Ситуация в Нарынской области вокруг китайской компании - Sputnik Кыргызстан

Солтон-Сарыда учурда эмне болуп жатат? Экинчи күн

Жазылуу
5-августта калың элдин тобу Солтон-Сарыда алтын казып жаткан Кытайдын Zhong Ji Mining компаниясынын имаратын көздөй бет алган. Компаниянын кызматкерлери менен жергиликтүү тургундар бири-бирине таш ыргытышкан.

Облустук милициянын жеке курамы толугу менен тартылган.

Милициядагы ишенимдүү кишинин айтымында, 10го жакын киши түрдүү жаракат алып, ооруканага жеткирилген.

Учурда облус жетекчиси баш болгон расмий өкүлдөрү жеринде элге түшүндүрүү иштерин жүргүзүп жатат. Окуя болгон жерде болжол менен 500дөй киши бар.

Буга чейин да жергиликтүү эл кытай компаниясынын жардыруу иштеринен мал кырылып жатканын жүйө келтирип, алардын ишин токтотуусун талап кылган болчу. Жерине вице-премьер Жеңиш Разаков барып, эл менен жолуккан. Окуядан кийин атайын комиссия түзүлүп, мал ичеги оорусунан улам өлүп жатканын айтып, компаниянын күнөөсү жок экенин билдирген. Ошентсе да кытай компаниясы алардын айынан мал-жандык кырылып жатканы ырасталса, чыгымды төлөп берүүгө даяр экенин билдиришкен.

Алгач жаңыларыАлгач эскилери
10:11 06.08.2019

Учурда Нарын районунун Солтон-Сары аймагындагы абал милициянын көзөмөлүндө жана коомдук тартипти сактоо боюнча аракеттер көрүлүүдө. Бул тууралуу ИИМдин маалымат кызматы билдирди.  

Солтон-Сарыда болгон чыр-чатак Кылмыштардын жана жоруктардын бирдиктүү реестрине катталып, тийиштүү тергөө амалдары башталды. Учурда укук коргоо органдары жергиликтүү бийлик менен бирге элге түшүндүрүү иштерин жүргүзүүдө.

10:07 06.08.2019

Биринчи вице-премьер Кубатбек Боронов менен ички иштер министри Кашкар Жунушалиев Нарын облусунун чыр чыккан Солтон-Сары өрөөнүнө жөнөп кетишти. Бул тууралуу өкмөттүн маалымат кызматы билдирди.

"Алар ал жактагы айылдардын Солтон-Сары кениндеги чет өлкөлүк алтын иштетүүчү компаниянын ишин токтотуу үчүн чыгып жаткан жашоочулары менен жолугушат. Жергиликтүү эл менен жолугушуунун жүрүшүндө биринчи вице-премьер Кубатбек Боронов каршылашкан эки тараптын тең бардык жүйөлөрүн угуп, түзүлгөн кырдаалды чечүү жолдорун аныктамакчы", — деп айтылат маалыматта.

 

09:37 06.08.2019

Саламаттык сактоо министрлигинен кабарлашкандай, жабыркагандар таңкы саат 5:00дөн тарта түшө баштаган. Жалпысынан канча киши жабыркаганы боюнча так маалымат жок.

00:06 06.08.2019

5-августта окуя болгон жерден тартылган видео

00:03 06.08.2019

Буга чейин Солтон-Сарыда мал эмнеден улам кырылганы боюнча атайын комиссиянын корутундусу чыккан.

Черногория - Sputnik Кыргызстан
Солтон-Сарыда мал эмнеден улам кырылганы айтылды
23:46 05.08.2019

Ички иштер министрлигинин маалымат кызматы окуя тууралуу толук маалымат бере элек. Алар менен байланышууга мүмкүн болбой жатат.

23:44 05.08.2019

Өкмөттүн Нарын облусундагы өкүлчүлүгүнүн маалымат кызматы облус жетекчиси бүгүн эртең менен орун басары экөө окуя болгон жерге чыгып кеткенин билдирди.

23:44 05.08.2019

Укук коргоо органдарындагы ишенимдүү киши окуя болгон жерге облустук милициясынын жеке курамы толугу менен тартылганын айтты.

Жаңылыктар түрмөгү
0