Автоунаа уурдап, дагы 4 кылмышка шектелген өспүрүмдүн видеосу

Жазылуу
ИИМдин Криминалдык милиция кызматы (КМК) бир нече автоунааны айдап качкан шектүүлөрдүн аты-жөнүн тактап, колго түшүрдү. Бул тууралуу ИИМдин маалымат кызматы билдирип, алгачкы сурактын видеосун жарыялады.

Кармоо ишине КМКнын мүлктүк кылмыштар менен күрөшүүнү уюштуруу боюнча бөлүмүнүн ыкчам кызматкерлерине аймактык бөлүктөр көмөк көрсөтүшкөн.

2020-жылдын 6-ноябрь күнү милицияга автоунаанын уурдалгандыгы тууралуу билдирүү түшкөн. Шаардагы кичи райондордун биринде түн ичинде белгисиз адамдар 44 жаштагы жаранга таандык Honda Fit үлгүсүндөгү автоунааны уурдап айдап качышкан. Аталган факты КЖБРге катталып, Жазык кодексинин 206-беренеси ("Автомототранспорттук каражаттарды айдап качуу") боюнча сотко чейинки өндүрүшкө алынган. Андан сырткары, ушундай эле фактылар менен башка дагы кайрылуулар болгон. Милиция кызматкерлери бир нече божомолдун үстүндө иштеп, шектүүлөрдүн кайда жүргөн жерин аныкташкан.

Караколдо бакты сүзүп каза болгон жигит автоунааны айдай качкан. Сүрөт

Ыкчам топ тарабынан Жалал-Абад ОИИБдин ыкчам кызматтарына уурдалып бара жаткан автоунаада шектүүлөр Бишкек - Ош жолу менен бара жаткандыгын маалымдашкан. Тийиштүү кызматкерлер аталган автоунааны токтотуп, Ош облусунун С.А. менен А.Р. аттуу тургундарын кармашкан. Экөө тең өспүрүм болуп чыккан. Алардын бири тоноо кылмышы үчүн соттолгону дайын болду.

Маалыматка ылайык, кармалгандар Бишкек шаарынын аймагында Honda Fit үлгүсүндөгү автоунааларды уурдоо боюнча төрт фактыга тиешеси бар деп шектелүүдө.

Кармалгандар автоунаалардын айрымдарын жол кырсыгына учуратып, талкалашып, таштап кетип жүрүшкөн. Автоунаалардын ичинен буюмдарды да уурдап кетишкендиги белгилүү болду. Болжолдуу маалыматтар боюнча, акыркы айдап качкан автоунааны сатып жиберүүнү максат кылышкан.

Учурда бардык фактылар боюнча сотко чейинки өндүрүш жүрүп жатат.

Жаңылыктар түрмөгү
0