Баткен облусунун прокурору Анарбай Мамажакыпов тууганы Абдылда Темирбердиев. Архивдик сүрөт

Маркум Мамажакыповдун туугандары: башка прокурорлордун аялдары да бир нерсе билген

7836
(жаңыланган 09:40 20.12.2018)
Маркумдун жакындары 2 миң кишинин колу коюлган өтүнүч катты президент Сооронбай Жээнбековго жолдошту.

ОШ, 17-дек. — Sputnik. Баткен облусунун прокурору Анарбай Мамажакыпов киши колдуу болгон күнү аны менен аңчылыкка чогуу чыккан прокурорлордун баары тең тергөө жүрүп жаткан мезгилде камакка алынсын. Тергөө адилет жүргүзүлүп, чыныгы күнөөлүүлөр аныкталсын. Мындай талап менен маркумдун жакындары президент Сооронбай Жээнбековго кат жолдогондугун бүгүн, 17-декабрда, маалымат жыйында журналисттерге билдирди.

Родственники убитого главы надзорного органа Баткенской области Анарбая Мамажакыпова Абдылда Темирбердиев
© Sputnik / Зульфия Тургунова
Маркум прокурордун жакындары маалымат жыйында

Маркумдун атасы Кубатидин Мамажакыпов жүргүзүлүп жаткан тергөө ишине канааттанбай жаткандыктарын төмөнкүчө айтты.

"Чыныгы күнөөлүүлөр жазалансын. Уулум каза болоордон мурда эмгек өргүүсүнө чыгып, улуу баласын үйлөнттү. Бирок эмгек өргүүсү аяктаарына бир жума калганда мөөнөтүнөн мурда 12-ноябрь күнү жумушка чыкса, 17-ноябрь күнү каргашалуу окуя болду. Мамлекет башчысы Сооронбай Жээнбековдун коррупцияга каршы күрөшүү саясатын жүргүзөм деген уулум анын курмандыгы болду. Анткени каза болоордон мурда "коррупцияга каршы күрөшүүнү өз мекемемден баштайм" деп айтканы бар экен. Ошондон улам кесиптештери эле жумушуна жаңы эле чыккан уулумду уюштуруу жолу менен өлтүрүп коюштубу деген шегибиз бар", — деди Кубатидин Мамажакыпов.

Алар ошондой эле мекемелер аралык тергөө тобу түзүлүп, ага УКМК, Башкы прокуратура, ИИМден тергөөчүлөр тартылып, шек жараткан айрым жагдайлар тыкыр иликтөөгө алынышын талап кылышты.

"Мындай өтүнүч менен 2 миң адам кол коюп, мамлекет башчы Сооронбай Жээнбековго кат жолдодук. Себеби инибиздин сөөгү табылганда анын 80 пайызы күйүп калгандыгын Баткен облустук милициянын жетекчисинин орун басары Арстан Усанов маалымат жыйында расмий билдирди. Андан сырткары, шектүү аны кокусунан атып алгандыгын, тамекинин чогуна маркумдун денеси күйүп кеткендигин айтып чыкты. Бул маалыматка кантип ишенсе болот? Тамекинин чогуна кантип адамдын 80 пайызы күйүп кетсин? Бул өтө шек жаратуучу жагдай. Учурда камакка алынган шектүү М.К. (Мелис Калыков — ред.) аттуу жаран эгерде чындап бул ишти жасаса, ал жалгыз кылбайт болчу. Мындай кылмыш бир адамдын колунан келбейт. Шектүү М.К. 60 килограмм салмактагы орто бойлуу арык киши экен. Ал эми биздин инибиздин бою 180 сантиметр, салмагы 90 килограмм. Ушундай чоң кишиге шектүүнүн алы кантип жетти деп ишенбей турабыз", — деди маркумдун тууганы Абдылда Темирбердиев.

Ал эми маркумдун жакын тууганы Рахман Алмаматовдун айтымында, окуя болгон күнү мергенчиликке чыккан прокурорлордун аялдары маркумдун жаңы үйлөнгөн уулунун келинчегин көргөнү келишкен. Бирок бир аз убакыт өтпөй эле шектүү бир телефон чалуу болгондон кийин аялдардын баары бышкан тамакка да карабай, себебин айтпай, эмнегедир шашылып чыгып кетишкен.

"Ушундай жагдайдан улам, демек, инибизди түн киргенде эмес, күндүз эле өлтүрүшүп анан аялдарына "ал үйдөн тез чыккыла" деп кабар берген деп шектенип жатабыз. Себеби келинди көрүү үчүн келген аялдар эч бир себебин айтпай эле шашылыш түрдө үйдөн чыгып кетишкен. Бир экөөсү да эмес, баары бир мезгилде кетип калышкан. Бул да өтө күмөн туудурат", — деди Алмаматов.

Ал ошондой эле маркумдун сөөгүн түз эле Чоң-Алайга алып жөнөгөндүктөн аялы Айнура Мамажакыпова да жолго чыкканын айтты. Аны коштоп орун басары Арстан Байбосуновдун аялы да чогуу келе жатып, бир телефон чалуудан соң түн ортосунда эч бир себебин айтпастан талаада өзү жалгыз унаадан түшүп калган.

"Эгерде прокурорлордун маркумдун өлүмүнө тиешеси жок болсо, анда эмнеге аялдарын анчалык коруп, чочулап, унаадан түшүрүп, тамак жедирбей шаштырышат. Демек, ушундай жагдайлардан улам биз мекемелер аралык тергөө тобу түзүлүп, айрым бизди шектендирген жагдайларды кайрадан тыкыр карап чыгышын талап кылабыз", — деди жакыны Сайдулла Пазылов.

Маркумдун жакындары, прокурорлордун мергенчиликке чыгууну уюштуруусунун өзү мыйзам бузуу деген пикирде экендигин кошумчалашты.

Прокурор Баткенской области Анарбай Мамажакыпов
Прокурор Анарбай Мамажакыпов

Эске сала кетсек, прокурор Анарбай Мамажакыповдун сөөгү 18-ноябрга караган түнү Баткен облусундагы Төрт-Көл суу сактагычына жакын жердеги жолдон табылган. Анын денесинен зомбулуктун белгилери байкалган. Укук коргоо органдары шектүү катары Капиталдык курулуш башкармалыгынын жетекчисин кармаган. Каргашалуу окуяга чейин анын прокурор менен чогуу жүргөнүн көргөндөр болгон. Ошол эле күнү аталган факты боюнча Кылмыш-жаза кодексинин 97-беренеси ("Адам өлтүрүү") боюнча кылмыш иши козголгон. Ал эми Башкы прокуратуранын Ыкчам издөө иштерин жана тергөөнү көзөмөлдөө башкармалыгынын жетекчиси Замир Бейшекеев Баткен облусунун прокурорунун денеси эмнеден улам өрттөнгөнү боюнча расмий маалымат берген. Анда "Кокусунан мылтыгы атылып, ок прокурордун башына тийген. Калыков коркуп кетип тамеки чегет. Анын чогунан бушлаты күйгөндө аны чечип жерге таштаганда жалын Мамажакыповго жабышканын айтты", — деген Бейшекеев.

Буга чейин өлтүрдү деп шектелип жаткан Мелис Калыковдун эжеси Дариха Калыкова окуя болгон күнү Мамажакыповдун жанында анын инисинен башка дагы беш прокурор жана бир ишкер болгонун белгилеп, алар күнөөнүн баарын инисине шылтап жатат деген пикирин айткан эле.

Бул боюнча Башкы прокуратуранын маалымат кызматы тергөө бүткөнгө чейин комментарий бербей турганын билдирди. Кызматтык иликтөөнүн натыйжасында облустук прокурордун эки орун басары, эки бөлүм башчысы жана Баткен районунун прокурору орун басары менен кошо иштен алынган.

7836
Белгилер:
прокурор, өлүм, Баткен
Тема:
Прокурор Анарбай Мамажакыповдун өлүмү (17)
Тема боюнча
Прокурордун өлүмү: облустук прокуратуранын жетекчилиги иштен алынды
"Иш козгойм" деп коркуткан. Прокурордун өлүмүнө эмне себеп болгону айтылды
От жандырып жаткан адам. Архив

Аялын өрттөгөн киши, көзү ачыкка барган тергөөчү. Июндагы соттук чечимдер

285
(жаңыланган 16:32 04.07.2020)
Узап кеткен айда өлкөдөгү фемида өкүлдөрү ондогон иштерди карап чыгып, аларга карата түрдүү өкүмдөрдү кабыл алды. Алардын арасында пара менен кармалган тергөөчү, тапанчасын жоготкон милиционер жана аялын өлтүрө сабаган мыкаачы эргул да бар.

Sputnik Кыргызстан алардын ичинен айрым чуулуу иштерди тизмектеп чыкты.

Чоң муштум эргул

Борбор калаада жашаган үй-бүлө башчысы аялы менен уруша кетип, аны шаардын четине таалага алып чыгып катуу сабап, андан соң кожойкени үйдөн чыгарбай бир бөлмөгө үч күн камап койгон. Амалкөй келин короодогу ажатканага барам деп жолдошун алдап качып чыгып, укук коргоо кызматкерлерине арызданган. Эргул сотто күнөөсүн жарым-жартылай мойнуна алып, төмөндөгүдөй көрсөтмө берген.

"Аялым менен жашаганыма төрт ай болгон. Ал күнү келинчегим экөөбүз үйдө арак ичип отуруп уруша кетип, ага кол көтөргөм. Себеби аялымдын уулу автоунаамды уруксатсыз айдап кетип, сүзүп салыптыр. Андан сырткары кызганычтын айынан араздашканбыз. Бирок анын эркине каршы кармаган эмесмин", — деген ал.

Ал эми жабырлануучу аны жолдошу катуу сабап, телефонун сындырып, бети-башындагы көгаласы кетиши үчүн үйдө бир нече күн камагандыгын айткан.

Чоң муштум эркек эки жылга эркинен ажыратылды.

Жалал-Абадда шаардык кеңештин депутатынын бир тууган агасын атып кетишти

Тапанчасын жоготкон тергөөчү

Ысык-Көл облусунда милицияда иштеген кызматкер тапанчасын иш бөлмөсүнөн жоготуп жиберип жумушунан айдалган. Тергөөчү кызматтык ыйгарым укуктарынан ажырагандыктан Бишкектеги көзү ачыктарга барууга аракет кылган. Кийин тапанча бирөөнүн короосунан көчөдө чүпүрөккө оролуп жаткан жеринен табылган. Сот укук коргоо кызматкерин кылмыш-жаза жоопкерчилигине тартуунун мөөнөтү эскирип кеткендиктен жазадан бошотту.

Тамакты тез жаса деп аялына бензин чачкан. Сокулукта күйүк алган келин каза болду

Келинге бензин чачып өрттөп жиберген

Төбө чачты тик тургузган окуя Ысык-Көл облусунун Каракол шаарындагы базарлардын биринде болгон. Мурда бир нече жолу соттолгон 36 жаштагы тургун мас болуп, келинчегинин жумушуна келип ызы-чуу салган. Андан соң май куюучу жайдан бир литр бензин сатып алып, аялын бирдик салып иштеген жайына камап, май чачып өрттөп, андан соң качып кеткен.

Укук коргоо кызматкерлери анын изин суутпай колго түшүрүп, Жазык кодексинин 39-130 беренесинин ("Бейбаштык максатта киши өлтүрүүгө аракет көрүү") негизинде сотко чейинки өндүрүш ачылып, шектүү эки айга камакка алынган.

Ал эми 33 жаштагы жабырлануучу Ысык-Көл облустук бириккен ооруканасынын травматология бөлүмүнө жаткырылган. Келиндин колу-буту, бети күйүп, оор жаракат алганы айтылат.

Айыпталуучу өз көрсөтмөсүндө мындай кадамга аялынын ызаланткан сөздөрү себеп болгонун билдирген.

"Ал күнү чөнтөгүмдө 500 сом бар болчу, бир литрдей арак ичкем. Базарда жүрүп аялымдын иштеген жерине барып "мени менен жашайсыңбы" деп сурагам. "Жок" дегенинен кетип калгам. Жакын жерде эле жүрсөм колуктум менен келген курбусу мени тээп, бетке чаап-чаап жиберген. Аялым мага кол көтөргөн эмес, бирок жаман сөздөрдү айтып тилдеген. Ызаланып бензин сатып келип, келинчегимди сыртынан камап, өрт коюп качып кеткем", — деген шектүү.

Кийин караколдук келин укук коргоо органдарына бетине бензин чачып өрттөгөн күйөөсүн кечиргендигин билдирген. Бирок тартип сакчылар оор кылмыштарга тосмо арыз кабыл алынбай турганын жана кылмыш иши караларын айткан.

Фемида өкүлдөрү тараптарды угуп, чогулган материалды карап чыгып, эркек кишини жети жыл алты айга темир тор артында калтырды.

Айыпталуучуга айланган погончон

Ички иштер министрлигинин Тергөө кызматында иштеген тергөөчү 220 миң доллардын айланасындагы кылмыш ишин изилдеп жүрүп айыпталуучулардан ири суммадагы акча өндүргүсү келген. Иште шектүү катары суралып жаткан ишкерден телефон чалып 500, 1000 жана 2000 доллар талап кылган. Башында жабырлануучу опузалаган акчасын берип, соңунда УКМКга арыз менен кайрылып, тергөөчү 1500 доллар жана 15 000 сом алып жаткан жеринен колго түшкөн. Сот жеңил акча табууга аракет кылган погончонго 300 миң сом айып салды.

