БИШКЕК, 30-апр. — Sputnik. Өзгөндүн Аюу айылында жер көчкү алдында калган жарандарды издөөнү токтотуп, ошол жерди мазарга айлантуу каралууда. Бул туурасында Зергер айыл өкмөтүнүн башчысы Динмуханбет Мокошев билдирди.

Анын айтымында, айылдыктарды коопсуз жайга көчүрүү үчүн 30 чатыр тигилген.

"Кечээ кечинде кар аралаш жаан жааган. Учурда көчкү алдында калган жарандардын туугандары менен сүйлөшүүлөрдү жүргүзүп жатабыз. Анда издөө иштерин токтотуп, ал жердин айланасын тосуп мазарга айлантуу каралып жатат", — деди Мокошев.

Ал айылда дагы 69 үй-бүлө ӨКМдин атайын чатырларына жана туугандарыныкына көчүрүлгөнүн кошумчалады.

Ал арада жер көчкү алдында калгандардын жакындарынан жети киши ооруканага түшкөнүн Саламаттык сактоо министрлиги кабарлады. Алардын бешөө невроз диагнозу менен, дагы бири гипертоникалык оору менен дарыгерлердин кароосунда. Учурда бейтаптардын абалы канааттандырарлык экени айтылып жатат. Ал эми инсультка кабылган дагы бир жаран реанимацияда, абалы оор деп бааланууда.

Министрлик бейтаптардын баарына тийиштүү жардам көрсөтүлүп жатканын белгиледи.

Эскерте кетсек, 29-апрелде таңкы саат 06:40та көлөмү 200 миң метр куб болгон жер көчкү жүрүп, он бир турак жайды 24 жашоочусу менен басып калган. Бүгүн президент Алмазбек Атамбаевдин жарлыгы менен Кыргызстанда аза күтүү күнү деп жарыяланды.

БИШКЕК, 19-янв. — Sputnik. Бишкектеги Кайгуул милиция кызматы бүгүн маршрутка көйгөйүнөн улам аялдамаларда калган бишкектиктерди үйлөрүнө жеткирүүдө. Бул туурасында шаардык милициянын маалымат кызматынан кабарлашты.

Кечкурун милиционерлер балдарга, аялдарга жана улгайган адамдарга өз жардамын сунуштап жатканы айтылды. Бул багытта аталган кызматтын атайын автоунаалары иштеген.

Милициядан аялдамаларда топтолгон кишилер аз, шаар ичи тынч деп билдиришти.

Бүгүн, 18-январда, айрым маршрутка айдоочулары жумушка чыкпай коюшкан. Алар жол кире акысын жогорулатууну талап кылышууда. Себеби жол кире 2012-жылдан бери көтөрүлө элек. Учурда маршрутканын баасы күндүз 10, ал эми кечинде 12 сом.

Эртең менен Бишкек шаарынын мэринин милдетин аткарып жаткан Балбак Түлөбаев каттамга чыкпай койгон маршруткалардын лицензиясы алынып, башкага берилерин эскерткен.

Мэриядан бүгүн калаадагы 1350 микроавтобустардын 400-450сү ишке чыкты деген маалымат берген. Шаардык транспорт башкармалыгынан маршруттук каттамдардын 90 пайызы кадимки калыбында иштеп жатат дешкен. Ал эми кечкурун аялдамаларда эл топтоло баштап, коомдук транспортту күткөндөр көбөйгөндө Мэриянын шаардык транспорт башкармалыгынын жетекчисинин милдетин аткарып жаткан Улан Бейшенбаев маршрутка боюнча кырдаал турукташкандыгын, ал эми жогорудагы көрүнүш автотыгын менен байланыштуу болушу мүмкүн деген жообун айткан.