БИШКЕК, 4-июн. — Sputnik. Нарын шаарында 15 турак үйдүн короо-жайлары кум-шагылдан тазаланып, учурда мындай жумуштар уланып жатканын Өзгөчө кырдаалдар министрлигинин маалымат кызматы билдирди.
Эске сала кетсек, Нарын шаарында кечээ, 3-июнда, саат 16:00дөр чамасында нөшөрлөп жамгыр жааган. Анын кесепетинен коктулардан келген сел суулары Чоң-Нарын каналынан ашып, Батыш, Алма-Бак, Ак-Коргон, Көтөрмө тилкелеринде жайгашкан жалпы 60 турак үйдүн короосун, чарбалык курулуштарды жана унаа жолдорду каптаган. Каза болгондор жана жабыр тарткандар жок.
Тартылган күчтөрдүн жардамы менен 15 турак үйдүн короо-жайлары кум-шагылдан тазаланган. Бүгүн дагы селдин кесепетин жоюу иштери улантылып жатканы маалымдалды.
Белгилей кетсек, буга чейин Кыргызгидромет аба ырайы тууралуу шашылыш билдирүү тараткан.
