайларга тушуктурган көйгөйлөрдү чечүү стратегияда камтылган. Ошондуктан жумушчу топ 1-3 жылга болжонгон кыска мөөнөттүү иш-чараларга басым жасамакчы", — деп белгилейт министр ЕЭК Панкратов.

Электрондук чип коррупциялык тобокелдиктерди азайтат

Ыкчам комитеттин биринчи кезектеги милдети — дал маалында транспорттук каражаттардын орду жана кыймылына көз салган заманбап навигациялык пломбаларды киргизүү экенин белгилейт ЕЭК мүчөсү Олег Панкратов.

"Пломбалар коррупциялык тобокелдиктерди төмөндөтүүгө мүмкүндүк берет. Ошондой эле алар мамлекеттик көзөмөлдөөчү структуралар менен жүк ташуучулар бет келген учурларды да азайтат. Бул мамлекеттик фискалдык органдарга товар агымдарынын баарын онлайн режимде көз салып турууга жол ачат. Биринчи баскычта бул көп тобокел жараткан товардык агымдарга пайдаланыларын болжоп турабыз", — деп түшүндүрөт министр.

Эксперттик чөйрөдөгүлөр навигациялык пломбалар биримдикке мүчө-мамлекеттердин ортосундагы талаш маселелердин бир бөлүгүн чече аларына ынанышат.

Мигранттар которгон акчанын көлөмү май айында кескин өстү

"Азыр товарга коштомо кагазы гана бар, ал кагаз менен анын ташуу багытына көз салууга мүмкүн эмес", — деп белгилейт Притчин.

Пикир келишпестиктерди жоюуга транспорттук компаниялар үчүн мыйзам чыгаруу системасынын ачыктыгы жардамга келерин айтат саясат таануучу Дмитрий Болкунец.

"Түзөтүүлөрдү улам киргизе беришет, ал эми жүк ташуучулар алардан кабардар болбой калышы ыктымал. Бул көйгөй жаратып, мыйзам бузууга түртөт", — деген ойдо адис.

Анын пикиринде, өтө талаштуу учурларларда өлкөлөр Евразиялык экономикалык биримдиктин сотуна кайрылуу мүмкүнчүлүгүнө ээ болууга тийиш.

"Евразиялык биримдиктин сотуна анын чечимдери сөзсүз аткарылууга тийиш болгудай ыйгарым укуктарды берүү зарыл. Азыр анын чечимдери сунуш гана иретинде. Бул – мындай талаш маселелерди чечүүдөгү соңку инструменттердин бири", — дейт Болкунец.

Санкция жана үчүнчү өлкөлөрдөн келген кооптуу товарлар

Азыр биримдиктин рыногу үчүнчү өлкөлөрдөн ташылган кооптуу товарлардан толук түрдө корголбогонун ЕЭКтин техникалык жөнгө салуу боюнча министри Виктор Назаренко билдирген. Себеби көп учурда чет өлкөлүк өндүрүшчүгө сериялык тастыктама негизсиз эле карматылат.

"Товардын ылайык келишин баалоо боюнча органдар жана текшерүүчү лабораториялар бар. Алар процедураларды туура эмес жүргүзүп, натыйжада негизсиз документтер берилет. Комиссияны айрыкча узак мөөнөткө – беш жылга берилген сериялык сертификаттар тынчсыздандырат", — дейт Назаренко.

ЕАЭБ өлкөлөрү кооптуу товарларга каршы төмөнкүчө күрөш жүргүзөрү күтүлөт. Өндүрүмдүн төп келишин баалоого өндүрүшчүнүн өкүлү эмес, өзү гана заявка тапшыра алат. Мындан сырткары, биримдикке мүчө-өлкөдө өндүрүшчүнүн ыйгарым өкүлү сөзсүз болууга тийиш. Ал өндүрүмдүн биримдиктин техникалык регламенттеринин талаптарына жооп беришине жоопкерчилик алат.

Жыл башынан бери мамлекеттик карызды төлөөгө канча акча жумшалды

Россияга Евробиримдиктен санкцияланган өндүрүмдөрдү ташуу да чечилбей келе жаткан көйгөйлөрдөн. ЕАЭБде орток бажы зонасы бар. Россиялык рынокко европалык өндүрүмдөрдү ташууга коюлган чектөөлөргө карабай, ЕАЭБдин аймагына келген товарлардын баары эч тоскоолсуз айлана алат.

"Бул мүмкүнчүлүктү беларустук жана казакстандык ишкерлердин баары кызуу пайдаланышкан. Баштапкы багыты Казакстан же Беларусь деп көрсөтүлгөнү менен алар аягында Россиянын рыногуна чыгарылган. Кытайдан товар ташууда деле көйгөй ушул. Адатта КЭРден келген көмүскө импорт Казакстан жана Кыргызстан аркылуу бажы төгүмдөрүн кыйгап келип Россияга түшөт", — деп эсептейт Притчин.

Ушул тапта РФ рыногуна "санкциялык" ташууларды токтотуу үчүн Москвадагы транспорттук компаниялардын жоопкерчилигин күчөтүү маселеси каралууда.

268
Белгилер:
соода, товар, документ, көйгөй, Казакстан, Кыргызстан, ЕЭК, Евразиялык экономикалык биримдик
Тема боюнча
ЕЭК жалпы электроэнергетика рыногун түзүү боюнча иш-чаралардын жол картасын жактырды
Тест-системалар. Архивдик сүрөт

Россия гумжардам катары Кыргызстанга 100 миңден ашык тест-система берди

0
(жаңыланган 00:03 14.07.2020)
Саламаттыкты сактоо министрлиги кыргыз өкмөтүнүн атынан Россия Федерациясына жана Роспотребнадзорго ыраазычылык билдирди.

БИШКЕК, 13-июл. — Sputnik. Коронавирус инфекциясына каршы күрөштүн алкагында Россиядан Кыргызстанга гуманитардык жардам келди. Бул туурасында өкмөттүн маалымат кызматы билдирди.

Анда COVID-19ду аныктоочу тест-системалардын бир нече партиясы берилгени айтылат.

"Жалпысынан жардам иретинде 80 720 изилдөө жүргүзүү үчүн 820 ПЦР тест-системасынын комплектиси, 24 000 изилдөө үчүн толук эмес 480 топтом келди", — деп жазылат маалыматта.

Роспотребнадзордун жетекчиси кыргыз медиктеринин кесипкөйлүгүнө баа берди

Саламаттыкты сактоо министрлиги кыргыз өкмөтүнүн атынан Россия Федерациясына жана Керектөөчүлөрдүн укуктарын коргоо чөйрөсүндөгү көзөмөл боюнча федералдык кызматына көмөктөшүүсү үчүн ыраазычылык билдирип, коронавирус менен мындан аркы күрөшүүдө жемиштүү кызматташууга ишеним артты.

0
Белгилер:
аныктоо, тест, гуманитардык жардам, Россия
Тема:
Коронавируска байланыштуу Кыргызстандагы кырдаал
Тема боюнча
Ферганадан Баткенге гуманитардык жардам келди
Кыргызстанга Кытайдан 500 кычкылтек концентратору алып келинди. Сүрөт