Россияда 7 кыргызстандык киши жол кырсыгынан жабыркады. Жеринен тартылган видео

© AFP / JOHANNES EISELEЖолдо бараткан унаа. Архив
Жолдо бараткан унаа. Архив - Sputnik Кыргызстан
Жазылуу
Кыргызстандыктар бара жаткан минивэн Mercedes-Benz Sprinter унаалары менен кагышып кеткен. Жүк ташуучу унааларды Өзбекстандын жарандары башкарып бараткан.

БИШКЕК, 15-янв. — Sputnik. Кыргызстандын жети жараны Самара — Оренбург унаа жолунда кырсыкка кабылды. Бул тууралуу жергиликтүү ЖМКлар жазды.

Окуя 14-январь күнү эртең менен М-5 "Урал" трассасынын 181-чакырымында болгон. Анда үч унаа — эки Mercedes-Benz Sprinter менен Honda Stepwgn кагышып кеткен. 

Маалыматка караганда, Mercedes-Benz Sprinter үлгүсүндөгү жүк ташуучу унаа артына ошондой эле автону чиркеп келе жаткан. Рулду Өзбекстандын жарандары башкарып бараткан. Эки жүк ташуучу унаанын ичинде Opel үлгүсүндөгү жеңил унаа болгон.

Полициянын алдын ала маалыматы боюнча, биринчи жүк ташуучу унаанын айдоочусу каршы тилкеге чыга калгандыктан минивэн менен кагышкан.

Окуянын кесепетинен сегиз киши — жүк ташуучу унаанын айдоочусу менен Honda Stepwgn автосундагы жети кыргызстандык жабыркаган. Алардын үчөө Бузулук районундагы оорукананын реанимациясына, бешөө хирургия бөлүмүнө жаткырылган.

Учурда жол инспекторлору териштирүү иштерин жүргүзүп жатат.

Социалдык тармактарда кырсык болгон жерден тартылган видео тарады.

Жаңылыктар түрмөгү
0