Айылдашын атып өлтүргөн айыл өкмөт башчынын ордуна 23 жаштагы бала иштеп жатат

© Sputnik / Михаил Воскресенский / Медиабанкка өтүүКресло. Архив
Кресло. Архив - Sputnik Кыргызстан
Жазылуу
Нарын облусунун Жумгал районундагы Таш-Дөбө айылынын башчысынын милдетин 5-курста окуп жаткан 23 жаштагы студент Аман Түгөлбеков аткарып жатат.

БИШКЕК, 21-май — Sputnik. Улуттук университеттин Экономика жана финансы институтунда окуп жаткан Аман Түгөлбеков 22-апрелде Жумгал районундагы Таш-Дөбө айыл өкмөтүнүн башчысынын милдетин аткаруучу болуп дайындалганы туурасында Sputnik маалымат сайтынын кабарчысына өзү билдирди.

Түгөлбековдун айтымында, анын талапкерлигин айыл өкмөттө иштеген эмгек жамааты көрсөткөн.

"Талапкерлигимди эмгек жамааты колдоду. Буга чейин айыл өкмөттө салык инспектору болуп иштечүмүн", — дейт ал. 

Түгөлбеков учурда Улуттук университеттин экономика жана финансы институтунда бешинчи курста окуп жатканын кошумчалады.

Жумгал райадминистрациянын аппарат жетекчиси Бакыт Жээналиев Таш-Дөбө айылынын мурдагы айыл башчысы Надырбек Бийсеев айылдашын атып алгандан кийин ордуна Кубатбек Бектуров дайындалганын билдирди. 

"Айыл башчысы кырсыктагандан кийин анын милдетин аткаруучу болуп Кубатбек Бектуров дайындалган. Эки айга жакын иштеп, бирок өз каалоосу менен ишти өткөрүп берген. Анын ордуна Аман Түгөлбековдон башка ыңгайлуу талапкер болбогондуктан, ал убактылуу айыл өкмөт башчысы болуп дайындалды", — деди Жээналиев.

 Мурдагы айыл өкмөт башчысынын иши боюнча сот акыркы чечимди чыгарганга чейин 23 жаштагы Аман Түгөлбеков Таш-Дөбө айылын башкарып турат. 

"Соттун чечими чыгыш керек. Мурдагы айыл башчыны жумуштан бошотулсун деген сунушун бериш керек. Сот кандай чечим чыгарат, биз билбейбиз", — деди райондун аппарат жетекчиси.

Жаңылыктар түрмөгү
0