Бишкекте аёосуз сабалгандар: эмнеге экипаж командири кармалган жок?
(жаңыланган 11:32 09.09.2019)
Жактоочунун айтымында, ал коргоп жаткан кызматкерлердин аракетинде кылмыштын белгилери жок.БИШКЕК, 7-сен. — Sputnik. Бишкекте эки кишини аёосуз сабагандардын иши боюнча ШИИБдин кайгуул-күзөт милициясынын эки кенже кызматкери кармалып, командири эркиндикте жүрөт. Бул тууралуу кармалгандардын биринин жактоочусу Жыргалбек Бабаев билдирди.
Эске салсак, 28-августта болжол менен саат 7.00дөр чамасында Бишкек ШИИБге Жал кичи районундагы супермаркеттин жанында кишилердин мушташып жатканы кабарланган. Жерине Милициянын кайгуул-күзөт кызматынын төртүнчү ротасынын кызматкерлери барган. Мындан сырткары, Чүй ОИИББдин кызматкери Казыбек Бапышев дагы келип, эки шектүүнү алып кеткен. Жабырлануучулар оор абалда ооруканага жеткирилген.
Адвокаттын айтымында, ал коргоп жаткан кызматкерлердин аракеттеринде кылмыштын курамы жок.
"Кармалгандар экипаждын айдоочусу жана автоматчик. Булар протокол түзүп же тергөөчүнүн суроолоруна жооп бергенге укугу жок. Муну экипаждын командири кылышы керек. Мен коргоп жаткан адамдардын аракетинде кылмыштын курамы жок. Анын үстүнө айдоочу окуя болгон учурда автоунаадан чыккан эмес. Бул тууралуу видеодон көрсө болот", — деди жактоочу.
Бабаевдин айтымында, экипаж мүчөлөрү шектүүлөрдү милиция бөлүмүнө алып келип, нөөмөттөгү кызматкерге өткөрүп бергени видео көзөмөлдө көрүнүп турат. Демек жоопкерчилик ошол адамда. Жактоочу кармалгандардын арасында экипаж командири гана эмес, ИИБдин нөөмөттөгү тергөөчүсү дагы жоктугуна таң калууда.
УКМКнын маалымат кызматы жактоочунун билдирүүсүнө үн ката элек.
Шектүүлөр жана милиционерлер тууралуу
Адамга кол салуу фактысы боюнча Жаныбек Бапышев жана Калысбек Сеитбеков кармалган. Алар милициянын майору Казыбек Бапышевдун бир туугандары.
©
Sputnik / Табылды Кадырбеков
Укук коргоочулар Жазык кодексинин 320-беренеси ("Кызмат абалынан кыянаттык менен пайдалануу") жана 348-беренеси ("Кылмышты жашыруу") боюнча шектүү катары каралып жатат.
Ички иштер органдарынан билдиришкендей, милициянын майору Казыбек Бапышев иштен алынган. Ал эми 6-сентябрда Бишкек ШИИБдин кайгуул-күзөт милициясынын эки кызматкери кармалган.
Баткен: эки айдан бери изделген аялдын сөөгү үйүнө жакын жерден табылды
(жаңыланган 17:53 24.01.2021)
Буга чейин маркум 2020-жылдын 19-ноябрында өзүнүн 17 жаштагы кызын жашы жете электигине карабастан турмушка узатып жибергендиги маалымдалган.БИШКЕК, 24-янв. — Sputnik. Баткен шаарында 23-ноябрдан бери изделип жаткан Мактым Кожонованын сөөгү табылды. Бул тууралуу укук коргоо органдарындагы ишенимдүү булак билдирди.
Маалыматка ылайык, аялдын сөөгүн өзү жашаган үйдөн 200 метрдей алыс жерде өскөн бүлдүркөндүн арасынан милиция кызматкерлери тапкан. Анын маасысын иттер бакка көтөрүп келип, ошол аркылуу издөө иштери жүргүзүлгөн.
Аялдын сөөгү өлүкканага өткөрүп берилип, экспертиза дайындалганы айтылды.
Баткен ОИИБи ага милиция кысым көрсөткөн деген маалыматтар чындыкка дал келбей тургандыгын билдирген.
Маалым болгондой, 2020-жылдын 19-ноябрында Кожонова өзүнүн 17 жаштагы кызын жашы жете электигине карабастан турмушка узатып жиберген. Аталган факт Баткен ШИИБинде Жазык кодексинин 178-беренеси ("Диний ырым-жырымдарды өткөрүүдө нике курагы жөнүндө мыйзамдарды бузуу") боюнча катталып, сотко чейинки өндүрүш иши башталган. 20-ноябрь күнү Баткен ШИИБине Кожонова жолдошу Мамасадык Рахманов менен суракка чакыртылып, бир саатка жетпеген убакытта кайра кетишкен.
23-ноябрда ал үйүнөн чыгып кеткен боюнча кайра кайрылып келген эмес. Буга чейин ал аял Өзбекстан менен Тажикстандан да изделип жатканы айтылган.
Аялдын алты баласы болгон, эң кичүүсү алты жашта экени айтылды.
АКШда COVID-19га каршы эмделген киши эки сааттан кийин көз жумду
БИШКЕК, 24-янв. — Sputnik. АКШда коронавируска каршы эмделген киши бир нече саат өткөндөн кийин көз жумганын РИА Новости жазды.
Калифорниядагы Плейзер округунун шерифинин кеңсеси өзүнүн Facebook баракчасына каза болгон адам өткөн айда COVID-19 илдети менен ооругандыгын билдирген.
"Плейсер округунун Саламаттык сактоо кызматы жана шерифтин кеңсесинин коронавирус боюнча бөлүмү адам көз жумгандыгы жөнүндө маалымат алышты. Ал кишиге декабрь айынын аягында COVID илдети жуккандыгы аныкталган. 21-январда эмделип, бир канча саат өткөндөн кийин каза болгон", — деп айтылат билдүүдө.
Маркум округдун Саламаттык сактоо департаментинен башка жактан эмделгени айтылат. Буга карата жергиликтүү, штаттык жана федералдык деңгээлде иликтөө жүргүзүлүп жатат. Көз жумган киши Moderna же Pfizer вакцинасыбы, кайсынысы менен эмделгени азырынча белгисиз.
ЖМК: Пакистан россиялык "Спутник V" вакцинасын аларын айтты
БИШКЕК, 24-янв. — Sputnik. Пакистандын өкмөтү россиялык "Спутник V" вакцинасын чукул кырдаал учурунда колдонууга уруксат берип, жергиликтүү фармацевтикалык компанияларга аны сатып алууга жана таратууга жол ачты. Бул тууралуу ЖМКларга таянып, РИА Новости жазды.
Россиялык вакцина өлкөдө колдонууга уруксат берилген үчүнчү дары болгон.
"Пакистандын Дары-дармектерди тескөөчү органынын (Drap) каттоо кеңеши өткөргөн жыйында өзгөчө кырдаалдарда дагы бир вакцинаны колдонууга уруксат берилди. Ал Россиянын Түз инвестициялар фондунун колдоосу менен иштелип чыккан вакцина", — деп айтылат маалыматта.
Ал ошондой эле AGP жергиликтүү фармацевтикалык компаниясы россиялык вакцинанын жалгыз импорттоочу жана дистрибьютери болорун белгиледи.
Пакистандын бийлиги буга чейин чукул кырдаал учурунда AstraZeneca вакцинасын жана кытайлык компания чыгарган Sinopharm дарыларын колдонууга макулдук берген.
Россиянын Саламаттык сактоо министрлиги 2020-жылдын август айында дүйнөдө биринчи болуп COVID-19га каршы "Спутник V" вакцинасын каттаган. Ал Гамалея атындагы Эпидемиология жана микробиология улуттук изилдөө борбору менен Россиялык түз инвестициялар фонду тарабынан иштелип чыккан. Вакцинанын натыйжалуулугу 90 пайыздан жогору болору айтылат.
Белгилер: