Кыргызстандын Улуттук банкынын алтын куймалары. Архив

Былтыр алтын куймасын сатып алгандар азыр бир топ пайда көрмөк. Рынокко саресеп

138
(жаңыланган 13:22 05.01.2021)
Мурдагы жылы Улуттук банктын алтын куймаларынан алгылыктуу киреше табууга мүмкүн болгон. Ал эми былтыр абал кандай болду?

БИШКЕК, 5-янв. — Sputnik. Өткөн жылы валюта курсу жана алтын баасы улам өзгөрүп жатты. Sputnik Кыргызстан агенттиги Улуттук банктын алтын куймалары менен иштеп пайда көрсө болот беле деген суроонун түйүнүн табууга аракет кылды. 

2020-жылдын 8-январынан быйылкы жылдын 4-январына чейинки мезгилди салыштырабыз. Аталган даталар жыл башындагы алгачкы жумуш күнү болгондуктан тандалып алынды.

Куймалар тууралуу кыскача 

КРдин Улуттук банкы жарандар инвестиция кылып же каражатын сактоосуна шарт түзүү үчүн 2015-жылдан тарта алтын куймаларын сата баштаган. Башкы банк сатуу менен эле чектелбей, кайра дагы сатып алып жаткан. Куймаларды сатуу жана сатып алуу наркы күн сайын Лондондун баалуу металлдар рыногу ассоциациясынын (дүйнөлүк баага барабар) кечки фиксингинин негизинде аныкталат. Демек, баанын термелип турушунан иштеп калууга мүмкүнчүлүк бар. Куймалардын 1ден 100 граммга чейинки салмактагы алты түрү сатыкка коюлат.

Алтындын дүйнөлүк баасы

Лондон рыногунун соңку маалыматтары узаган жылдын 30-декабрында коюлган. 8-январдан бери трой унциясынын баасы 315,65 долларга жогорулап, жалпы наркы 1 887,6 долларды түзгөн.

Бирок жыл ичинде баалар термелип турду, мисалы, мартта 1500 доллардан төмөн болсо, августта 2000ден ашкан.

Улуттук банктын куймаларынан кантип пайда тапса болот

Төмөндө сатуунун наркы бүгүн өткөн жылдын 8-январына салыштырмалуу кандай өзгөргөнү көрсөтүлөт:

  • бүгүн 1 граммы  6 581 сом (1 564 сомго көбөйдү);
  • 2 грамм — 12 043 (3 125 сомго көбөйдү);
  • 5 грамм — 28 771,50 (7 853 сомго көбөйдү);
  • 10 грамм — 53 522,50 (12 949 сомго көбөйдү);
  • 31,1 грамм (трой унциясы) — 165 747.50 (39 574 сомго көбөйдү);
  • 100 грамм — 530 169 (165 790 сомго көбөйдү).

Аны менен катар былтыр 8-январда алтын куймасын сатып алып, быйыл 4-январда Улуттук банкка сатсаңыз канча сом табарыңызды эсептеп көрдүк. 

  • 1 грамм — 1531 сом;
  • 2 грамм — 3 077;
  • 5 грамм — 7 767;
  • 10 грамм — 12 366,5;
  • 31,1 грамм — 37 124,5;
  • 100 грамм — 150 348.

Баанын өзгөрүшүнө карап динамиканы болжоп алгандар мындан дагы көп тапты десек болот. 

Себеби сатуу да, сатып алуу да 20-мартта эң төмөнкү чекке түшкөн (10 граммдыкты кошпогондо, анда ал сатууга чыга элек болчу), ал эми эң жогорку баа 6-ноябрда болгон.

Эгер эң төмөн баада сатып алып, жогорку чегине жеткенде сатып жиберишсе, мындайча пайда көрмөк:

  • 1 грамм — 1 734,5 сом;
  • 2 грамм — 3 483,5;
  • 5 грамм — 8 790,5;
  • 10 грамм — 17 453;
  • 31,1 грамм — 53 140;
  • 100 грамм — 166 299.

