БИШКЕК, 27-авг. — Sputnik. Москванын түндүн-батышында, мекенинен миңдеген чакырым алыс жүргөн кыргызстандыктар күйүп кетти. Россиянын борборундагы басмаканалардын биринде чыккан тилсиз жоо 17 кишинин өмүрүн алды. Кыргызстандын Тышкы иштер министрлиги кыргызстандык 15 киши каза тапкандыгын, ал эми үчөө оор абалда кайра ооруканада жаткандыгын билдирди.
2012-жылы Москва калаасындагы италия ресторанында үч адам каза тапса, анын экөө Кыргызстан жарандары болгон. Дагы алтоо катуу күйүк алган.
Төрт кыргызстандыктын өмүрүн кайсаган өрт 2014-жылдын 19-сентябрында түнкү саат бирлер ченде болгон. Москвадагы көп кабаттуу үйлөрдөгү батирлердин биринде КРдин төрт жараны каза таап, алтоо ооруканага түшкөн. Алардын арасында катуу жаракат алган кичинекей балдар да болгон.
2016-жылдын 30-январында Москвадагы өнөр жай имараттарынын биринде, 3 миң чарчы чакырым аймакта өрт чыккан. Тилсиз жоо тигүү цехинде иштеген кыргызстандык сегиз кыздын өмүрүн алган. Алардын улуусу 33 жашта болсо, кичүүсү төрткө кадам таштаган наристе эле.
2013-жылдын май айында Иркутск аймагында Кыргызстандын дагы бир жараны көз жумган. Эки киши чырдаша кетип, бири экинчисине бычак урган. Кол салган киши аны менен тынчып калбай, эки наристе бейкапар уктап жаткан берки адамдын үйүн өрттөп жиберген. Өз маалында келип калган куткаруучулар балдарды сактап калышкан, ал эми ичкериден кыйнап өлтүрүлгөн үй ээсинин сөөгүн таап чыккан.
