12 млн. долларлык зыян. "Манас" аэропортунда ири коррупциялык схема аныкталды
(жаңыланган 15:26 05.02.2021)
Аба майдандын жооптуу адамдары жүк ташыган компанияга жеңилдиктерди берип салгандыктан өлкө казынасына ири суммада киреше түшпөй калганы аныкталган.БИШКЕК, 5-фев. — Sputnik. Башкы прокуратура "Манас" эл аралык аэропортундагы туруктуу коррупциялык схеманы аныктады. Бул тууралуу башкы көзөмөл органдын маалымат кызматы билдирди.
Анда айтылгандай, аба майдандын жооптуу адамдары тарабынан эл аралык каттамдарга жүк ташыган "Гата эйрлайнс" компаниясына жеңилдиктер берилип кеткен. Мунун кесепетинен 2016-жылдын 1-июнунан 2020-жылдын 1-ноябрына чейинки аралыкта мамлекетке 12 миллион доллар зыян келтирилгени аныкталган.
Аталган мыйзамсыз ишке шектүү катары "Манас" эл аралык аэропортунун дирекциясынын мурдагы башчысы Нурсултан Белеков кармалган.
Сотко чейинки өндүрүштүн алкагында "Манас" эл аралык аэропортунун директорлор кеңешмесинин мурдагы төрагасы Албек Ибраимовду, мекеменин мурдагы президенти Эмир Чукуевди, акционердик коомдун башка жооптуу кызматкерлерин, Мүлк фондунун жана Монополияга каршы агенттиктин жооптуу кызмат адамдарын кылмыш жоопкерчилигине тартуу жана мамлекетке келтирилген зыянды өндүрүү маселеси каралып жатканы айтылды.
Көчкү түшүп, Бишкек — Ош жолу убактылуу жабылды
(жаңыланган 00:03 25.02.2021)
Көлбаев атындагы туннелден азыр автоунаалар өтө албайт. Тиешелүү кызматтар жолду кардан тазалап жатат. Министрлик аталган чектөө эртең мененки саат алтыга чейин экендигин кошумча кабарлады.БИШКЕК, 24-фев. — Sputnik. Кечинде Бишкек — Ош жолунун 132-чакырымында көлөмү болжол менен 1800 м3 кар көчкү түшкөндүктөн, учурда жол жабылды. Бул тууралуу ӨКМдин маалымат кызматынан кабарлашты.
"Жайыл районунда кечки саат 21:00дөр чамасында Бишкек — Ош жолунун 132-чакырымында көлөмү болжол менен 1800 м3 кар көчкү түшүп, жол жабылды. Тиешелүү кызматтар жолду тазалап жатат. Көлбаев атындагы туннелден азыр автоунаалар өтпөйт", — деп айтышты ӨКМден.
Министрлик аталган чектөө эртең мененки саат алтыга чейин экендигин кошумча кабарлады.
Белгилер:
Ысык-Атада аялын коркутуш үчүн өгөй уулун сабап, видеого тарткан киши кармалды
БИШКЕК, 23-фев. — Sputnik. Чүйдүн Ысык-Ата районунда өгөй баласын сабаган киши кармалды. Бул тууралуу Чүй облустук милициянын маалымат кызматы кабарлады.
Бүгүн, 23-февралда, райондук ички иштер органдарына 25 жаштагы келин жарандык никедеги күйөөсү кечээ кечинде беш жаштагы баласын ур-токмокко алганын айтып кайрылган.
Аялдын айтымында, 22-февралда жарандык никедеги күйөөсү менен уруша кеткенде телефонуна видео келген. Анда келиндин биринчи никедеги беш жашар баласын уруп жатканы көрсөтүлгөн.
Аталган факты Жоруктар кодексиндеги "Үй-бүлөлүк зомбулук" беренеси менен каттоого алынган. Ыкчам-издөө иш-чараларынын натыйжасында 33 жаштагы киши кармалып, Ысык-Ата РИИБдин убактылуу тергөө абагына киргизилген. Тийиштүү экспертизалар дайындалып, сотко чейинки өндүрүш уланууда.
Жашы жете элек бала Тез жардам кызматынан жардам алгандан кийин энесине амбулатордук дарылануу үчүн берилген.
Арыз жазган аял менен шектүү беш жылдан бери чогуу жашап, Лебединовка айылындагы унаа жуучу жайда иштери аныкталган. Сабалган баладан тышкары экөөнүн төрт жаштагы баласы бар экени белгилүү болгон.
Таңкы 6га чейин жабылды. Өлкөдөгү эки ири жолго чектөө киргизилди
(жаңыланган 00:53 25.02.2021)
Жолду көчкү кооптуулугунан улам жабууга Жарандык коргонуу башчысы-премьер министр бүгүн буйрук берген.БИШКЕК, 25-фев. — Sputnik. Бишкек — Ош жолунда кар көчкү түшүү коркунучу бар болгондуктан Жайыл, Токтогул райондорундагы жана Суусамыр — Талас — Тараз унаа жолунун Талды-Булак айылындагы посттор 25-февраль таңкы саат 06:00гө чейин убактылуу жабылды. Бул тууралуу ӨКМдин маалымат кызматынан кабарлашты.
Бул премьер-министрдин буйругунун негизинде болгон.
"Бишкек — Ош жолунда кар көчкү түшүү коркунучу болгондуктан Жайыл районунун Сосновка, Токтогул районунун Арал постторунда жана Суусамыр — Талас — Тараз жолунун Талды-Булак айылындагы постунда автоунаалардын бардык түрүнө таңкы саат 06:00гө чейин убактылуу чектөө киргизилди", — деп кабарлаган ӨКМ.
Эске салсак, Бишкек — Ош жолунун 132-чакырымында көлөмү болжол менен 1800 м3 кар көчкү түшкөндүктөн учурда жол жабылган.
Белгилер: