БИШКЕК, 25-фев. — Sputnik. 12-февралда Беловодское айылында кишини койдуруп кеткен айдоочу кармалды. Бул тууралуу Чүй ОИИБдин маалымат кызматы билдирди.
Ага ылайык, айдоочу кырсык болгон жерден изин жашырып кеткен. Ал эми жаракат алган киши ошол жерден жан берген.
Сөөктүү кароо учурунда маркумдун денесинин бир нече жери сынганы аныкталып, тийиштүү кызматтарга окуянын чоо-жайын аныктоо тапшырылган.
Баштапкы иликтөө аракеттери маалында каза болгон жаран Ош облусунан Чүй облусунун Москва районуна көчүп келип жашап жаткан 64 жаштагы А.Н. аттуу жаран экени такталган. Ал эми Чүй облусунун Токмок шаарында жашаган 31 жаштагы Н.У. аттуу киши шектүү катары кармалган.
Милициянын алдын ала берген маалыматы боюнча Mercedes-Benz автоунаасынын айдоочусу жол кырсыгына кабылып, кырсык болгон жерден качып кеткен. Ал Москва райондук сотунун чечими менен эч жакка чыкпоо боюнча тил кат жазып берген. Машинасы айып короого токтотулду.
Учурда тийиштүү бардык экспертизалар дайындалып, баштапкы тергөө иштери жүрүп жатат.