7,5 жылга кесилет! Зомбулук көрсөткөндөрдү тосмо арызга карабай камоо сунушталды

1000 сом үчүн кыйылган өмүр

Үйгө мас болуп келген эргул келинчеги менен урушуп, аны катуу сабап койгон. Чыр-чатактын келип чыгышына үй ээсинин дасторкон астына катылган 1000 сом акчасынын жоголуп кеткени себеп болгон.

Шектүү тергөө маалында күнөөсүн толук мойнуна алып, окуянын кандай болгонун айтып берген.

"Ал күнү аялым экөөбүздүн тең арактан башыбыз ооруп турган. Мен андан мурда берген акчаны жана короого коюп койгон жезди сурасам жок деп жооп берген. Ачуум келип аны бир жолу эле бетке чаап, анан жатып алгам. Бир аз убакыт өткөндөн кийин таанышым келип 500 сомго кык жүктөшүп койчу дегенинен ошол жакка кеткем. Кайра келсем аялым короодо жатыптыр, байкасам жүрөгүнүн согушу сезилбейт. Дароо дарыгерлерди чакырткам", — деген ал.

Ал эми баш мээси катуу жабыркаган аял оорукананын жандандыруу бөлүмүндө тогуз күн жатып кайтыш болгон. Фемида өкүлдөрү айыпталуучуну 7,5 жылга эркинен ажыратып, 90 миң сом айып салды.

Өспүрүмдү соттогондо энелик сезим селт эттирет. Судья Кадыркулованын маеги

Төрөгөн ымыркайын ажатканага...

Окуучу кыздын тааныш жигиттен боюна болуп калган. Бир нече ай өткөндөн кийин ата-энесине билгизбей үйдөн төрөп, ымыркайды жуурканга ороп ажатканага ыргытып жиберген. Төрөттөн кийин медициналык жардам албаган өспүрүм бир нече күн ооруп жатып, кийин жакындары аны аймактык ооруканага оор абалда алып барган. Ошондо дарыгерлер тарабынан жашы жете элек кыздын буга чейин көз жаргандыгын аныктаган. Укук коргоо кызматкерлери чарчап калган ымыркайдын сөөгүн беш күндөн кийин тапкан.

Сот өспүрүмдү эки жылга эркинен ажыратып, "1941-1945-жылдардагы Улуу-Ата Мекендик согуштагы Жеништин 75 жылдыгына жана 2010-жылдагы Элдик Апрель революциясынын 10-жылдыгына байланыштуу мунапыс жөнүндө" мыйзамынын негизинде үйүндө калган.

Караколдук келин бетине бензин чачып өрттөдү делген күйөөсүн кечирди

285
Белгилер:
акча, арак, тапанча, уруш, күйөө, аял, өкүм, сот, кылмыш, Кыргызстан
Тема боюнча
Сузакта аялына дөңгөлөк илип жазалаган кишиге өкүм чыкты
Күйөөсү 30 жыл урган аял соттун сөзүн угуп нес болду. Кризистик борборлордун иши
Индиядагы үйлөнүү үлпөтү. Архив

Индияда той өткөргөн жигит каза болуп, 100дөн ашык конок COVID жуктурду

250
Дарыгерлер бардык конокторду коронавируска текшерип, 113үнөн вирус тапкан. Айрымдары башка адамдарга да жуктурганга жетишкен.

БИШКЕК, 4-июл. — Sputnik. Индиянын 30 жаштагы тургуну үйлөнүү той өткөрүп, 100дөн ашык адамга коронавирус жуктурган. Бир нече күндөн кийин өзү ооруканага жетпей, жолдон көз жумган.  Бул тууралуу The Indian Express жазып чыкты.

Маалыматка ылайык, 14-июлда өткөн тойдо Бихар штатында өтө көп адам инфекцияны жуктуруп алган. Инженер-программист болуп иштеген маркум май айынын соңунда айылга үйлөнүү үчүн келген.

"Үйлөнүү тойго чейин ал өзүн жаман сезип, мааракени жылдырууну сунуштаган. Бирок эки жактын үй-бүлө башчылары каршы чыгышкан. Алар эгер той жылса, чоң финансылык кыйынчылыктарга дуушар болорун жүйө кылган", — деп айтып берген туугандардын бири.

Хабибдин атасы Абдулманап Нурмагомедов каза болду

Жаш жубайлардын жакындары той өткөрсө, COVID-19 жукпайт деген ойдо болгон. Жыйынтыгында ага 350 конок чакырылып, үйлөнгөн жигит дене табын түшүрүү үчүн парацетамол ичип жүргөн. Эки күндөн кийин анын абалы өтө начарлап, ооруканага бараткан жолдо көз жумган.

