Ичпечи, балам! Ошто мас болгон уулу атасына бычак урду

Жазылуу
Кылмышка шектүү 32 жаштагы жаран шаардык милициянын убактылуу кармоо жайына киргизилди.

БИШКЕК, 4-июн. — Sputnik. Ош шаарында 57 жаштагы атасына бычак сайган киши кармалып, убактылуу кармоочу жайга киргизилди. Ал эми жабырлануучу ооруканага жеткирилип, аман калды. Бул тууралуу шаардык милициянын маалымат катчысы Замир Сыдыков Sputnik Кыргызстан агенттигине билдирди.

Тапанча кармаган адам. Архив - Sputnik Кыргызстан
Аялына ок чыгарган күйөө, бети-башы канжалаган бала. Майдагы чуулуу 8 соттук иш
Ага ылайык, шаардык милициянын Ак-Буура бѳлүмүнѳ 3-июнь күнү саат 16.25тер чамасында калаадагы Ленинград кѳчѳсүндөгү үйлөрдүн биринде ата-баланын ортосунда чыр чыгып жаткандыгы тууралуу кабар келип түшкѳн. Окуяны тактоо үчүн аталган аймакты тейлеген инспектор, милициянын капитаны Жеңишбек Назирбаев жѳнѳтүлгѳн.

Милиция кызматкери көрсөтүлгөн дарекке барган учурда үй ээсинин 32 жаштагы уулу канга боелгон кийими менен качууга аракет кылгандыгына күбө болгон. Милиционер шектүү О.Б. аттуу кишини кармап, аны менен үйгѳ киргенде 57 жаштагы үй ээси кансырап жерде жаткан болот.

Милиционер Тез жардамды жана ыкчам-тергѳѳ тобун чакырып, алар келгиче өзү колдон келишинче биринчи жардам кѳрсѳткѳн. Натыйжада жабырлануучунун ѳмүрүн сактап калууга мүмкүн болгон.

"Тергѳѳ иштеринин алгачкы жыйынтыктарына караганда, жабырлануучунун 32 жаштагы уулу алкоголдук ичимдиктерди кѳп ичкендиктен, атасы аны "Ичпечи балам, жок дегенде ыйык орозо күндѳрү ичпечи…" деп айткан сѳзү мас абалдагы баласына оор тийип, ал ашканадагы бычакты алып, атасынын моюнуна сайып жиберген. Натыйжада жабырлануучу кѳп кан жоготкон. Кишинин кѳрсѳтмѳсү боюнча милиционер менен тез жардамдын келиши жана баласы пайдаланган бычактын мококтугу анын өмүрүнүн сакталып калышына себеп болгон", — деди Сыдыков.

Ал ошондой эле учурда ѳз атасынын ѳмүрүнѳ кол салды делген 32 жаштагы уулу убактылуу кармоочу жайга киргизилип, ага карата "Адам ѳлтүрүүгѳ аракет жасоо" беренеси менен кылмыш иши козголгондугун кошумчалады.

Жаңылыктар түрмөгү
0