БИШКЕК, 16-июн. — Sputnik. Узак убакыт бою көзөмөл жасалып, пландалган операциянын жыйынтыгында Баткен облусунун Баткен — Лейлек автожолундагы "Төрт-Көл" кафесинен BMW-525 үлгүсүндөгү машина айдап жүргөн 31 жана 40 жаштагы эки тургун кармалган. Бул тууралуу маңзатты көзөмөлдөө боюнча мамлекеттик кызматы билдирди.
Машинаны тинтүү учурунда салмагы 2 килограмм болгон героин табылган. Анын көмүскө базардагы болжолдуу баасы 1 миллион сомго чейин жетет.
Аталган факты боюнча кылмыш иши козголуп, буга тийиштиги бар башка кишилерди аныктоо боюнча иликтөө иштери жүрүп жатат.
Кармалгандар убактылуу кармоо жайына киргизилди.