Дарыгерлер бардык конокторду коронавируска текшерип, 113үнөн вирус тапкан. Айрымдары башка адамдарга да жуктурганга жетишкен.

250
Белгилер:
конок, өлүм, коронавирус, той, Индия
Тема:
Дүйнөгө жайылган коронавирус
Тема боюнча
Кырдаал оор экен. Россиялык эксперттер ооруканаларга барып, КРдеги абалга баа берди
Россияда COVID-19га каршы вакцинаны сайдыргандардын абалы айтылды
Кыргызстанца находящиеся в Турции отправили 15 кислородных концентраторов в Бишкек

Түркиядагы мекендештер Стамбулдан 15 кычкылтек концентраторун жөнөттү. Сүрөт

0
(жаңыланган 10:22 05.07.2020)
Бишкек менен Чүй облусунда эпидемиологиялык кырдаал оорлошуп, өпкөсү сезгенип ооруканага кайрылган жарандар көп болууда.

БИШКЕК, 5-июл. — Sputnik. Түркияда иштеп жүргөн мекендештердин "Кыргызстан  —  достук жана маданият" коому Стамбулдан 15 кычкылтек концентраторун алып, мекенине салып жиберишти. Бул тууралуу Sputnik Кыргызстанга аталган коомдун мүчөсү Нурланбек Усубакун уулу билдирди.

Кыргызстанца находящиеся в Турции отправили 15 кислородных концентраторов в Бишкек
© Фото / Нурланбек Усубакун
Түркияда иштеп жүргөн мекендештердин "Кыргызстан  —  достук жана маданият" коому Стамбулдан 15 кычкылтек концентраторун алып, мекенине салып жиберишти

Ал жардамдын алгачкы партиясы гана жөнөтүлгөнүн, учурда дагы акча чогулуп жатканын айтат.

"Бул жакта Кыргызстандагы учуп жүргөн кушубуз дагы өлбөсүн деп тилек кылабыз. Бардыгын "Кыргызстан — достук жана маданият" коомунун төрагасы Айбек Сарыгулов демилгелеп уюштуруп жатат. Ага коомдун мүчөлөрү 2000, 1000, 500, 100 доллардан берип, 15 кычкылтек концентраторун алып, кечээ, 4-июлда, учакка жүктөдүк. Буюрса, бүгүн Бишкекке жетип калат. Бул алгачкы партиясы, учурда дагы каражат жыйналууда. Этап-этабы менен жөнөтүп, 100 аппарат алып берүүнү пландап жатабыз", — деди Нурланбек Усубакун.

Бир суткада 23 адам пневмониядан каза болуп, жалпы саны 120га жетти

Кыргызстанца находящиеся в Турции отправили 15 кислородных концентраторов в Бишкек
© Фото / Нурланбек Усубакун
Белгилей кетсек, Бишкек менен Чүй облусунда эпидемиологиялык кырдаал оорлошуп, өпкөсү сезгенип ооруканага кайрылган жарандар көп болууда

Белгилей кетсек, Бишкек менен Чүй облусунда эпидемиологиялык кырдаал оорлошуп, өпкөсү сезгенип ооруканага кайрылган жарандар көп болууда. Мындан улам медициналык жабдуулар, дарыгерлер жетишпей жатат. Интернат, мейманкана жана спорт залдарга оорукана уюштурулуп, бейтаптарды кабыл алууда.

Кыргызстандагы коронавирус боюнча кырдаал

Өлкө боюнча COVID илештирип алгандардын жалпы саны 7094. Анын 2714ү айыгып, тилекке каршы, 78 киши көз жумду.

Коронавирустун кесепетинен келип чыккан пневмония оорусуна март айынан бери 3009 адам чалдыкты. Бүгүнкү күндө анын 736сы айыгып чыкты. Ал эми 496 адамдын абалы оор, 153 бейтап жандандыруу бөлүмүндө жатат.

Боронов: Россияда иштеген кыргыз дарыгерлер жардамга даяр, учак менен алып келебиз

Өлкө аймагындагы соңку кабарлар менен биздин Telegram-каналдан таанышып туруңуз.

0
Белгилер:
жардам, мекендештер, Түркия
Тема:
Коронавируска байланыштуу Кыргызстандагы кырдаал
Тема боюнча
Өзбекстан Кыргызстанга учак менен 8 тонна гуманитардык жардам алып келди. Сүрөт
Боронов: эртең Кытайдан учак менен 500 кычкылтек концентратору алып келинет