Кылмыш иши папкасы. Архивдик сүрөт

Соттук иш бүтсө энеси депкир менен сабаган баланы башкалар багып алышы мүмкүн

328
(жаңыланган 17:15 10.02.2018)
Учурда комада жаткан бала шаардык соттун токтомунун негизинде Ош шаардык социалдык өнүгүү башкармалыгынын карамагына өткөрүлдү

ОШ, 9-фев. — Sputnik. Ош шаарында баласын депкир менен сабаган аялдын күнөөсү далилденсе ал энелик укуктан ажыратылат. Бул тууралуу Ош шаардык социалдык өнүгүү башкармалыгынын башчысы Батина Токобаева Sputnik Кыргызстан агенттигине билдирди.

Эскерте кетсек, Ош шаарында 24 жаштагы өз энеси депкир менен сабаган 3 жаштагы бала эс-учун жоготуп, облустук балдар ооруканасынын жандандырууу бөлүмүнө келип түшкөн.

Токобаеванын айтымында, баланын энеси шектүү катары кармалгандыгына байланыштуу Ош шаардык соту баланы социалдык өнүгүү башкармалыгынын карамагына өткөрүү токтомун чыгарган.

"Кызматкерлер баланын абалынан күн сайын кабардар болуп турушат. Ага кан керек болгондуктан жети кызматкер облустук ооруканага кан тапшырып келишти. Биз баласын депкир менен сабаган эненин турмуш-шарты, жакындарын иликтеп көрдүк. Ал келиндин өз атасы Кара-Кулжа районунда жашагандыгы белгилүү болду. Атасы кызы тууралуу 2014-жылдан бери эч кандай маалыматы жок экендигин билдирди. Себеби камакка алынган келиндин атасы менен апасы ажырашып кеткендиктен, ал 2014-жылы үйдөн чыгып кеткен боюнча атасы менен кабарлашкан эмес. Келиндин бир тууган эжеси Казакстанда, ал эми сиңдиси Москвада иштей тургандыгы аныкталды", — деди Токобаева.

Ал комада жаткан баланы таятасы асырап алуудан баш тарткандыгын кошумчалады.

"Ал эми баланын өз атасы тууралуу да иликтеп жатабыз. Азырынча эч кандай маалымат жок. Келин тергөөдө Өзгөн райондук төрөт үйүндө көз жарганын айткан. Бирок маалымат тастыкталган жок. Биз келиндин бир тууган эжеси жана сиңдиси менен байланышууга аракет кылып жатабыз. Эгерде алар макул болсо бала ошолордун карамагына өткөрүлөт. Эгерде алар да балдардан баш тартып, ал эми келиндин күнөөсү далилденсе, анда башкармалык шаардык сотко келинди энелик укуктан ажыратуу боюнча кайрылуу жолдойт. Шаардык соттун чечиминин негизинде баланы 6 айлык мөөнөт менен калаадагы балдарды реабилитациялоо борборуна жайгаштырабыз", — деди Токобаева.

Анын билдиришинче, аталган борборго жайгаштырылган балдар төрт жашка чейин гана кармалат.

"Андан соң баланы асырап алууну каалаган толук кандуу үй-бүлөгө же балдар борборлоруна жайгаштырууга болот. Комадагы баланын туулгандыгы тууралуу күбөлүгү да жок болуп чыкты. Апасынын да паспорту жок экен", — деди башкармалыктын жетекчиси.

Белгилей кетсек, шектүү катары баланын энеси шаардык милиция тарабынан кармалып, ага карата Кылмыш жаза кодексинин 234-беренеси менен кылмыш иши козголгон. Шаардык соттун чемими менен шектүү эне 4-апрелге чейин камакка алынган. Маалыматтарга ылайык, эне ажырашып кеткендиктен баласын жалгыз тарбиялап келген.

Ушу тапта баланын абалы начарлап жатканын Ош облустар аралык балдардын бириккен ооруканасынын Анестезиология жана реанимация бөлүмүнүн башчысы Абдразак Камилов айтып берди.

328
Белгилер:
энелер, оорукана, кылмыш, бала
Тема:
Депкир менен сабалган бала (14)
Тема боюнча
Ошто апасы депкир менен сабаган 3 жаштагы бала комага түштү
Ош: апасы депкир менен сабаган баланын дем алуусу начарлап, абалы оорлоду