БИШКЕК, 15-авг. — Sputnik. Ички иштер министринин мурдагы орун басары Курсан Асановдун үйүн тинткен Аскер прокуратурасынын тергөөчүлөрү 2000 доллардан ашыгыраак акча жана белекке берилген сааттарды алып чыгып кетти. Бул туурасында Sputnik Кыргызстан агенттигине анын адвокаты Икрамидин Айткулов билдирди.

Жактоочунун айтымында, тергөөчүлөр мурдагы президент Алмазбек Атамбаев акча жана баалуу буюмдарын Асановго берген деген шек менен тинтүү жүргүзгөн.

"Үйдөн 2000 доллардан ашыгыраак акча, 1000 сом, 5 жана 10 евро, 5 жана 10 дирхам алып кетишти. Андан тышкары, белекке берилген үч комплект саатты алышты. Анын бири Россиянын Ички иштер министрлиги тарабынан берилген, экинчисин Тажикстандын президентинин жардамчысынан алган экен. Аз суммадагы акчаны алып кетишкени үчүн тергөөчүлөр жазаланат деп ойлойм. Анткени мындай акча күнүмдүк керектөөсүнө жумшайм деген бардык эле үйдө болот", — деди жактоочу.

Ошондой эле ал сурак учурунда Асанов телефонун өзү берип, андан кийин жаңы телефон колдонуп жатканда аны да алып коюшканын кошумчалады. Азырынча телефондору бериле элек.

Айткулов жакын арада Курсан Асановго айып таккан ИИМдин ички иликтөөсүнүн жыйынтыгына нааразылыгын билдирип, Башкы прокуратурага даттанарын белгиледи.

Буга чейин адвокат тергөө ачык-айкын болушу үчүн президентке, премьер-министрге кайрылып, иликтөө бүткөнгө чейин ички иштер министри Кашкар Жунушалиевди ээлеген кызматтан четтетип турууну суранган.

Башкы прокуратуранын билдиришинче, Курсан Асанов 7-8-августта ички иштер министринин талаптарына жана буйругуна бир нече ирет баш ийбей жана укугу жок болсо да министрдин макулдугусуз өз алдынча чечим кабыл алган. Андан сырткары, ички иштер органдарынын жеке курамын башкаруусуз калтырган деп айыпталууда.

Асанов "кыргыз милициясына чыккынчылык кылды, ишеничтен кетти" деген негиз менен 13-августта ички иштер министринин орун басары кызматынан бошотулган.

Өз кезегинде Асанов кызматтан алынганы боюнча пикирин билдирип, мамлекеттин жана өзүнүн абийири алдында таза экенин белгилеген.

Эске салсак, 7-августта УКМКнын атайын даярдыктагы кызматы мурунку президент Алмазбек Атамбаевди кармоо операциясын жүргүзүп, ишке ашпай калган. "Альфанын" жоокерлерине Атамбаевдин тарапташтары катуу каршылык көрсөтүп, ок атылган. Натыйжада спецназдын бир жоокери каза таап, 136 киши жаракат алды.

Эртеси, 8-августта, операцияны ИИМ жүргүзүп, сүйлөшүүлөрдөн кийин Атамбаев колго түшкөн. Мурдагы президент менен Курсан Асанов сүйлөшүп, багынып берүүгө көндүргөн видеосу жарыяланган.

БИШКЕК, 27-янв. — Sputnik. Жаңы шайланган президент Садыр Жапаровдун инаугурациясына чакырылган коноктордун баарынын коронавируска тапшырган тести таза чыкты. Бул тууралуу президенттин маалымат кызматынын жетекчиси Нургазы Анаркулов билдирди.

Президенттик кызматка киришүү үчүн ант берүү аземине катардагы жарандардан, коомдук ишмерлерден, чыгармачыл жана интеллигенциянын өкүлдөрүнөн, жергиликтүү жана чет элдик маалымат каражаттарынын жетекчилеринен турган миңден ашуун мейман чакырылган.

Иш-чара санитардык-эпидемиологиялык талаптарга ылайык уюштурулуп, коноктордун баары коронавирус инфекциясына ПЦР-анализ тапшырышкан.

Садыр Жапаровдун инаугурациясы эртең, 28-январда, саат 11:00дө Токтогул Сатылганов атындагы Кыргыз улуттук филармонияда өтөт.