Уурунун кылтагына илинген атактуулар. Чачылган үй, 30 миң доллар, зер буюмдар

© Sputnik / Жоомарт УраимовКоррупция в КР
Коррупция в КР - Sputnik Кыргызстан
Жазылуу
Уурулар негизинен баалуу буюмдар менен акчаларды алып кеткен. Айрымдарынын иши сотко өткөн.

БИШКЕК, 7-май — Sputnik. Аалымдар кеңешинин төрагасы Абдышүкүр Нарматовдүн үйүнө 3-майда таңга жуук ууру кирип, баласынын бутуна ок жаңылган. Милиция аталган факты боюнча Кылмыш жаза кодексинин уурулук жана каракчылык беренелери боюнча кылмыш иш козгоду

Ушул окуядан улам элге төбөсү көрүнүп калган дагы кайсы адамдардын үйүнө ууру кирип, ал ЖМКларда жарыяланганына Sputnik Кыргызстан агенттиги кызыгып көрдү.

Саламат Садыкованын үйүнө кирген ууру 30 миң доллар алып кеткен

Кыргыз эл артисти Саламат Садыкованын үйүнө 2014-жылы декабрь айында ууру кирип, зер буюмдарын жана 30 миң долларын алып кеткен. Эл артисти 3-декабрда милицияга арыз менен кайрылган. Ал эми арадан эки жыл өткөндөн кийин 2016-жылы мартта бул иш сотко өткөнү маалым болгон.

Үйүнө алты жолу ууру кирген Айбек Карымов

Эстрада ырчысы Айбек Карымовдун үйү акыркы эки жылда алты жолу тонолгон. 2017-жылы беш жолу, жыл башында бир жолу үйүнө ууру кирип, жалпы бир миллион сомдон ашык чыгым келтирген. Ырчынын 20дай коңшусу да уурулардын курмандыгы болгон.

Кайрат Примбердиевдин үйүнө кирген ууру да куру кол чыккан эмес

2016-жылдын аягында ырчы Кайрат Примбердиевдин да үйүнө ууру кирип, 3 миң долларлык баалуу буюмдарын көтөрүп кеткен. Ырчынын айтымында, уурулар үч сааттын ичинде эле үйдү "тазалоого" жетишкен. Примбердиев Сокулук РИИБине арыз жазып, милиция уурулардын манжа издерин алганы айтылган.

Текебаевдин батирине кирген ууру

Мурдагы депутат Өмүрбек Текебаевдин батирине дагы 2016-жылы ноябрь айында ууру кирген. Текебаев жубайы Айгүл Текебаева менен үйүнө журналисттер жана милиция кызматкерлери менен чогуу кирип, үйүнүн ичи чачылганын көрсөткөн. Тийиштүү органдардын кызматкерлери манжа издеринин үлгүлөрүн алышкан.

Жаңылыктар түрмөгү
0