БИШКЕК, 24-июл. — Sputnik. Улуттук коопсуздук мамлекеттик комитетинин кызматкерлери теракт жасоого даярданып жаткан делген кишини колго түшүрдү. Бул тууралуу УКМКнын маалымат кызматы кабарлады.
Билдирүүгө ылайык, кармалган Б.М аттуу адам 2016-жылдан бери эл аралык террористтик уюмдун мүчөсү болуп, Сириянын өкмөтүнүн куралдуу күчтөрүнө каршы согушка катышып, атайын окуудан өткөн.
"Ал 2017-жылы эл аралык террористтик уюмдун башчысынын буйругу менен Кыргызстанда теракт уюштурууга келген. Ага ок атуучу курал-жарак жана жардыруучу заттар менен "куралдуу жихад" жасайсың деген тапшырма берилген", — деп жазылат маалыматта.
Окуя боюнча УКМКнын тергөө органдары Кылмыш жаза кодексинин 226-4 (КР жаранынын чет мамлекеттин аймагындагы куралдуу кагылыштарга же согуш аракеттерине катышуусу же террорчулук жана экстремисттик даярдыктан өтүшү) жана 299-1-беренеси (Улуттук (этностор аралык), расалык, диний же регион аралык кастыкты козутуу) боюнча кылмыш иши козголду. Колго түшүрүлгөн адам учурда УКМКнын тергөө абагына киргизилди.
