Бишкектеги митингчилерди кууп таратуу. Азыр эмне болуп жатат: видео, сүрөт

Бишкектеги Абдрахманов көчөсүндө турган милициянын кордону артка чегинип, Ак үйдүн жанына келди. Ал эми күн батыш тарабынын Чүй проспектисин Исанов көчөсүнө чейин күч түзүмдери кайтарып турат. Киев көчөсүндө эл жүрөт.

Биримдик" саясий партиясы Жогорку Кеңештин  шайлоосун кайра өткөрүү жарыяланса, ага катышууга макул.  "Биримдик"  бул кадамга 7% босогону өткөн башка партияларды да чакырат.

Бул туурасында аталган саясий биримдиктин маалымат катчысы Адилет Султаналиев билдирди

Президент Сооронбай Жээнбеков эртең, 6-октябрда, парламенттик шайлоого катышкан 16 партиянын лидерлери менен саат 09.00да жолугууну пландап жатат. Бул тууралуу мамлекет башчынын маалымат кызматы кабарлады.

Андан мурда жолугушуу саат 11:00гө белгилени кабарланган эле.

 Саат 24:00го карата жарадар болгондордун саны:
№4 оорукана — 65 жарадар, алардын ичинен 40ы күч түзүмдөрүнүн кызматкерлери. Экөө реанимацияда;
Улуттук госпиталь — 40 жарадар, Экөө реанимацияда;
 №1 шаардык оорукана — 2 жарадар;
Чүй облустук ооруканасы — 7 жарадар;
Улуттук  хирургиялык борбор  — 7 жарадар. 

"Тез жардам кызматынын эки бригадасына кол салуу болгон. Автоунаанын айнектери талкаланып, фельдшер башынан жаракат алган.  Буга чейин үч автоунаа талкаланып, алты бригадага да кол салуу болгон", - деп билдиришти Бишкек мэриясынан.

Киев-Абдрахманов көчөлөрүнүн кесилишинин аймагы. Милиция кызматкерлери менен митингчилер эки жаат болуп каршылашып жатышат. "Молотов коктейли" (аралашма кошулган жарылуучу бөтөлкө) колдонулду.

Саат 22:00гө карата 16 киши ар кандай жаракат алып ооруканага жеткирилген.
"Бишкек илим изилдөө травматология жана ортопедия борборуна Ыкчам Тез жардам кызматы менен ар кандай жаракат алып төрт адам түшкөн. Улуттук госпиталга Тез жардам кызматы менен 10 киши, №1 шаардык клиникалык ооруканага эки адам жеткирилген", — деп айтылат маалыматта.

Азыркы тапта алардын эмне жаракат алганы такталып жатат

Митингчилер милиция кызматкерлерин Орозбеков көчөсү менен ылдый, Киев көчөсүнө чейин кууп келишти. Андан соң күч органдарынын экинчи тобун Раззаков көчөсү менен ылдый кууп, ошол эле Киев көчөсүнө чейин жеткиришти. Азыр милиция "Ала-Тоо" аянты жакта кайрадан чогулушту.

 "Ала-Тоо" аянтындагы митингчилерди таратуу учурунда эки милиция кызматкери жаракат алды. Бул тууралуу Sputnik Кыргызстан агенттигине Саламаттык сактоо министрлигинин маалымат катчысы Жылдыз Айгерчинова кабарлады.

Анын айтымында, укук коргоо органдарына таш тийип, баш мээси чайкалган.

Милиция кызматкерлери Улуттук госпиталга жеткирилгени кошумчаланды.

Оказываем первую помощь раненым !!! pic.twitter.com/3EnPspuC48

— София - Айдана (@Ananayyka) October 5, 2020

Күч органдарынын кызматкерлери митингчилерди "Ала-Тоо" аянтынан элди дээрлик сүрүп чыгарып, Ак үйдүн жанын ээледи. Эл Киев көчөсү, Эркиндик проспектилери талапта кетишти.

Алыста тургандарга Ак үй тараптан дүңгүрөгөн үндөр угулууда.

Ак үйдүн алдына барып, тосмону жулкулдаткан митингчилерди таратуу үчүн кулак тундурган каражаттарды жардырып жатышат.

Митингдегилерди суу бүрккөн автоунаанын жардамы менен кууп жатышканы айтылууда.

Ошондой эле Ак үй тарапта куралдын атылышына окшогон тарсылдаган үндөр угулууда.

"Ала-Тоо" аянтына чогулган митингчилерди кубалай баштады. Бул тууралуу жеринен Sputnik Кыргызстан агенттигинин кабарчысы билдирди.
Буга чейин милиция өкмөт үйүнүн жанындагы скверге келип орун алганы айтылган эле.