Улуттук банктын имараты. Архив

Доллар дүйнө боюнча арзандап жатса, Кыргызстанда эмнеге кымбаттоодо?

665
(жаңыланган 15:58 19.11.2020)
Бул жумада доллар бир катар мамлекеттерде, анын ичинде Россияда дээрлик 1 сомго арзандады. Ал эми Кыргызстанда жума соңунан бери чет элдик валюта 84,9 сом бойдон кармалып турат.

БИШКЕК, 19-ноя. — Sputnik. Кыргызстандагы доллардын баасына финансы рыногунун катышуучуларынын күтүүсү жана сезондук фактор басым жасоодо. Бул тууралуу Улуттук банктан кабарлашты.

Sputnik агенттиги өлкөдөгү башкы банкка "дүйнөдө доллардын баасы турукташып, төмөндөп бара жатат. Ал эми Кыргызстанда өскөндөн өсүүдө (84,9 сом). Мунун себеби эмнеде" деген суроо узаткан.

Улуттук банк чындап эле ноябрдын башынан тарта доллардын баасы дүйнөлүк резервдик валютага жана өнүгүп жаткан мамлекеттердин валютасына карата арзандап жатканын маалымдады.

"Анткен менен COVID-19 пандемиясына байланыштуу киргизилген чектөөлөргө байланыштуу эл аралык финансы рыногунда белгисиздик бар. Мындан сырткары, ички валюталык рыноктун өзгөчөлүгүн, сезондук фактор, ошондой эле финансы рыногунун катышуучуларынын күтүүсүн эске алганда акыркы мезгилде чет элдик валютага болгон суроо-талап өскөн", — деп айтылат маалыматта.

Улуттук банк кырдаалды жөнгө салуу үчүн ноябрда 67,6 миллион доллар саткан. Анын 16,9 миллиону — нак акча.

"Бүгүнкү күндө валюта рыногундагы абал туруктуу. Финансы-кредиттик мекемелерде чет элдик валютанын кору жетиштүү. Улуттук банк ички жана тышкы рыноктогу абалга көз салып турат, керек учурда тийиштүү чараларды көрөт. Эгер финансы-кредиттик мекемелерде эреже бузулганы аныкталса, Кыргызстандын мыйзамдарына ылайык чара көрүлөт", — дешти башкы банктан.

Белгилей кетсек, мисалга, Россияда дүйшөмбү күнү доллар 0,39 рублга (77 рубль), ал эми евро 0,33 рублга (91,25) арзандаган. Россиялык валюта дагы деле күчтөнүп жатат. Бүгүн, 19-ноябрда, Бишкек убактысы боюнча 14:27ге карата доллар 76,42 рубль, евро 90,44 рубль болду.

665
Белгилер:
баа, доллар, Улуттук банк, Россия, Кыргызстан
Тема боюнча
Улуттук банк доллар курсун ооздуктоо үчүн 3 күн катары менен интервенция жасады
Куруу иштери. Архивдик сүрөт

Баткенде фитосанитардык лабораториянын курулушу башталды

54
(жаңыланган 12:04 24.11.2020)
Имаратты куруунун сметалык баасы 10 миллион 650 миң сомду түзөт. Курулуш иштери 2021-жылдын апрель айында бүтө турганы пландалууда.

БИШКЕК, 24-ноя. — Sputnik. Баткен шаарында өсүмдүктөрдүн карантиндик лабораториясын куруу үчүн капсула салынды. Бул тууралуу Айыл чарба, тамак-аш өнөр жайы жана мелиорация министрлигинен билдиришти.

Иш-чарага министр Тилек Токтогазиев жана Баткен облусунун ыйгарым укуктуу өкүлү Жаныбек Жалалов катышты.

"Бул лаборатория зыяндуу организмдерди аныктоого, товар өндүрүүгө түздөн-түз таасир этиши мүмкүн болгон оорулардын өсүшүн жана жайылышын алдын алууга мүмкүндүк берет. Лаборатория ата мекендик жана импорттук материалдардын үлгүлөрүн экспертизадан өткөрөт. Бул ишкерлердин жүгүн бир топ жеңилдетет, анткени азыр бардык продукциялар Ош шаарына экспертизага жөнөтүлүшү керек болуп турат", — деди Токтогазиев.

Имаратты куруунун сметалык баасы 10 миллион 650 миң сомду түзөт. Курулуш иштери 2021-жылдын апрель айында бүтөт деп пландалууда.

Жаңы имарат лабораториялык бөлмөлөрдү, окуу бөлмөлөрүн жана жумушчу бөлмөлөрдү камтыйт.

Бүгүнкү күндө республика боюнча Бишкек, Ош шаарларында, Талас, Ысык-Көл облустарында төрт лаборатория бар. Нарын облусунда лаборатория пайдаланууга жаңыдан берилүүдө. Ал эми Жалал-Абад облусуна фитосанитардык лабораторияны 2021-жылы куруу пландалууда.

54
Белгилер:
курулуш, лаборатория, Баткен, Кыргызстан
Тема боюнча
ДССУ өлкө лабораторияларына мите куртту аныктаган микроскопторду берди
Бишкектин базарларында өтө кооптуу ооруларга акысыз тест өткөрүлө баштады
Финансы полициясынын төрагасы Сыймык Жапыкеев. Архивдик сүрөт

Жапыкеев: бизнести кысымга алган Финполдун кызматкерлерине катуу чара көрүлөт

247
(жаңыланган 10:16 24.11.2020)
Финполдун төрагасы кызматкердин негизги милдети бизнести коргоо жана мамлекеттин экономикалык кызыкчылыктарын камсыз кылуу экенин белгилеген.

