Коррупцияга каршы кызмат: Калилов үч ай мурунку эскертүүгө көңүл бурбай койгон

Жазылуу
Аталган кызматтын жетекчисинин айтымында, Жамшитбек Калилов эскертүүгө көңүл бурбай, ага каршы чараларды көргөн эмес.

БИШКЕК, 18-дек. — Sputnik. Мындан үч ай мурда УКМКнын Коррупцияга каршы кызматы транспорт жана жолдор министри Жамшитбек Калиловго ал жетектеген тармакта коррупциялык көрүнүштөр бар экендигин эскертип, маалымдаган. Бул туурасында аталган кызматтын жетекчиси Сагынбек Исмаилов тартип коргоо, фискалдык жана көзөмөл органдарынын жыйынында айтты.

Исмаиловдун айтымында, Калилов эскертүүгө көңүл бурбай жана каршы чараларды көргөн эмес.

"Эгерде министр алдын алган чараларды көрүп, көзөмөлгө алса, факты кайталанбайт эле. Буга министрдин бир орун басары эле жооп бербеши керек. Мындай фактылар ар бир ведомстводо кездешет, себеби ар бири жок дегенде бир жеринен "тиштеп" калууга аракет кылат", — деди ал.

Жамшитбек Калилов: министр болуп иштөөгө менин моралдык укугум жок. Видео - Sputnik Кыргызстан
Жамшитбек Калилов: министр болуп иштөөгө менин моралдык укугум жок. Видео
Эске салсак, УКМК тараткан маалымат боюнча транспорт жана жолдор министринин орун басары Азимкан Жусубалиев жол куруу боюнча өткөрүлгөн тендерде чет элдик компаниянын кызыкчылыгын коргоо үчүн 520 миң доллар пара алууга макулдашкан. Акчанын 50 миң долларын алып жатканда аны Коррупцияга каршы күрөшүү кызматы колго түшүргөн. Аткаминер андан мурдараак 120 миң долларын алган, калганы кийинчерээк колуна тиймек.

Ал эми бул чырлуу окуядан кийин транспорт жана жолдор министри Жамшитбек Калилов өзү да отставкага кеткен

Жусубалиев узундугу 69,7 чакырым жол куруу боюнча өткөрүлгөн тендердик комиссиянын төрагасы болгон. Натыйжада үстүбүздөгү жылдын 7-сентябрында 40 миллион 751 миң доллар сунуштаган италиялык Todini Costruzioni Generali Company ишканасы тендерден утуп чыгып, келишим түзүлгөн.

Салына турган жол Нарын облусунун Жумгал району аркылуу өтө турган Түндүк — Түштүк альтернативдүү трассасынын бир бөлүгү. Башкууганды (мурдагы Дыйкан) айылынан башталып, аягы Ак-Учук (мурунку Эпкин) айылынан бүтөт.

Жаңылыктар түрмөгү
0