БИШКЕК, 27-ноя. — Sputnik. Ысык-Көл облусунда эки унаа бет маңдай кагышканын Sputnik Кыргызстан агенттигинин кабарчысына күбө билдирди.
Анын айтымында, жол кырсыгы 27-ноябрь күнү болжол менен 9.30дар чамасында Балыкчы — Бөкөнбаев — Каракол унаа жолунда, тагыраагы Оргочор айылына жакын жерде болду.
Audi унаасы өз жолу менен кетип бара жатканда башка жеңил унаа катуу ылдамдыкта каршы тилкеге чыга калып, экөө бет маңдай сүзүшкөнү айтылды. Audi унаасынын айдоочусу катуу жаракат алган.
"Мен дароо эле чуркап барып айдоочуга алгачкы жардам көрсөттүм. Ал коопсуздук курун тартынбагандыктан, рулду катуу сүзүп алыптыр. Алдыңкы айнектин сыныктары анын бетине чачырап, канжалап кетиптир. Тиги унаадагы улгайып калган айдоочу менен аял дагы жаракат алышты. Ал эми алардын жанындагы эмчектеги баласы бар келин, бактыга жараша, жабыркаган эмес", — деди күбө болгон аял.
Жабыркагандар ооруканага жетирилди.
Милиция кырсык болгонун тастыктады.
