БИШКЕК, 17-май — Sputnik. Түп районунда баласы менен мотоциклде кетип бараткан мал доктурду жеңил автоунаа коюп кетти. Бул тууралуу Sputnik Кыргызстан агенттигине окуяга күбө болгон жаран билдирди.
Ал капысынан жолдун каршы тарабына чыгып, мотоцикл менен бетме-бет кагышкан. Мал доктурдун баласы соккудан улам жолдун четине ыргып, мотоцикл машинанын алдында калган. Жигули аны дагы 50 метрдей сүйрөп барып, ичиндегилер окуя болгон жерден качып кетишкен.
"Бала менен кишини оор абалда райондук ооруканага алып кетишкен. Ал жактан баланы гана кабыл алышыптыр. Кишини облустук ооруканага жөнөтүшкөн, ал Караколго алып бараткан жолдон үзүлдү. Баланы бүгүн Караколго операция жасатууга алып келишти", — деди күбө.
Түп РИИБи жол кырсыгы тууралуу маалыматты ырастап, айдоочу мас абалында болгонун баса белгиледи. Аны башкалар менен чогуу 16-майдын кечинде кармашкан. Айдоочу убактылуу кармоо жайына киргизилген.
Мотоцикл мал доктурга жакында эле кызматтык унаа катары берилген. Ушундай эле мотоциклдер март айынын аягында Ош облусунун ветеринарларына таратылган.
Аталган окуя боюнча кылмыш иши козголуп, тергөө амалдары жүрүүдө.
