БИШКЕК, 11-дек. — Sputnik. Бишкек шаарынын Чыгыш-5 кичи районунун аймагынан түндө эл аралык террордук уюмдун эки мүчөсү жок кылынганын Улуттук коопсуздук боюнча мамлекеттик комитети билдирди.
УКМКнын маалыматы боюнча жок кылынган террордук топтун мүчөлөрү бир катар оор кылмыштарга тийиштиги бар. Анын ичинен 8-кичи райондо милиция кызматкерин өлтүрүүгө да тиешеси бар экени айтылууда.
Жок кылынган согушкерлердин "Тоха" каймана аты менен белгилүү Жумагуловдун террордук тобу менен тыгыз байланышта болгону аныкталган. Жумагулов ушул жылдын 16-июлунда Бишкек шаарында атайын операцияда жок кылынган.
Түндө жок кылынган террордук топтун мүчөлөрү Бишкек шаарында жана Чүй облусунда терактыларды уюштурууну пландап жүргөнү тергөө учурунда аныкталган. Алардын жанынан Макаров үлгүсүндөгү төрт тапанча, Ф-1 үлгүсүндөгү бир граната жана колго жасалган жарылуучу заттар алынган. Андан сырткары бир нече уюлдук телефон менен бет каптар алынган.
УКМКнын ыкчам-иликтөө органдары тарабынан козголгон кылмыш иштеринин алкагында иш чаралар улантылууда.
