Депозитти кайсы валютада ачса кирешелүү болот? КР банктарынын маалыматы
(жаңыланган 17:35 12.02.2021)
Кыргызстандын банктары депозитти биз көнүп калгандай сом, доллар же евро менен эмес, рубль, тенге, атургай юань түрүндө дагы кабыл алат. Sputnik чет элдик акчаны аманат катары кармоо канчалык коопсуз экенин билип көрдү.Кыргызстанда депозитти валютанын бир нече түрүндө сактаса болот. Алардын арасынан эң пайдалуусу — рубль.
Кайсы валютада акча сактаса болот?
КР Улуттук банкы ушул жылдын 27-январына карата депозиттик база боюнча маалымат берди. Ага ылайык, аманаттардын жалпы суммасы 177,5 миллиард сомду түзөт.
Ар кайсы валютадагы аманаттарды сомго айландырганда:
- сом менен — 98,9 миллиард (55,7 пайыз);
- доллар менен — 69,2 миллиард (39 пайыз);
- евро менен — 5,5 миллиард (3,1 пайыз);
- рубль менен — 3,1 миллиард (1,7 пайыз);
- тенге менен — 170 миллион (0,1 пайыз);
- башка валютада — 712 миллион.
Белгилей кетсек, депозиттик базага аманат катары салынган каражаттардан тышкары, эсептерде сакталып турган жана банкка белгисиз мөөнөткө коюлган акчалар дагы кирет.
КР банктарындагы пайыздык ставкалар
Биз жеке тараптарга карата ставкаларды карап чыктык. Айта кетчү жагдай, депозиттердин мөөнөтү ар кандай (1 айдан 10 жылга чейин). Бирок бул материалда эң популярдуу болуп эсептелген үч айдан үч жылга чейинки аралык алынды.
Ставкалар:
- сом — 13 пайызга чейин (дээрлик бардык банктардан ачууга болот);
- рубль — 9,5 пайызга чейин (15 банкта ачууга болот);
- тенге — 8,5 пайызга чейин (эки банкта ачууга болот);
- доллар — 5 пайызга чейин (дээрлик бардык банктардан ачууга болот);
- юань — 4,5 пайызга чейин (бир банкта ачууга болот);
- евро — 3 пайызга чейин (жети банкта ачууга болот).
Шарт боюнча эң төмөнкү пайыздар каалаган учурда чыгарып алууга мүмкүн болгон депозиттерге коюлган. Ал эми эң жогоркуларды атайын депозиттерден (пенсионер, балдар жана аялдар үчүн) таба аласыз.
Эсепке турак жай-сактык (3-4 пайыз) жана мөөнөтсүз депозиттер (аларга пайыз чегерилбейт) алынган жок.
Кыргызстанда рубль сактоо Россиядагыдан дагы пайдалуу
©
Sputnik / Табылды Кадырбеков
РФтин борбордук банкы 10 кредиттик уюмдун рублдик депозит боюнча пайыздык чендерин маалымдаган.
"Россия банкынан" билдиргендей, 2019-жылдын март айынан бери быйылкы жылдын январь айынын экинчи декадасына чейин депозиттик ставкалар 7,7 пайыздан 4,5 пайызга чейин түшкөн.
Россиядагы эң ири үч банктын пайыздык чендери төмөнкүдөй:
- "Сбербанк" — 3,97 пайызга чейин;
- ВТБ — 5,5 пайызга чейин;
- "Газпромбанк" — 6,5 пайызга чейин.
Чет элдик валюталарга кепилдик берилгенби?
Улуттук банктан билдиришкендей, кепилдик боюнча акча төлөтүп алуучу жагдай түзүлүп калса, жаран 200 миң сомго чейинки акчасын кайтарып алат. Мунун ичинде пайыздык чендер дагы камтылат.
"Кайсы чет элдик валютада сакталбасын, кепилдик жагдайы түзүлүп калса 200 миң сомго чейинки акча кайтарып берилет. Бирок улуттук валюта түрүндө жана 200 миң сомдон ашпаган суммада", — деп түшүндүрүштү Улуттук банктан.
Эске салсак, Кыргызстан 23 банк депозитти коргоо системасына киргизилген. Бул тууралуу башка макаладан окуп алсаңыз болот.
Кыргызстандагы кендерди мыйзамсыз казууга жол бербөө үчүн жумушчу топ түзүлдү
(жаңыланган 17:46 24.02.2021)
Атайын жумушчу топ президент Садыр Жапаровдун кол койгон жарлыгынын негизинде түзүлгөн. Топтун мүчөлөрү мыйзамсыз иштерди көзөмөлдөйт.БИШКЕК, 24-фев. — Sputnik. Жер казынасын пайдалануу чөйрөсүндө жаңжалдуу кырдаалдарды алдын алуу жана пайдалуу кендерди мыйзамсыз казып алууга көзөмөлдү күчөтүү үчүн ведомстволор аралык жумушчу топ түзүлдү. Бул тууралуу өкмөттөн билдиришти.
Мындай чечим президенттин "Кыргыз Республикасынын кен казып алуу тармагын реформалоо маселелери жөнүндө" жарлыгын ишке ашыруу максатында кабыл алынган.
