БИШКЕК, 11-янв. — Sputnik. Борбор калаада төрт жаштагы баланы сүзүп кетти деген айдоочу бир айдан кийин кармалды. Бул тууралуу Бишкектин Кайгуул милициясынан кабарлашты.
Жол кырсыгы 2019-жылдын 4-декабрында болжол менен саат 14:00дө "Ак-Өргө" конушунун аймагындагы Гагарин көчөсүндө болгон.
"Жүк ташуучу унаанын айдоочусу төрт жаштагы баланы сүзүп, из жашырып кеткен. Бөбөктү апасы 3-шаардык балдар ооруканасына жеткирген", — деп жазылат маалыматта.
Аталган кылмышка шектелип жакында эле 26 жаштагы айдоочу кармалды. Анын "ГАЗ 53А" үлгүсүндөгү жүк ташуучу унаасы айып короого токтотулган.
Учурда сотко чейинки өндүрүш иштери жүрүүдө.
