БИШКЕК, 8-дек. — Sputnik. Экономикалык кылмыштуулукка каршы күрөшүү боюнча мамлекеттик кызматтын (Финансы полициясы) Ош шаары боюнча башкармалыгы 13 миллион сом өлчөмүндөгү бюджеттик каражаттын жоголушуна шектүү катары Эсеп палатасынын инспекторун кармады. Бул тууралуу Финансы полициясынан билдиришти.

"Мурда ачылган соттук өндүрүштүн алкагында Ош, Баткен жана Жалал-Абад облустары боюнча Эсеп палатасынын инспектору А.К. кармалды. Ал Ош шаарынын СИЗОсуна киргизилди. Буга чейин аталган иштин алкагында жеке ишкананын жетекчиси колго түшүрүлгөн", — деп айтылат билдирүүдө.

Эске салсак, Ош облусунун Капиталдык курулуш башкармалыгы жеке ишкана менен келишим түзгөн. Бирок милдеттүү тарап 42,9 миллион сомдон ашык каражат бөлүнгөн Кең-Сай жаңы конушуна кетчү жолду аягына чейин курбай койгон. Мунун айынан объект пайдаланууга берилбей, ал эми аткарылбай калган жумуштун чыгымы 13 миллион сом деп бааланган.

Учурда тергөө иштери жүрүп, аталган ишкананын кызыкчылыктарын коргоого тиешеси бар адамдар аныкталып жатат. Ошондой эле мамлекеттик бюджетке каражатты кайтартуу боюнча иштер жүрүүдө.

БИШКЕК, 7-мар. — Sputnik. Кечээ кечинде Свердлов районуна караштуу "Дордой" базарында чыккан өрт азыркыга чейин өчө электигин ӨКМ билдирди.

Кечээ 20:30дар чамасында жайгашкан "Дордойдогу" "Алтын-Тоо" базарындагы текстиль материалдарын саткан дүкөндөн өрт чыккан.

Кырсык болгон жерге ӨКМден төрт өрт өчүрүүчү бригада, Бишкек шаардык куткаруу кызматтары тарабынан беш куткаруучу, штаб жана Кризистик кырдаалдарда башкаруу борборунун ыкчам тобу, ИИМден төрт экипаж жана Тез жардам кызматынан бир бригада тартылган. Өрт саат 00:01де чектөөгө алынган.

"Дүкөндүн жалпы аянты 450 чарчы метрди түзсө, анын ичинен болжол менен 200 чарчы метри күйгөн. Азыр өрт толугу менен өчө элек. Адатта текстиль материалдары кеч өчөт", — деп айтылат маалыматта.

Учурда эки өрт өчүрүүчү бөлүм кызмат кылып жатат. Өрттүн келип чыгуу себеби жана келтирилген материалдык чыгымдар такталууда.