"Ведомстволор аралык жумушчу топ жер казынасын пайдалануу объектилериндеги көйгөйлүү маселелерди чечүү үчүн иш-чаралар планын иштеп чыга алат. Ошондой эле зарыл болгон учурда меселени чечүү үчүн министрликтердин, административдик ведомстволордун, жергиликтүү мамлекеттик администрациялардын жана жергиликтүү өз алдынча башкаруу органдарынын кызматкерлерин, көз карандысыз эксперттерди жана коомдук активисттерди ишке тартууга укуктуу", — деп айтылат маалыматта.
Жер казынасын пайдалануу боюнча ыйгарым укуктуу мамлекеттик органдын жетекчисинин орун басары ведомстволор аралык жумушчу топтун төрагасы болуп саналат.
Улуттук банктын эсептик чени көбөйдү. Чоо-жайы
(жаңыланган 15:12 24.02.2021)
Эсептик чен — бул Улуттук банк коммерциялык банктарга берген насыянын пайыздык өлчөмү. Акыркы жолу ал 2015-жылы 5,5 пайызга көтөрүлүп, андан кийин төмөндөтүлүп гана келген.БИШКЕК, 24-фев. — Sputnik. Улуттук банк эсептик ченди 5,5 пайызга чейин жогорулатуу чечимин кабыл алды. Бул тууралуу маалымат башкы банктын расмий сайтына жарыяланды.
Көрсөткүч жарым пайызга жогорулап, 5 пайыздан 5,5 пайызга көтөрүлдү.
Эсептик чен — бул Улуттук банк коммерциялык банктарга берген насыянын пайыздык өлчөмү. Ал канчалык жогору болгон сайын коммерциялык мекемелер дагы элге берген насыянын пайызын жогорулатат. Эсептик чен-өлчөмдү инфляцияны ооздуктоо максатында жогорулатышат. Бирок экономиканын өсүү ыргагы төмөндөйт.
Улуттук банк пандемиядан улам эл аралык сооданын көлөмү төмөндөшү байкалып, дүйнөлүк рынокто олку-солку жагдай сакталып тургандыгын белгилейт. Бул фактор дүйнөлүк экономиканы ооздуктап тургандай эле Кыргызстандын экономикасынын өнүгүшүнө да терс таасирин тийгизгени айтылды.
Дүйнөлүк рынокто баалардын өсүшүнөн улам Кыргызстанда дагы инфляция өскөнү байкалган (2020-жылдын февралынан ушул жылдын февралына чейин 10,2 пайыз). Инфляциянын өсүүсү жылдын орто ченине чейин тездеп, андан соң акырындык менен турукташып жыл соңунда бир калыпка келери болжолдонууда.
Соода боюнча өнөктөш өлкөлөрдүн экономикасынын акырындап калыбына келиши күтүлүүдө, бул орто мөөнөткө каралган келечекте тышкы талапты камсыз кылуу үчүн республикада экономикалык жигердүүлүктүн жогорулашына өбөлгө түзөт.
"Дүйнөлүк товардык-чийки зат рыногунда баалардын өсүшү Кыргызстанда да керектөө бааларынын жакынкы мезгил аралыгында жогорулашынын сакталып турушун шарттайт. Тышкы чөйрөнү өнүктүрүү өбөлгөлөрүн жана ички экономикалык шарттарды эске алуу менен Улуттук банк пайыздык ченди 5,5 пайызга чейин жогорулатуу чечимин кабыл алды. Кандайдыр бир тобокелдиктер келип чыккан учурда Улуттук банк учурдагы акча-кредит саясатына түзөтүү киргизүү мүмкүнчүлүгүн жокко чыгарбайт", — деп белгиледи Улуттук банк.
Эске салсак, 2015-жылы дагы 5,5 пайызга көтөрүлүп, андан кийин төмөндөтүлүп гана келген. Акыркы жолу эсептик чен өткөн жылдын февраль айында 4,25 пайыздан 5ке көбөйгөн болчу.
Таңкы 6га чейин жабылды. Өлкөдөгү эки ири жолго чектөө киргизилди
(жаңыланган 00:53 25.02.2021)
Жолду көчкү кооптуулугунан улам жабууга Жарандык коргонуу башчысы-премьер министр бүгүн буйрук берген.БИШКЕК, 25-фев. — Sputnik. Бишкек — Ош жолунда кар көчкү түшүү коркунучу бар болгондуктан Жайыл, Токтогул райондорундагы жана Суусамыр — Талас — Тараз унаа жолунун Талды-Булак айылындагы посттор 25-февраль таңкы саат 06:00гө чейин убактылуу жабылды. Бул тууралуу ӨКМдин маалымат кызматынан кабарлашты.
Бул премьер-министрдин буйругунун негизинде болгон.
"Бишкек — Ош жолунда кар көчкү түшүү коркунучу болгондуктан Жайыл районунун Сосновка, Токтогул районунун Арал постторунда жана Суусамыр — Талас — Тараз жолунун Талды-Булак айылындагы постунда автоунаалардын бардык түрүнө таңкы саат 06:00гө чейин убактылуу чектөө киргизилди", — деп кабарлаган ӨКМ.
Эске салсак, Бишкек — Ош жолунун 132-чакырымында көлөмү болжол менен 1800 м3 кар көчкү түшкөндүктөн учурда жол жабылган.
Белгилер: