БИШКЕК, 5-июл. — Sputnik. Улуттук коопсуздук мамлекеттик комитети (УКМК) "Вконтакте" социалдык тармагында улуттар аралык жаңжалга үндөгөн билдирүүлөрдү жазган колдонуучунун ким экенин аныктагандыгын ведомствонун маалымат кызматынан билдиришти.
Ага ылайык, Ахмад Асадуллаев деген ысым менен катталган колдонуучу өз комментарийлеринде башка улуттун өкүлдөрүнүн ар намысына шек келтирген сөздөрдү жазып, бул нерсе башка колдонуучулар арасында нааразычылык жараткан.
Ал улуттар аралык жаңжалга үндөөдөн тышкары, Кыргызстандын улуттук символикасына карата дагы негативдүү оюн билдирген.
Филология-политологиялык экспертизанын жыйынтыгында, бул колдонуучунун жазгандарында улуттар аралык жаңжалга чакырыктар бар экени аныкталган.
Аталган факты боюнча А.Ж аттуу жаранга Кылмыш жаза кодексинин 299-беренеси (Улуттук, расалык же диний кастыкты козутуу) менен кылмыш иши козголду.
