БИШКЕК, 31-июл. — Sputnik. Тараз — Талас — Суусамыр автожолундагы Кара-Ой айылына жакын жерде автоунаа аласалып, үч киши каза болду. Бул тууралуу облустук милициядан билдиришти.
Ага ылайык, жол кырсыгы 30-июлда түнкү саат 23.30дар чамасында болгон. Айдоочу рулду башкара албай жолдон чыгып, аласалып кеткен.
"Жол кырсыктан 47 жаштагы аял менен 11 жана 9 жаштагы эки бала каза болгон. Окуя болгон жерге аймактык милиция барган", — деп айтылат маалыматта.
Ал эми күбөлөрдүн айтымында, кырсык болгон жолдун бөлүгүнө жакында эле шагыл төгүлгөн.
Автоунаада беш киши болгон. Айдоочусу менен дагы бир жүргүнчү олуттуу жаракат алган эмес.
