Бул ирет майыптарды зордуктаган эргулдар, үч жыл чогуу жашаган жолдошун 40 миң сомго өлтүрткөн келин менен далай адамдын башын айлантып, сызга отургузган цыган аялдын былыктары тизмектелди.

40 миң сомго бааланган өмүр

Окуя үч жыл чогуу түтүн булатып келген түгөйлөрдүн ортосунда болгон. Бир балалуу болгондон кийин деле алар кез-кезде урушуп, үй ээси мас болуп келип келинчегине кол көтөрүп да койчу экен. Ошондой майрамдардын бири кошунасыныкында уланып, досторкон үстүндө отурган эркектер уруша кетет. Сөз көбөйүп отуруп, үй ээси мейман аял менен соодалашып, 40 миң сомго анын күйөөсүн көз алдында бычактап өлтүргөн. Андан соң сөөктү люктун ичине ыргытып салган. Кылмыш ошол эле күнү ачыкталып, киши өмүрүнө забын болгон аял да, эркек да укук коргоо кызматкерлеринин колуна түшкөн.

Шылуун цыган

Бишкекте жашаган 34 жаштагы цыган аял далай адамдын башын айлантып, ондогон адамды сызга отургузуп келген. Ал колго түшкөндөн кийин 38 жабырлануучу кайрылып, ага карата 35 кылмыш иш козголгон. Шектүү узак убакыттан бери "киши дарылайм, сени окутуп салыптыр" деп алдап, ишенчээк кыз-келиндерден 34 миллион рублдан ашкан зер буюмдарын алып из жашырып кеткен.

Чоң муштумдар

Рэкеттер борбор калаадагы муниципалдык ишкананын директорун сабап, өлтүрүп кетебиз деп коркутуп 21 миллион рубль акча талап кылган. Буга чейин алар жабырлануучунун жеңил жана жүк ташуучу автоунаасын да тартып алганы аныкталган. Өз өмүрү үчүн кооптонгон тургун милицияга кайрылып, шектүүлөр атайын операциянын негизинде колго түшүрүлгөн. Топ арасында Абхазиядагы согуштук аракеттерге катышып келген кыргызстандык да болгон.

Майып кыздарды зордуктап…

Төрт жигит эки кыз менен паркта жолугуп, тамак ичели деп алдап шаар четиндеги үйгө алып келген. Кулагы укпаган дудук кыздарга эргулдар арак сунуштап, алар ичпей койгондон кийин өздөрү мас болот. Корккон кыздар качып чыгып, жакын турган үйлөрдүн бирин тыкылдатып, жагдайды түшүндүргүчө беркилер келип, ой-боюна койбой кайра алып кетишет. Андан кийин кол салып, экөөнү төртөөлөп зордукташкан. Сот майыптарды катуу сабап, зордуктагандардын үчөөсүн 6-7 жылдан эркинен ажаратса, бирөөсүн издөөгө алган.

Окуучуну өлтүргөн мыкаачы

Психикалык жактан оорулуу делген 38 жаштагы шаар тургуну тогуз жаштагы баланы бычактап өлтүргөн. Милиционерлер ал шектүүнү издеп жүрүп эки жумадан кийин Кочкор районунан колго түшүрөт. Көрсө, ал буга чейин да өзүнүн бир тууганын өлтүрүп 10 жыл абакта отуруп чыккан экен. Териштирүү маалында жасаганын жарым-жартылай мойнуна алып, окуучу бала көчөдө тийишкендиктен ага бычак шилтегенин айткан.

"Кызганчаак" күйөө

Борбор калаадагы кичирайондордун биринде жашаган 54 жаштагы тургун өзүнүн аялын кызганычтын айынан балта менен чаап өлтүргөн. Андан соң өз өмүрүн кыйып тынган.

БИШКЕК, 25-янв. — Sputnik. Республикалык жугуштуу илдеттер ооруканасына түшкөн белгилүү балдар хирургу Талант Өмүрбековдун абалы тууралуу Sputnik агенттигине аталган медициналык жайдын жетекчиси Гүлжигит Аалиев маалымат берди.

Эске салсак, Өмүрбеков 19-январда эки тараптуу пневмония менен оор абалда ооруканага жаткырылган.

"Акыбалы турукташып калды. Бирок дагы деле жандандыруу бөлүмүнөн чыга элек", — деди Аалиев.

Талант Өмүрбеков Кыргызстанга таанымал дарыгер. Ал Бишкек шаардык Тез жардам балдар клиникалык ооруканасынын мурдагы дарыгери, Иса Ахунбаев атындагы медициналык академиянын балдар хирургиясы кафедрасынын жетекчиси, профессор, медицина илимдеринин доктору.