БИШКЕК, 2-май. — Sputnik. Жер көчкү басып калган Аюулуктарды издөөдө 39 жаштагы адамдын сөөгү табылды. Бул туурасында Sputnik Кыргызстан маалымат агенттигине ӨКМдин маалымат кызматынан кабарлашты.

Эске салсак, 29-апрелде эртең менен саат 6:40тар чамасында Өзгөн районунун Зергер айыл аймагындагы Аюу айылында көлөмү 200 миң метр куб жер көчкү жүрүп, алдын ала маалымат боюнча алты үй-бүлөдөн 24 кишини басып калган. Көчкү алдында калган он бир турак жайдын бирөөндө эч ким жашаган эмес.

Адистердин айтымында, көчкүнүн бийиктиги болжол менен 4,5-5 метрди түзөт.

30-апрелде түш ченде 12 жана 2 жаштагы эки кыздын, кечке маал 20 жаштагы дагы бир кыздын сөөгү табылган. 

Аюу айылы Өзгөндүн борборунан 30 чакырым алыстыкта жайгашкан. Аталган аймакта 248 үй-бүлө, ал эми киши саны менен алганда 1800гө чукул адам жашайт.

"Сөөк 2-майда 18:45те табылган. Ал 39 жаштагы жаран болуп чыкты", — деп айтышты маалымат кызматынан.

Издөө иштери дүйшөмбү күнү саат эртең мененки сегизде башталган. Учурда ал жерде 280 кишиден турган куткаруучулар — аскерлер, ӨКМ кызматкерлери, өрт өчүрүүчүлөр жана айылдыктар издеп жатат.

БИШКЕК, 19-янв. — Sputnik. Бишкектеги Кайгуул милиция кызматы бүгүн маршрутка көйгөйүнөн улам аялдамаларда калган бишкектиктерди үйлөрүнө жеткирүүдө. Бул туурасында шаардык милициянын маалымат кызматынан кабарлашты.

Кечкурун милиционерлер балдарга, аялдарга жана улгайган адамдарга өз жардамын сунуштап жатканы айтылды. Бул багытта аталган кызматтын атайын автоунаалары иштеген.

Милициядан аялдамаларда топтолгон кишилер аз, шаар ичи тынч деп билдиришти.

Бүгүн, 18-январда, айрым маршрутка айдоочулары жумушка чыкпай коюшкан. Алар жол кире акысын жогорулатууну талап кылышууда. Себеби жол кире 2012-жылдан бери көтөрүлө элек. Учурда маршрутканын баасы күндүз 10, ал эми кечинде 12 сом.

Эртең менен Бишкек шаарынын мэринин милдетин аткарып жаткан Балбак Түлөбаев каттамга чыкпай койгон маршруткалардын лицензиясы алынып, башкага берилерин эскерткен.

Мэриядан бүгүн калаадагы 1350 микроавтобустардын 400-450сү ишке чыкты деген маалымат берген. Шаардык транспорт башкармалыгынан маршруттук каттамдардын 90 пайызы кадимки калыбында иштеп жатат дешкен. Ал эми кечкурун аялдамаларда эл топтоло баштап, коомдук транспортту күткөндөр көбөйгөндө Мэриянын шаардык транспорт башкармалыгынын жетекчисинин милдетин аткарып жаткан Улан Бейшенбаев маршрутка боюнча кырдаал турукташкандыгын, ал эми жогорудагы көрүнүш автотыгын менен байланыштуу болушу мүмкүн деген жообун айткан.