УКМК: РФте теракт жасоону пландагандардын ичинде КР жарандарынын бар-жогу такталууда

БИШКЕК, 14-ноя. — Sputnik. Россияда теракт жасоого аракет кылып кармалгандардын арасында кыргызстандык жарандардын бар-жогу такталып жатканын УКМКнын маалымат катчысы Рахат Сулайманов Sputnik Кыргызстан агенттигине билдирди.

Анын айтымында, курамында Борбор Азия мамлекеттеринин жарандары бар террордук топ Россия, Кыргызстан жана Тажикстандын күч түзүмдөрүнүн биргелешкен аракеттеринин натыйжасында кармалган.

"Кармалгандар Москва менен Санкт-Петербург эле эмес, Борбор Азия чөлкөмүндө да теракт жасоону пландашкан. Баары тең ушул аймактан чыккандар, бардык жасагандарын моюндарына алышты. Учурда арасында кыргызстандык жарандардын бар-жогун тактап жатабыз", — деди Сулайманов.

Ал кармалгандардын бири Кыргызстандагы Таго деген досу тууралуу айтканын белгиледи. Алардын арасында Сириядагы террордук уюмдун лагерлеринде аскердик даярдыктан өткөндөр да бар болуп чыкты.

Эскерте кетсек, ишемби күнү, 12-ноябрда Россияда автомат жана жардыруучу заттарды пайдалануу менен эл көп чогулган жерде теракт жасоону пландаган 10 киши кармалган.