БИШКЕК, 24-ноя. — Sputnik. Финансы полициясынын жетекчилиги өз ишинде тажрыйбасыздыгын көрсөткөн кызматкерлерге карата катаал чараларды колдонот. Бул туурасында аталган органдын төрагасы Сыймык Жапыкеев ыкчам кеңешменин жүрүшүндө билдирген.

Ал Финполдун негизги милдети бизнести коргоо жана мамлекеттин экономикалык кызыкчылыктарын камсыз кылуу экенин белгиледи.

"Кара ниет, коррупциялашкан аткаминерлердин бизнеске кысым көрсөткөн факторлорун жок кылуу керек. Фискалдык органдардын ашыкча активдүүлүгү мамлекеттин ишкердик климатына ушундай оор мезгилде тоскоол болууда. Финансы полициясы негизсиз куугунтуктоо фактыларын кылдат тергеш керек. Инвестор үчүн эң башкысы — бийликтин чынчылдыгы жана калыстыгы", — деди Жапыкеев.

Ошондой эле ал эгерде кызматкерлеринин мыйзамсыз жүрүм-туруму же бизнеске кысым көрсөткөндүгү жөнүндө маалымат жетип калса, жумуштан бошотууга чейинки эң катаал чаралар көрүлөрүн эскерткен.

Муну менен бирге жетекчи бөлүм башчыларга элди жана ишкерлерди үзгүлтүксүз кабыл алып көйгөйүн угуу тапшырмасын бергени айтылат.

247
Белгилер:
кызматкер, финансы полициясы, Сыймык Жапыкеев
Тема боюнча
23 млн. доллар... Финпол кылмыштуу кирешени адалдаган схеманы аныктады
Сыймык Жапыкеев: Финпол ишкерлер менен ачык диалогго даяр
Жогорку Кеңештин депутаты Өмүрбек Текебаев. Архив

Сот Текебаев эмнеге депутаттык мандатынан ажырап жатканын түшүндүрдү

0
(жаңыланган 16:01 24.11.2020)
Сот Текебаевге мандатын кайтарып берүү боюнча Борбордук шайлоо комиссиясынын чыгарган токтомун жараксыз деп тапкан.

БИШКЕК, 24-ноя. — Sputnik. Бишкек шаардык административдик соту Жогорку Кеңештин депутаты Өмүрбек Текебаевди мандатынан ажыратуу боюнча чыгарган чечимине түшүндүрмө берди.

Анда сот кечээ, 23-ноябрда, Текебаевге мандатын кайтарып берүү боюнча Борбордук шайлоо комиссиясынын чыгарган токтомун жараксыз деп тапканы айтылат. БШК өзүнүн токтому менен "КР президентин жана Жогорку Кеңештин депутаттарын шайлоо жөнүндө" конституциялык мыйзамды бузганы белгиленет.

Аталган токтомдо жазылгандай, 2017-жылы Текебаевге карата соттун айыптоо өкүмү чыкканына байланыштуу анын депутаттык укуктары мөөнөтүнөн мурда токтотулуп, мандаты партиянын кийинки тизмесинде турган талапкерге берилген. Бирок 2019-жылы Текебаевге чыккан өкүм Жогорку сот тарабынан жокко чыгарылып, жаңы жагдайларга байланыштуу иш кайра кароого жөнөтүлгөндүктөн БШК мандатын кайтарып берген.

Ошондой эле Текебаев мандат алышы үчүн Жогорку Кеңештин бир депутаты кызматын тапшырганы кошумчаланган.

"Деген менен "КР президентин жана Жогорку Кеңешти шайлоо жөнүндө" конституциялык мыйзамдын 5-беренесинин 3-бөлүгүндө депутат мөөнөтүнөн мурда кызматтан кетсе, анын ордуна партиянын кийинки тизмесиндеги адам мандат алышы керек. Ал эми Өмүрбек Текебаев андан кийинки сапта турган эмес. Дал ушундай мыйзам бузуу аныкталганы үчүн сот БШКнын токтомун жокко чыгарды", — деп айтылат маалыматта.

Буга чейин активист Темирлан Ормуков саясатчы мыйзамсыз түрдө мандатын кайтарып алганын айтып сотко кайрылган.

Өмүрбек Текебаев "Коррупция" беренеси боюнча соттолгонунан улам ажыраган мандатын кайтарып алуу боюнча арызын берген. Буга ага карата чыккан өкүм жокко чыгарылып, ишти кайра башынан кароого жөнөтүлгөнү негиз болгон. Борбордук шайлоо комиссиясы саясатчынын арызын 15-октябрда канааттандырып, Текебаев кайра депутат болуп парламентке кайтып келген.

0
Белгилер:
депутат, мандат, чечим, сот, Өмүрбек Текебаев
Тема боюнча
Жапаров дайындаган кадрлар. Кызматка келген достору, үзөңгүлөштөрү
Текебаев: окуучум туура баа берди, жаңы Конституциянын долбоору — "урод"