Чүйдө досунун туулган күнүндө жоголгон жигиттин сөөгү табылды
(жаңыланган 12:44 11.02.2019)
Соттук-медициналык экспертизанын алдын ала божомолуна ылайык, жигит тоңуп өлгөн.БИШКЕК, 10-фев. — Sputnik. Чүй облусуна караштуу Жайыл районунда 26 жаштагы кишинин сөөгү табылып, милиция анын өлүмүнүн болжолдуу себебин айтты.
Билдирүүгө ылайык, 9-февралда Жайыл райондук ички иштер башкармалыгына Эриктүү айылына жакын арыктан эркек кишинин сөөгү табылгандыгы тууралуу маалымат келип түшкөн. Милиция кызматкерлери окуя болгон жерге барып, каза болгон эркектин денесинен күч колдонуп өлтүрүлгөн белги табышкан эмес. Ал Степное айылынын 26 жаштагы тургуну экени аныкталган.
"Каза болгон киши теңтуштары менен Кара-Балта шаарында досунун туулган күнүн өткөрүп, ичимдик ичишкен. Кайра келе жатканда ал ажатканага бараарын айтып унааны токтотуп коюуну суранган. Бирок кайра келген эмес. Көпкө чейин күтүп калган достору сыртка чыгып издеп таппай коюшкан. Эртеси жоголгон жигиттин агасы менен издөө иштерин улантып, анын сөөгүн табышкан", — деп жазылат маалыматта.
Соттук-медициналык экспертизанын алдын ала божомолуна ылайык, 26 жаштагы жигит тоңуп өлгөн.
Бул иш боюнча учурда тергөө иштери жүрүп жатат.
Аялдарга кечинде кол салып турушкан. Милиция Аламүдүндөн шектүүлөрдү кармады
(жаңыланган 11:38 25.02.2021)
2020-жылдын декабрь айынан бери үч аял жабыркаган. Тоногондор аларды муунтуп күч колдонуп, көбүнчө уюлдук телефондорун тартып алышкан.БИШКЕК, 25-фев. — Sputnik. Аламүдүн районунда белгисиз адамдардын аялдарга кол салып, аларды муунткан бир нече фактысы катталды. Бул тууралуу Чүй облустук милициясынын маалымат кызматынан кабарлашты.
©
Фото / пресс-служба ГУВД Чуйской области
Шектүүлөр
Билдирмеге караганда, шектүүлөр аялдарга кечинде кол салып турушкан. 2020-жылдын декабрь айынан бери үч аял жабыркаган. Тоногондор аларды муунтуп күч колдонуп, көбүнчө уюлдук телефондорун тартып алышкан.
"Аталган кылмышка шектелип 20 жаштагы Б.М. аттуу улан жана буга чейин бир нече жолу кылмыш жоопкерчилигине тартылган 21 жаштагы К.Д. кармалган", — деп жазылат маалыматта.
Бул боюнча кылмыш иши башталып, шектүүлөрдүн ушул сыяктуу башка иштерге катыштыгы такталып жатат.
Белгилер:
Көчкү түшүп, Бишкек — Ош жолу убактылуу жабылды
(жаңыланган 00:03 25.02.2021)
Көлбаев атындагы туннелден азыр автоунаалар өтө албайт. Тиешелүү кызматтар жолду кардан тазалап жатат. Министрлик аталган чектөө эртең мененки саат алтыга чейин экендигин кошумча кабарлады.БИШКЕК, 24-фев. — Sputnik. Кечинде Бишкек — Ош жолунун 132-чакырымында көлөмү болжол менен 1800 м3 кар көчкү түшкөндүктөн, учурда жол жабылды. Бул тууралуу ӨКМдин маалымат кызматынан кабарлашты.
"Жайыл районунда кечки саат 21:00дөр чамасында Бишкек — Ош жолунун 132-чакырымында көлөмү болжол менен 1800 м3 кар көчкү түшүп, жол жабылды. Тиешелүү кызматтар жолду тазалап жатат. Көлбаев атындагы туннелден азыр автоунаалар өтпөйт", — деп айтышты ӨКМден.
Министрлик аталган чектөө эртең мененки саат алтыга чейин экендигин кошумча кабарлады.
Белгилер:
Россия Кыргызстанга экономиканы көмүскөдөн чыгарууга 623 млн. сом берет
(жаңыланган 16:39 25.02.2021)
Кыргыз өкмөтү 2019-жылы жардам сурап кайрылган. Бул боюнча тийиштүү документтер даярдалып, президент Садыр Жапаровдун сапарынын алкагында келишимге кол коюлду.БИШКЕК, 25-фев. — Sputnik. Россия техникалык жардам катары Кыргызстанга товарларды маркировкалоо системасын түзүү үчүн 623 миллион рублга идентификациялоо жабдууларын алып берет. Бул тууралуу аталган өлкөнүн Өнөр жай жана соода министрлигинин сайтында маалымдалат.
Билдирүүгө ылайык, кыргыз өкмөтү 2019-жылы жардам сурап кайрылган. Бул боюнча тийиштүү документтер даярдалып, президент Садыр Жапаровдун сапарынын алкагында өкмөттөр аралык келишимге кол коюлду.
Өнөр жай жана соода министри Денис Мантуров Россияда бул система ийгиликтүү иштеп жатканын белгилеген.
"Бул бюджетке кошумча салыктардын түшүшүн, рыноктун тазалыгын камсыздап жана ак ниет өндүрүшчүлөрдүн көмүскө сегменттин атаандаштыгынан коркпой рынокко чыгышына шарт түзөт. Ал эми керектөөчүлөр үчүн сапаттуу жана ден соолукка коопсуз товар алууга, келечекте ЕАЭБдин аймагындагы бардык товарды бирдиктүү система менен текшерүүгө мүмкүнчүлүк жаралат", — деди министр.
Ал эми Кыргызстандын экономика жана финансы министри Улукбек Кармышаков бул макулдашуу эки тараптуу байланыштарды жандандырууга маанилүү кадам болоруна ишеним артты.
Аталган системаны түзүүгө 1,5 жыл убакыт кетет. Бул жумуштарды Россиянын Өнөр жай жана соода министрлиги мамлекеттик келишимдер аркылуу аткарат.