Эскерте кетсек, жыл башында доллардын курсу 69,5 сомду түзгөн, кийинчерээк ал 85 сомго чейин жетти. Азыркы тапта 83,5 сом болуп турат.

138
Белгилер:
сатуу, баа, алтын куймалары, Улуттук банк
Тема боюнча
Кыргызстанда баалуу металл рудасын экспорттоо тонналап өстү
Республикалык бюджеттин 2021-жылдагы киреше-чыгашасы бекитилди
Бийлик 2019-жылы ипотека алган жарандардын пайыздык ченин төмөндөтөт
ЖИА бизнес-ассоциациясынын аткаруучу директору Фархат Пакыров. Архив

Пакыров: орто жана чакан бизнес өлкөдөгү инвестициялык абалдын күзгүсү

12
(жаңыланган 15:34 25.01.2021)
ЖИА бизнес-ассоциациясынын аткаруучу директору Фархат Пакыров сырткы инвестицияга гана көңүл бурбай ички инвестицияны да карап, чакан жана орто бизнеске маани берүү зарылдыгын билдирди.
Пакыров: орто жана чакан бизнес — өлкөдөгү инвестициялык абалдын күзгүсү

Ички ишкерлик өлкөнүн инвестициялык жүзү, андыктан чет элдик компаниялар ишкерлик рыногун байкап турушат. Мындай пикирин Фархат Пакыров Sputnik Кыргызстан радиосунун эфиринде маек куруп жатып билдирди.

Анын айтымында, чакан жана орто бизнеске көңүл буруп, бул багытта маанилүү аракеттерди көрүү керек.

"Кризис экономикалык көрсөткүчтөрдүн төмөндөшүнө алып келди. Ага өлкөдөгү саясий кырдаал да себеп. Буга карабастан ишкерлер жаңы долбоорлорду сунуштап, туура кадамдарды карап жатышат. Маселен, чакан жана орто бизнес — инвестициялык абалдын күзгүсү. Биз көп учурда сырткы инвесторлорго көңүл буруп, маселесин талкуулап, аларга багытталган иш-чараларды көп жасайбыз. Бирок ошол эле убакта ички инвестицияга маани бербей жатабыз," — деди Пакыров.

Ал, ошондой эле, өлкөдөгү саясий кырдаал инвесторлор менен иш алып барууда таасирин тийгизерин кошумчалады.

12
Белгилер:
инвестициялар, бизнес, Фархат Пакыров
Тема боюнча
Кыргызстанга кандай инвестициялар тартыла турганы айтылды
Поезд. Архив

Кыргыз өкмөтү Казакстанга электровоз поезддерин каттатууга камынууда. Долбоор

123
(жаңыланган 12:51 25.01.2021)
"Луговой — Балыкчы темир жол участогун электрлештирүү" долбоору 2023-2025-жылдары ишке ашыруу пландалууда.

БИШКЕК, 25-янв. — Sputnik. Кыргыз өкмөтү темир жол линияларын электрлештирип, Казакстанга кеткен тепловоздорду электровоз поезди менен алмаштырууну пландап жатат. Бул туурасында "2021-2025-жылдарга Кыргыз Республикасында темир жол транспортун өнүктүрүүнүн негизги багыттарын бекитүү жөнүндө" өкмөттүн токтом долбоорунда жазылган.

Луговой — Балыкчы темир жол бөлүгү Кыргызстанды Казакстан жана башка өлкөлөр менен байланыштырган негизги транспорттук артерия болуп саналары белгиленет. Секция бир жолдуу, эксплуатациялык узундугу 321,5 чакырымды түзөт. Анын 60,3 чакырымы Казакстанга, 261,2 чакырымы Кыргызстанга туура келет. Луговой станциясы коңшу өлкөнүн Жамбыл облусунда жайгашкан.

"Луговой — Балыкчы участогун электрлештирүү долбоорун ишке ашыруу темир жол каттамынын мүмкүнчүлүгүн жогорулатууга багытталган. Ошондой эле отунга болгон көз карандылыкты жана айлана-чөйрөнүн булгануусун төмөндөтөт. Электрлештирүүгө жумшалган каражат эксплуатациялык чыгымдарды үнөмдөөнүн эсебинен төлөнөт. Долбоордун техникалык-экономикалык негиздемесин иштеп чыгууга жана темир жол участкасын электрификациялоону ишке ашырууга эл аралык каржы институттарын тартуу пландалууда", — деп жазылат токтом долбоорунда.

Луговой — Балыкчы участогу электр тартууга өткөндө жүк ташуучу, жүргүнчү ташуучу тепловоздор паркы электровоздор менен алмаштырылат.

"Ушуга байланыштуу атмосферага курамында көмүртек кычкылы, азот кычкылы, күкүрт кычкыл газы, көө жана башка зыяндуу заттардын чыгуу массасы 100 пайызга төмөндөйт. Трассанын жогорку курулмасындагы жана жолдогу майдын курамы азаят. Электр тартууга өткөндө ызы-чуунун деңгээли басаңдайт", — деп айтылат.

"Луговой — Балыкчы темир жол участогун электрлештирүү" долбоорун 2023-2025-жылдары ишке ашыруу пландалууда. Техникалык-экономикалык негиздемесин даярдоого каражат булагы табылганы айтылды. Ал эми долбоордун өзүн аткарууга "Кыргыз темир жолу" ишканасынын өздүк каражаты, насыялар жана инвестициялар менен алуу каралган.

123
Белгилер:
темир жол, поезд, тепловоз
Тема боюнча
Мукамбетов: Кытай — Кыргызстан — Өзбекстан темир жолу ЕАЭБде жаңы рынокторду ачат
Кыргызстан — Казакстан — Россия темир жол каттамдарынын графиги түзүлдү
Кыздын силуэти. Архив

Кочкордо киши колдуу болгон келиндин сөөгү табылды. Шектүү изделүүдө

0
(жаңыланган 17:11 25.01.2021)
Келиндин өлүмүнө шектелип Кочкордогу жергиликтүү тургундун малын багып жүргөн чабан изделүүдө. Маркум Сокулук районунун 23 жаштагы тургуну болгон.

БИШКЕК, 25-янв. — Sputnik. Кочкор районундагы сарайлардын биринен киши колдуу болгон 23 жаштагы келиндин сөөгү табылды. Бул тууралуу Нарын ОИИБнын маалымат кызматы кабарлады.

Аялдын каза болгону тууралуу 23-январь күнү 30 жаштагы К.Б. аттуу жергиликтүү тургун кабарлаган. Ал ошол күнү Тынай-Булак кыштоосунда малын багып жаткан 26 жаштагы чабандан кабар алганы барып, кашардагы үйдөн келиндин сөөгүн көргөнүн айткан.

"Окуя болгон жерге барган ыкчам-тергөө тобу келиндин киши колдуу болуп өлтүрүлгөндүгүн аныктаган. Маркум Чүй облусунун Сокулук районунун 1998-жылы туулган тургуну К.К. экени такталган. Учурда К.Бнын малын багып жаткан малчынын өздүгүн тактоо жана кармоо боюнча ыкчам иликтөө иштери жүргүзүлүүдө", — деп жазылат милициянын маалыматында.

Факты Жазык кодексинин 130-беренеси ("Адам өлтүрүү") менен сотко чейинки өндүрүш иши башталып, тергөө иштери жүргүзүлүп жатканы кошумчаланды.

0
Белгилер:
келин, Кочкор, шектүү, кылмыш, өлүм
Тема боюнча
Арактын айынан... Токмок шаарында үч адам киши колдуу болду