БИШКЕК, 13-янв. — Sputnik. Бишкекте таксистти сабап унаасын айдап кеткендердин бирөөсү кармалганын ШИИБ билдирди.
Маалыматка ылайык, былтыркы жылдын 25-декабрында түнкү саат 2.00дө азиат улутундагы 20-25 жаштагы белгисиз адамдар "Дордой" базарынын жанындагы мечиттин жанынан "Хонда Цивик" унаасына келип, Жибек Жолу менен Тоголок Молдо көчөлөрүнүн кесилишине жеткирип коюуну өтүнүшкөн.
Жолдон жүргүнчүнүн бирөөсү өзүн жаман сезип жатканын айтып, караңгы көчөгө токтоттурат. Айдоочу унааны токтоткондон кийин белгисиздер ага кол салып, сабап, ал эс-учун жоготкондон кийин унааны айдап кетишкен.
Бул факт боюнча Свердлов РИИБ "Адам уурдоо", "Каракчылык", "Унаага мыйзамсыз ээлик кылуу" беренелеринин негизинде кылмыш иши козголуп, иликтөө иштеринин аркасында кылмышка шектүү катары 20 жаштагы Дастан аттуу жаран кармалган.
Ал убактылуу кармоочу жайга киргизилип, кылмыштын башка катышуучуларын издөө аракеттери көрүлүп жатат.
