БИШКЕК, 17-фев. — Sputnik. Эл аралык издөөгө алынган Кыргызстандын жараны Россиядан сегиз жылдан кийин кармалды. Бул тууралуу Бишкек шаардык ички иштер башкармалыгынын маалымат кызматы билдирди.
Бишкектин Свердлов райондук ички иштер башкармалыгы тарабынан 2008-жылдын 30-июнунда 24 жаштагы жаранга Кылмыш жаза кодексинин 167-беренеси (тоноо) боюнча кылмыш иши козголгон. Ал изин суутуп кеткендиктен эл аралык издөөгө алынган.
Маалыматка ылайык, кылмышка шектүү жаран 11-февралда Москвадагы Домодедово аэропортунан Бишкек шаардык ички иштер башкармалыгы менен Москва прокуратурасынын кызматкерлери тарабынан кармалды. Ал Кыргызстанга экстрадицияланып, убактылуу кармоочу жайга киргизилди.
Учурда иликтөө иштери жүрүп жатат.
