Бычак. Архивдик сүрөт

Караколдо турист сабалып, бычак жедиби? Жабырлануучу менен милициянын эки ача баяны

386
(жаңыланган 11:40 14.01.2019)
Чет элдик жаран жубайы экөөнү Караколдо белгисиз адамдар сабаганын билдирди. Бирок буга шектелген жергиликтүү тургун мас болгон турист аялын кызганып ага кол көтөргөнүн айтууда.

БИШКЕК, 12-янв. — Sputnik. Караколдо жүргөн туристтердин үй-бүлөсүн белгисиз адамдар сабап кетти. Бул туурасында Sputnik Кыргызстан агенттигинин кабарчысына жабырлануучу Алексей Волков билдирди.

Белгилей кетсек, жабырлануучунун версиясы менен Ысык-Көл ОИИБдин расмий маалыматы эки башка чыгып жатат.

Турист Алексей Волковдун айтканы

Мен 30, жубайым 29 жашта. Россиянын жараныбыз, 4-январда Караколго Новосибирскиден келгенбиз. Кыргызстанда биринчи жолу эс алып жатабыз.

Келинчегим экөөбүз досубуздун үч кабаттуу үйүндө жашадык. 6-январда болжол менен саат 23.00дө дүкөнгө кирип кайра чыгып баратканда арттан келген эки белгисиз киши жаткыра чаап, тепкилей баштады.

Анан үйгө качып кирип, эшикти бекиткенге үлгүрбөй калдык. Бизге кол салган кишилер артыбыздан калбай батирибизге да кирип ур-тепкиге алды. Башка катуу чапканда эс-учбузду жоготуп жыгылдык. Алар өзү менен кошо көп ичимдик алып келишкен экен, анткени кийин үйдүн ичинен аябай көп бөтөлкө көрдүк.

Бир нече убакыттан кийин жубайым экөөбүз өзүбүзгө келип карасак, батирде 20-25 жаштагы бир жигит ашканада жүрүптүр. Үйдүн ичи чачылган, кийимдерибиз ыргытылган. Анан ал бизге бычак такап "мууздап салам" деп кыйкырды, шилтеген бычагы көкүрөгүмө тийип, жүрөк менен өпкөнүн ортосуна уруптур. Ошол учурда келинчегим кандайдыр бир катуу нерсени колуна алууга жетишип аны чапканда өзүн жоготуп жыгылды. Андан соң аны сыртка сүйрөп чыгып эшикти ичинен кулпулап алдык. Ал эсине келгенден кийин да эшикти каккылап, коркутуп-үркүткөн сөздөрдү айтып жатты. 

Пострадавший Алексей Волков, которого ударили ножом в грудь
© Фото / Александр Волков
Пострадавший Алексей Волков

Үйдө кымбат баалуу гаджеттер жана акча болгонуна карабай кол салгандар эч нерсе алышпаптыр.

Укук коргоо органдарын чакырсак, аларды дароо эле табышты. Милиция шектүүлөрдөн акча өндүрүп, арызды артка кайтарып алууну кыйытып айтууда. Болбосо тергөө жана сот бүткөнгө чейин Кыргызстанда эки айга чейин калуу керек экен.

Бул жакта калууга мүмкүнчүлүк бар, бирок каалоо болбой жатат. Мээбиз чайкалгандыктан тоого чыга албайбыз. Үйдөн чыкпай эле отурабыз.

Облустук милициянын маалымат кызматынын версиясы

Новосибирскиден келген 30 жаштагы киши ага жергиликтүү тургун кол салып, бычак урганын айтууда. Буга шектелип кармалган 22 жаштагы жигит туристтер менен дүкөндөн таанышканын, андан соң алар аны өздөрү үйүнө чакырганын билдирди. Чогуу отуруп спирт ичимдиктерин ичишкен. Күйөөсү уктап калгандан кийин жубайы экөө сүйлөшүп калышкан. Бир нече убакыттан кийин күйөөсү ойгонуп, аялын кызганып жергиликтүү тургунга атырылып, кол көтөргөн. Ал коргонуу үчүн колуна бычак алып аны көздөй уруп жиберген.

Учурда кармалган шектүү сыртка чыкпоого милдеттендирилип бошотулду. Соттук-медициналык экспертиза кылмыштын канчалык оор деңгээлде экенин аныктайт. Андан соң сот жергиликтүү тургундун баш коргоо чарасын тандамакчы.

386
Белгилер:
милиция, кылмыш, сабоо, турист, Каракол
Тема боюнча
Күйөөсү аялын уруп, ортодо таяк жеген наристе көз жумду. Көлдөгү кайгылуу окуя
Атасынын жеңеси таяктап... Ошто эки жашар наристе чарчап калды