Башалмандык уюштурууга жана бийликти басып алууга шектелип экс-депутат кармалды

БИШКЕК, 15-окт. — Sputnik. Административдик мекемелерди басып алуу жана президенттик шайлоонун жыйынтыгы чыккандан кийин өлкөдө массалык башаламандык уюштурууну пландаган деп шектелип Жогорку Кеңештин мурунку депутаты жана анын тарапташтары кармалды. Бул тууралуу УКМКнын маалымат кызматы билдирди.

Маалыматка караганда, Шайымбетов аттуу экс-депутат жана анын тарапташтары кылмыш ишин ишке ашыруу максатында бир нече күндөн бери курал-жарак издеп жатышкан. Аталган жаран канчанчы чакырылыштын депутаты болгону көрсөтүлгөн эмес.

"Алар талапкерлердин бири жеңилип калса өлкөдө массалык башаламандык уюштуруу аракетин көрүп жатышкан. Шайымбетов буга чейин жарылуучу заттарды жана курал жарактарды мыйзамсыз түрдө сактоо боюнча соттолгон", — деп айтылат маалыматта.

Шайымбетовго жана башка жарандарга 27 жана 233-берененин 1-бөлүмү (массалык башаламандык уюштурууга даярдык көрүү) 27-295-берене (бийликти күч колдонуу менен басып алууга даярдык көрүү) 241-берененин 2-бөлүмү (жарылуучу заттарды жана ок атуучу куралдарды мыйзамсыз сактоо) боюнча кылмыш иши козголду.

Кармалгандар УКМКга алып келинген. Тергөө иштери жүрүп жатат.