БИШКЕК, 18-сен. — Sputnik. Бишкекте ымыркай сатуу боюнча козголгон кылмыш ишинин алкагында мыйзамсыз аборт жасаган деп шектелип акушер кармалды. Бул тууралуу Sputnik Кыргызстан агенттигиндеги маалымат жыйынында Башкы прокуратуранын коррупцияга бөгөт коюу, социалдык сферадагы мыйзамдардын аткарылышын жана балдарды коргоону көзөмөлдөө бөлүмүнүн прокурору Нуржан Талантбек уулу билдирди. 

Маалыматка караганда, медик 32-33 жумалык, тагыраагы сегиз айлык боюнда бар аялга аборт жасаган. Мындан улам КРдин Кылмыш жана жаза кодексинин 116-беренеси (Мыйзамсыз бойдон түшүрүү) менен кылмыш иши козголду.

Ошондой эле бала сатуу фактысы боюнча дагы үч кылмыш иши козголгон. Анын алкагында беш адамга баш коргоо чарасы тандалып, үчөө СИЗОго киргизилсе, экөө үй камагына чыгарылган.

"Тергөөнүн кызыкчылыгы үчүн бул адамдар кайсы мекемеде иштегени айтылбайт. Бирок иш иликтенип бүтөөрү менен бардык маалымат коомчулукка жарыяланат", — деди Талантбек уулу.

Буга чейин ИИМдин Криминалдык милициясы бала сатууга шектелген гинекологдорду кийин кармалгандардын биринин унаасынын багажынан бойдон алынган ымыркайлардын сөөктөрү табылган.

БИШКЕК, 19-янв. — Sputnik. Бишкектеги Кайгуул милиция кызматы бүгүн маршрутка көйгөйүнөн улам аялдамаларда калган бишкектиктерди үйлөрүнө жеткирүүдө. Бул туурасында шаардык милициянын маалымат кызматынан кабарлашты.

Кечкурун милиционерлер балдарга, аялдарга жана улгайган адамдарга өз жардамын сунуштап жатканы айтылды. Бул багытта аталган кызматтын атайын автоунаалары иштеген.

Милициядан аялдамаларда топтолгон кишилер аз, шаар ичи тынч деп билдиришти.

Бүгүн, 18-январда, айрым маршрутка айдоочулары жумушка чыкпай коюшкан. Алар жол кире акысын жогорулатууну талап кылышууда. Себеби жол кире 2012-жылдан бери көтөрүлө элек. Учурда маршрутканын баасы күндүз 10, ал эми кечинде 12 сом.

Эртең менен Бишкек шаарынын мэринин милдетин аткарып жаткан Балбак Түлөбаев каттамга чыкпай койгон маршруткалардын лицензиясы алынып, башкага берилерин эскерткен.

Мэриядан бүгүн калаадагы 1350 микроавтобустардын 400-450сү ишке чыкты деген маалымат берген. Шаардык транспорт башкармалыгынан маршруттук каттамдардын 90 пайызы кадимки калыбында иштеп жатат дешкен. Ал эми кечкурун аялдамаларда эл топтоло баштап, коомдук транспортту күткөндөр көбөйгөндө Мэриянын шаардык транспорт башкармалыгынын жетекчисинин милдетин аткарып жаткан Улан Бейшенбаев маршрутка боюнча кырдаал турукташкандыгын, ал эми жогорудагы көрүнүш автотыгын менен байланыштуу болушу мүмкүн деген жообун айткан.